زاری كرمانجی – سۆران:
ماوەیەكە لەنێو دژە تیرۆری یەكێتی، چەند كارێك ئەنجام دەدرێن كە بەگوتەی هاووڵاتییان و شارەزاییان دوورە لە هەموو كارێكی تەناهی و پاراستنی ئەمنی گشتی، ئاماژە بەوەش دەكەن، دژە تیرۆری یەكێتی لە جیاتی ئەرك و رۆڵی پاراستنی كوردستان بێت لە تیرۆر، خەریكە خۆیان ئەو كارانە ئەنجام دەدەن .
لە 13ی ئەم مانگە، ئەنجوومەنی ئاسایشی هەرێمی كوردستان راگەیەندراوێكیان بڵاو كردەوە و ئاماژە بەوەكراوە، دوای بڵاوكردنەوەی ئەنجامی لێكۆڵینەوەی كردەوە تیرۆریستییەكەی ڕۆژی 7ی تشرینی یەكەمی 2022ی گەڕەكی سەربەستیی شاری هەولێر، كە تێیدا ئەفسەرێكی ئاژانسی پاراستن و زانیاری سەر بە ئەنجوومەنی ئاسایشی هەرێمی كوردستان بەناوی عەقید هاوكار عەبدوڵڵا رەسووڵ شەهید بوو و، چوار سەرنشینی دیكەش كە پێكهاتبوون لە هاوسەر و دوو منداڵەكەی و خوشكێكی بریندار بوون.
ئەنجومەنی ئاسایشی هەرێمی كوردستان، روونی كردۆتەوە:” دژەتیرۆری سلێمانی وەڵامێكی زور شڵەژاوانە و بێسەروبەریان بڵاو كردەوە كە ئاماژەیەكی ڕوون و ئاشكرایە لە لاوازییان لە بەرگریكردن لەو تاوانبارانەی كە بە بەڵگەوە تێوەگلاون لەو كردەوە تیرۆریستییەی كە خرایە ڕوو، بەڵام لە میانی ئەو وەڵامە لەرزۆكەدا داوای لێكوڵینەوەیەكی نێودەوڵەتی دەكەن بو ئاشكراكردنی ڕاستییەكان.
دووپات لەوە كراوەتەو:” هەرچەندە بەڵگە و دانپێدانانی تاوانباران هیچ گومانێكی بۆ كەس نەهێشتووەتەوە كە ئەم هێرشە ترسنۆكە تیرۆریستییە بە چ شێوەیەك ئەنجام دراوە، بەڵام وەك ئەنجوومەنی ئاسایشی هەرێمی كوردستان، لاریمان نییە لە بەشداریی هەر لایەنێكی نێودەوڵەتی لەپێناو دڵنیابوونی هەموو لایەك لە ئەنجامەكان و ئاشكرابوونی ئەو دەستانەی لەپشت ئەو كردەوە تیرۆریستییەوەن، لە هەمان كاتیشدا دووبارە داوا دەكەین كە هەموو ئەو تاوانبارانەی لەو كردەوە تیرۆریستییەدا بەشداربوون رادەستی دادگا بكرێن.
هێمن شێخزادە، چالاكوانێكی ئیدارەی سۆرانە، دیاركرد:” دژە تیرۆر هێزێكی ئەمنی چەكدارە بۆ پاراستنی گەل و نیشتمان بەكاردەهێندرێت بەمەبەستی بەرەنگاربوونەوەی تاخم و گرووپە توندڕەوە تیرۆرستییەكان یاخود لە یاسا دەرچووەكان، دژە تیرۆری سلێمانی، هێزێكە بوودجە و ئیمكاناتیان سەر بە ئەنجوومەنی ئاسایشی هەرێمی كوردستانە، بەڵام ئەم كردەوە تاریك پەرستانەی كە لەم دواییانە ئەنجامیان دا جێگای تێڕوانین و هەڵوێستە وەرگرتنە كە دەستیان برد بۆ تیرۆری ناوخۆیی دوورە لە هەموو یاسا نێودەوڵەتییەكانی سەربازی و ئەمنی كە دەلالەت بكات لە هێزێكی نیشتمانی باوەڕپێكراو بۆ پاراستن و ئاسایشی خاك و گەلی كوردستان، بەداخەوە ئەو كردەوە تیرۆرستییە نامرۆییەی كە بەشێك لە فەرماندە و كارمەندەكانی دژە تیرۆری سلێمانی ئەنجامیانداوە لە لكاندن و دانانەوەی بۆمب بۆ ئەفسەرێكی خۆیان و خێزان و منداڵەكانیان و كوشتن و تۆقاندنی ئەفسەر و كارمەند و هاووڵاتییانی هەرێمی كوردستان كارێكی نامرۆڤانە و دوورە لە ئەدای دەزگایەكی ئەمنی كە كار بكات بۆ ئارامی و پاراستنی گەل و خاك، ئەنجوومەنی ئاسایشی هەرێمی كوردستان بە بەڵگەوە دانپێدانانەكانی كردەوە تیرۆرستییەكەی بڵاوكردەوە بۆ ڕایی گشتی لەدوای ئاشكرابوونی كردووە تیرۆرستییەكەی دژەتیرۆری سلێمانی كە لە هەولێر بەرامبەر بە ئەفسەرێكی خۆیان و خێزان و منداڵەكانی ئەنجامیاندا ئەم كردەوە نامرۆڤانەی دژەتیرۆری سلێمانی (یەكێتی) بە ئەگەری زۆرەوە دەكەوێتە لیستی تیرۆری هاوپەیمانان و هەموو پەیوەندی و سەرچاوەی دارایی و هاوكارییە سەربازی و ئەمنی و مەشق و ڕاهێنان و ئاڵوگۆڕی زانیارییە هەواڵگیرییەكانیان لەگەڵ ڕادەگرن، ئەوەی گرنگە هەرچی زوو دژەتیرۆری سلێمانی ئەو ئەفسەر و كارمەندە كەلەلایەن ئەنجوومەنی ئاسایش داواكراون وەك تاوانبار ڕادەستی یاسا بكرێن و نیازپاكی خۆیان بسەلمێننن، چونكە لە ئێستادا هێزێكە گەل متمانەی پێیان نەماوە و بۆتە هۆكار و جێگای نیگەرانی و ترس و قەلەقی لەلایەن هاووڵاتییانی هەرێمی كوردستان.
