سەفا ئەنوەر
خۆی سووتاند، خۆی كوشت، باوكی كوشت، خەزووری كوشت، مووچە هات، مووچە نەهات، تۆمەت و هەواڵی ناڕاست.
هەر لەگەڵ دروستبوونی كۆمەڵ بوونی مرۆیی ڕێكخراو دا، واتە كۆمەڵگە، “ڕاگەیاندن” بەشێك بووە لە چالاكییەكانی ئەندامەكانی ئەو كۆمەڵبوونە، ژیانی ڕێكخراو واتە سیستەم، بەردەوام پێویستیی بە پەیوەندیكردن و گواستنەوەی زانیاریی هەبووە،
فەیلەسووف و كۆمەڵناس یۆرگن هابەرماس، كە لە بواری میدیای سیاسی دا نوسیوویەتی دەڵێت چاودێریكردنی ژینگەی كۆمەڵایەتی، ئابووری و گوزارشتكردن لەو گۆڕانكارییانەی كە لەوانەیە بە شێوەی پۆزەتیڤانە یان نێگەتیڤانە كاریگەریی لەسەر خۆشگوزەرانیی هاووڵاتیاندا هەبێت.
بەرژەوەندی تایبەت، كۆمەڵگایەكەمانی شێواندووە بە جۆرێك كە لە هیچ ڕوویەكی زانستی و هزری و كۆمەڵایەتی بیر ناكرێتەوە و بەرژەوەندی تایبەت لە بەرچاو دەگیرێت سۆشیاڵ میدیا كوردی بووەتە شوێنێك كە لە جیاتی بڵاوكردنەوەی هەواڵێك بە شێوازێكی ئەكادیمی و بیركردنەوە لە شێوازی دروستی میدیای لە مەسڵەحەتی خۆیان خەریكی دروستكردنی فیتنەن لەنێو كۆمەڵگادا باشترین نموونەش شەڕی نێوان دوو عەشیرەت بوو لە ماوەی پێشوو دا كە میدیا ڕۆڵی گەورەكردن و خۆشكردنی ئاگرەكەی گێرا !
كوشتن و بڕین و دزین و خۆسووتاندن بووەتە شتێكی ئاسایی چونكە لە حاڵەت دەرچووە ڕەنگە ڕێژەكەی بە جۆرێكی زۆر لە ئاستی 10 ساڵی پێشوو جیاوازی نەبێت، بەڵام وای لێ هاتووە كە بووەتە دیاردە چۆن ؟ میدیا ئەم ڕۆڵەی گێڕاوە لە دروستكردنی ئەم بابەتە و بڵاوكردنەوەیان بەبێ ئەوەی سانسۆرێك هەبێت.
هەواڵ لە كوردستان بە كاتێكی زۆر كەم دەبێتە ترێند بەهۆی ڕێژەی زۆری میدیای بێ مۆڵەت و فیتنە چی لەم كۆمەڵگایە لە كاتێكدا ئەمە ئەركی وەزارەتی ڕۆشنبیرییە و دەبێت میدیایە بێ مۆڵەتەكان دابخرێن، هەروەها لە لایەكی تر شەڕی بینەر و بەدەستهێنانی بینەر، خۆ ئەم پێشبڕكێیە ناڵێین خراپە هەموو كەسێك و لایەنێك هەوڵ دەدات كە یەكەم بێت، بەڵام نەك بە جۆرێك كە خەڵك بەم شێوازە بشێوێنرێت و هەواڵی بێ بنەما بڵاو بكرێتەوە، گەورەكردنی كەسانی بێ سوود و جگە لەوانەش هەر یەكەیان هەڵدەستێت مایك بە دەست دەگرێت دەڵێت سیمینار و كۆرسی خۆ پێ گەیاندن یان دراوی ئەلیكترۆنی! ڕێژەیی دامەزراندن كەمە و بێكاری گەنجانیش بووەتە سەبەبی ئەوەی ئەمانە نان بەم گەنجانە بخۆن و پارەیان پێ خەرج بكەن بەكارهێنەری میدیاش ئەكسەریەتی گەنجە! لە كاتێكدا تەواو ئامادە نییە بۆ خۆ پێگەیاندن و دەستپێكردنی كاری خۆی و خۆشی ئامادە نەكردووە و ڤیدیۆیەكی ١٠ خولەكی و سیمینارێكی ٢٠ خولەكی ناتوانێت هاوكێشەی ژیانی كەسێك بگۆڕێت بەڵكوو ئەگەر خراپتری نەكەن باشتری ناكەن وە ئەم كۆرسانەش بێ هیچ مۆڵەتێكی پسپۆڕی كۆمەڵایەتی و دەروونی و هتد لەناو كۆمەڵگایەكەمان هاتووچۆ دەكەن و ئەوانیش بەهەمان شێوە بێ مۆڵەتن ئەمە بە گشتی نییە و كەسی باشیشمان هەن بەڵام لەبەر خراپەكان باشەكانیش خەریكە دیار نامێنن، جا جگە لەوانەی دێن لەبن سەری كۆمەڵگەمان دەخوێنن و بەڵا ڕێیان دا دەبەن بە ناوی سەردەمی مۆدێرن ! ڕاستە من لەگەڵ سەردەمی مۆدێرنم و دەبێت خۆمان بگونجێنین، بەڵام بە پێی كولتووری خۆمان جیاوازی دروست بكەین و خۆمان بگونجێنین نەك لە كۆمەڵگایەك كە تەواو ئامادە نییە بۆ بەرەوپێشچوونی سەردەمی مۆدێرن بێین و خۆمان بەراوردی كۆمەڵگایەكانی تر بكەین، بتەوێت و نەتەوێت ئێمە تا ڕادەیەك لە سەردەمی كۆنیش ماوین هێشتا هەندێك وردە كولتووری كۆنمان و عەشایریمان تێدا ماوە، بۆیە لە ئەنجامی نەبوونی بیرۆكەی هاوشێوە و ئایدیای هاوشێوە، بەردەوام كێشەی منداڵ لەگەڵ دایك و باوك ڕوودەدات لە كاتێكدا پێویستە هۆشیاری هاوسەنگ هەبێت و لە پڕێكدا خۆمان بە بابەتەكاندا هەڵنەواسین.
چارەسەری ئەم بابەتە بوونی بەرنامەیەك و ستراتیژییەكی بەهێزی ئەو دەزگایانەیە كە ڕۆڵی كۆنترۆڵی میدیای و كۆمەڵایەتی دەگێڕن وە دووبارە ڕێكخرانەوەی میدیاكان و داخستنی میدیای بێ مۆڵەت و سنوورداركردنی هەندێك هەواڵ و ڕاگرتنی ئەم هەموو فەیلەسووفەی لە سۆشیاڵ میدیا ڕێكلام بۆ كۆرسە بێ بنەمایەكانیان دەكەن .
