” كردنەوەی نووسینگەی حەج و عومڕەی سۆران ئاسانكارییەكی باش بوو بۆ خەڵكی سنوورەكە”
دیدار-زاری كرمانجی
بەرپرسی نووسینگەی حەج و عومرەی سۆران، لە دیدارێكی زاری كرمانجی، تیشكدەخاتەسەر ئیش و كارەكانیان و دەشڵێت: كردنەوەی نووسینگەی حەج و عومڕەی سۆران، هۆكارێكی باش بوو بۆ خزمەتكردن و ئاسانكاری هاووڵاتییانی سنوورەكەمان.
لەبەردەوامی قسەكانیدا یوسف مەلا ئەحمەد مستەفا، بەرپرسی نووسینگەی حەج و عومرەی سۆران، ناسراو بە (مەلا یوسف چۆمانی) بە زاری كرمانجی ڕاگەیاند: كابینەی نۆیەم بە سەرۆكایەتی مەسرور بارزانی سەرۆكی حكوومەتی هەرێمی كوردستان، بایەخی زۆری بەگشت خزمەتگوزاری و سێكتەرەكان داوە، بەتایبەتیش حەج و عومڕە و ڕێزگرتن لە ئایین یەكێك لەوانەش كردنەوەی نووسینگەی حەج و عومرەی سۆران بوو، ئەمەش ئاسانكاری زۆری ئەو كەسانە دروست كردووە، كە ساڵانە بۆ ئەنجامدانی حەج و عومڕە سەردانی وڵاتی سعودیا دەكەن، چونكە پێشووتر دەبوایە بۆ مامەڵەكانیان سەردانی شاری هەولێر و شوێنە دوورە دەستەكانیان بكردبایە، بەمەش هەم ماندووبوونێكی زۆر و هەم خەرجەیەكی زیاتری ڕێگایان هەبوو، كەچی لە ئێستا مامەڵەكانیان لای ئێمە بە ئاسانی تەواو دەكرێت.
لە بەشێكی دیكەی قسەكانیدا گووتیشی: لە ساڵی 2023 دوای ڕەزامەندی سەرۆكی حكوومەت، بە هاوكاری وەزارەتی كاروباری ئاینی و بەڕێوەبەرایەتی گشتی حەج و عومڕە و بەڕێوەبەرایەتی گشتی ئەوقاف و كاروباری ئایینی حكوومەتی هەرێمی كوردستان و ئیدارەی سنوورەكەمان، نووسینگەی حەج و عومرەی سۆران، بەشێوەیەكی فەرمی كرایەوە و كەوتووەتە خزمەت دانیشتووانی شار و شارۆچكە و گوندەكانی ئیدارەی سەربەخۆی سۆران.
بەرپرسی نووسینگەی حەج و عومرەی سۆران، دەشڵێت: حكوومەتی هەرێمی كوردستان خزمەتەكانی بۆ ئەو كەسانەی سەفەری حەج دەكەن بە كردار سەلماندووە، كە ساڵانە بڕە پاریەكی زۆر بۆ ئەو مەبەستە تەرخان دەكرێت، لە وڵاتی سعودییەش هاوشێوەی وڵاتێكی پێشكەوتوو پێگەی حاجیانی هەرێمی كوردستان دیارە، هەروەها لە ڕووی خزمەتگوزارییەكانی تەندروستی و پێویستییەكانی دیكە و چاودێری كردن و سەرجەم ئەو پێداویستیانەی ئاسانكاری بۆ حاجیان دروست دەكات.
مەلا یوسف چۆمانی، بەرپرسی نووسینگەی حەج و عومرەی سۆران، ئاماژەی بەوەشدا: ئاسانكارییەكی دیكە بۆ ئەو كەسانەی نیازی حەجی ماڵی خوایان هەیە، دەتوانن لە لای خۆیان بەشێوەی ئۆنلاین ناوەكانیان تۆمار بكەن، بۆ ئەو مەبەستە لینكی بەڕێوەبەرایەتی گشتی حەج و عومڕە هەیە، دوای كردنەوەی لینكەكە ناوی تەواو و زانیارییەكانیان تۆمار دەكەن، دواتر بەشێوەی تیر و پشككردن، ناوەكانیان دەردەچێت و دوای ئاگادار كردنەوەیان بەپێی ڕێنماییەكان هەریەكەو سەردانی بەڕێوەبەرایەتی یان ئەو نووسینگەی حەج و عومڕە دەكەن، كە لە سنوورەكەیان هەیە دەست دەكەن بە مامەڵەكانیان، ئەوەش ئاسانكارییەكی زیاتر بۆ ئەو كەسانە دروست دەكات، هەروەها ئەو كەسانەش كە خاوەن شەهیدن ساڵانە چەند كەسێكیان بۆ دەستنیشان دەكرێت، بەڕێوەبەرایەتی گشتی شەهیدان بۆ ئەو كەسانەی ئارەزووكردنی حەجیان هەیە بەشێوەی تیروپشك ناوەكان بۆ جیا دەكاتەوەو بۆمان ڕەوانە دەكات.
لەبارەی ئەو كەسانەی كە تەمەنیان لە سەرووی 70 ساڵی بوو لە ساڵی ڕابردوو ژماریەكی زۆریان لە چوونیان بۆ حەج بێبەش كران، لەكاتێكدا پێشووتر ناویان دەرچوو بوو، بەرپرسی نووسینگەی حەج و عومرەی سۆران، ئاشكرای دەكات: ئەو كەسانە ژمارەیان سەرووی 20 كەس بوون، هۆكارەكەشی بڕیاری وڵاتی سعودیا بوو، كە دەبوایە ئەوانەی لەو تەمەنەدان تیروپشكیان بۆ بكرێت، بەڵام ئەو كەسانە ناوەكانیان لای ئێمە تۆمار كراوەو ئەمساڵ ناویان بۆ سەفەری حەج تۆمار دەكرێت و سەردانی دەكەن.
