وەزارەتی کشتوکاڵ و سەرچاوەکانی ئاوی حکوومەتی هەرێمی کوردستان، بە فەرمی وادەی قەدەغەکردنی راوەماسی بۆ ساڵی 2026 لە سەرجەم ناوچەکانی هەرێم دیاریکرد.
هەینی 13ـی ئاداری 2026، بەگوێرەی نووسراوێکی فەرمی بەڕێوەبەرایەتی گشتی سامانی ئاژەڵ و ڤێتێرنەری، بڕیاردراوە بە قەدەغەکردنی راوەماسی لە رێککەوتی 15ـی ئاداری 2026 تاوەکو 15ـی حوزەیرانی هەمان ساڵ.
لە نووسراوەکەدا ئاماژە بەوە دراوە:
1- لە رێککەوتی 16ـی حوزەیرانی 2026 راوەماسی ئاسایی دەبێتەوە.
2- ئەم بڕیارە بۆ پاراستنی سامانی ماسییە لە وەرزی زاوزێدا و پاڵپشت بە یاسای ژمارە 48ـی ساڵی 1976 دراوە.
3- بەکارهێنانی رێگە نایاساییەکانی وەک (کارەبا، ژەهر، تەقەمەنی و تۆڕی کون ورد) لە هەموو کاتێکدا قەدەغەیە، چونکە دەبێتە هۆی لەناوبردنی سامانی ماسی و ژینگەی ئاوی.
ئەم بڕیارە ئاراستەی سەرجەم بەڕێوەبەرایەتییە گشتییەکانی کشتوکاڵ لە (هەولێر، سلێمانی، دهۆک، هەڵەبجە، گەرمیان، راپەڕین، زاخۆ و سۆران) کراوە بۆ ئەوەی لە رێگەی لایەنە پەیوەندیدارەکان و پۆلیسی دارستانەوە چاودێری جێبەجێکردنی بکەن.