یاد سرێشمەیی، راگەیاندنكار، دەڵێت:” رووداوی تیرۆركردنی ئەفسەرێكی دەزگا ئەمنییەكان لە لایەن دژەتیرۆری یەكێتی تاوانێك بە قەد گەورەیی خۆی مەترسیدار و جێگای قسە لەسەركردنە، ئەم رووداوە كۆمەڵێك رەهەندی جیای هەیە كە دیوە یاساییەكەی بۆ یاساو دادگاكان بە جێدەهێڵین دەبێت یاسا بڕیار لەبارەی شەهیدكردن و تاوانی هەوڵی ئیبادەكردنی خێزانێك بدات و لە لایەكی دیكە پێشێلكردنی مافی گشتی تێدایە، بەڵام ئەوەی لە رەهەندی دیكەوە پەیوەندی بە كۆی كۆمەڵگەی كوردستانەوەیە بەتایبەت ئارامی پایتەخت پێویستە قسەی لەسەر بكرێت و زوومەكە هەمووی لەسەر شەهیدكردنی ئەفسەرێكی ئەمنی نەبێت، بەڵكو دەبێت قسە لەسەر تێكدانی ئارامی پایتەخت و كردەی تیرۆركاری بكرێت لەسەر دەستی كێ، بەناو بەرپرسی دژەتیرۆری یەكێتی و دەزگایەك كە بودجەیەكی زەبەلاحی بۆ تەرخانكراوە بۆ رووبەرووبوونەوەی تیرۆر، بە بڕیاری حزبێك كە هاوبەشی سەرەكی پێكهێنانی حكوومەتە، رووداوی تیرۆركارییەكەی هەولێر بۆ خودی یەكێتی و دەزگا بكوژەكەی پرسیاری زۆر بەجێ دەهێڵێت، چۆن دەكرێت یەكێتی كە پێكهێنەری سەرەكی حكوومەتە، ئارامی هەولێر بكاتە ئامانج؟ چۆن دەكرێت دەزگایەكی بەناو دژە تیرۆر لە كردەیەكی تیرۆركاری تێوەبگڵێت.
جەختی لەوەشكردەوە:” ئەگەر ئەم رووداوە تراژیدییە كار لە متمانەی لایەنگرانی ئەو حزبە نەكات كە ئامادەیە ئیبادەی خێزانێكی یەكێتی بكات بۆ ئامانجێكی بچووكی سیاسی ئەوا بە دڵنیاییەوە دژەتیرۆری یەكێتی متمانەی لەقبوو لە لای كۆمەڵگەی كوردی و كۆمەڵگەی نێودەوڵەتییش، تەنانەت وەك هێزێكی تەیاركراو بەدەست گرووپێكی مەترسیدار دەبنە مەترسی گەورە بەسەر كۆمەڵگە و، گومانی گەورەش بۆ چاك و خراپی هەنگاوەكانی داهاتوویان دروست دەبێت، ئەگەر هەموو ئەوانەی ئەنجوومەنی ئاسایش ناوی بردوون و تێوەگڵاون لەم رووداوە رادەستی یاسا نەكەن.
زیرەك رواندزی، چاودێری سیاسی، رایگەیاند:” دژە تیرۆری سلێمانی بە چ ئاراستەیەك دەڕوات هێزێك بەناوی پارێزەرانی خاك و هاووڵاتییان دامەزرابێت، هێزێك بیەوێت هەموو ئەمنیەتی پارێزگای سلێمانی لە ئەستۆبگرێت، چۆن دەتوانن وا بە ئاسانی ناوبانگی خۆیان لە كەدار بكەن، ئێدی ئەبێ تێبگەین چیتر بە دوای كڵاوی بابردوو نەگەڕێین و وەفا لە وەفاداران فێربین، كوردایەتی لە كوردپەروەران فێربین، شۆڕش لە قوتابخانەی بارزانەوە فێربین، دواجار كورد و كوردستان ناچنە ژێر هەژموون و ناوبانگی گرووپێك كە بیانەوێت دەستەویەخەی یەكتری ببڕن”.