گەنجانی قەزای سیدەكان لە نەبوونی پاركی گشتی نیگەرانن

سەرۆكی شارەوانی سیدەكان: مووژدە بە دانیشتوانی سنوورەكە دەدات

موڕشید برادۆستی – زاری كرمانجی :

گەنجان و هاووڵاتییانی دەڤەری برادۆست لە سنووری ئیدارەی سۆران، نیگەرانن لە نەبوونی پارك و شوێنێكی گشتی، لە رێگەی زاری كرمانجی داوای دروست كردنی پاركێك لە سەنتەری قەزاكەیان دەكەن.
سیدەكان یەكێكە لە قەزا بەرفراوانەكانی كوردستان لە رووی جوگرافیاوە، بە گووتەی دانیشتوانی ساڵانێكی زۆرە چاوەڕوانی دروست كردنی پاركێكی گشتی دەكەن تا ئێستا بۆیان دروست نەكراوە، گەنجێك دەڵێت، بەهۆی نەبوونی شوێنی گشتی و پارك، بە ناچاری لەبەر دەم دوكان و لەسەر شۆستەكانی نێو بازاڕ دەوەستین، سەرۆكی شارەوانی قەزاكەش، لە ڕێگەی زاری كرمانجی موژدەی دروست كردنی پاركێكی مۆدێرنیان پێدەدات .
عەبدولهادی قادرسەلیم گەنجێكی دانیشتووی سەنتەری قەزای سیدەكانە، لە بارەی نەبوونی پارك لە قەزاكەیان، بە زاری كرمانجی گووت:” لە زۆربەی زۆری قەزا و ناحیەكانی كوردستان پاركی گشتی بوونی هەیە تەنها لە قەزاكەمان نییە، ئەمەش هۆكارێكە كەوا خەڵك و گەنجان شوێن نەبێت ڕووی تێبكەن، بە ناچاری لەبەردەم دوكان و سەر شۆستەكانی نێو بازاڕ دەوەستن، كە ئەمەش سیمایەكی جوان نابەخشێت و گرفتێكی زۆری بۆ دورست كردووین.
ئەو گەنجە، ئاماژەی بەوەشدا، دروست كردنی پارك زەرووریەتێكە بۆ سیدەكان و پێویستە زووتر دروستكرابا، داوا لە حكوومەت و لایەنە پەیوەندی دارەكان دەكات، هەوڵی ڕژد بدەن بۆ دروستكردنی پاركێكی مۆدێرن و سەردەمیانە لە سەنتەری قەزای سیدەكان، بۆ ئەوەی لە كاتی ئێواران و شەوان بۆ پشوو و بەرسەر بردنی كات ڕووی تێبكەین .
هاشم حاجی خورشید پیشەی مامۆستایە و دەڵێت:” هەبوونی پارك بۆ ئەم دەڤەرە زۆر پێویستە، داواكاریەكی سەرەكی گەنجانی دەڤەری برادۆستە بۆ حكوومەت و سیمایەكی شارستانی و جوان بە سەنتەری قەزا دەبەخشێت و خزمەتێكیشە بە دانیشتوانی، ئومێدەوارین حكوومەت پەلە بكات لە دروست كردنی.
زیاتر گووتی:” دروستكردنی پارك لە ڕووی جوانكردنی سیمای قەزا و زیادكردنی ڕێژەی سەوزای گرنگی و تایبەت مەندی خۆی دەبێت، لە هەمات كات بۆ هاووڵاتییان و گەنجانی ئەو دەڤەرە دەبێتە شوێنێك تا لەنێویدا كاتەكانیان بەسەر ببەن و لێی بحەسێنەوە.
سیامەند جخسی یەكێكی تر لە گەنجانی دەڤەرەكە، بە زاری كرمانجی گووت” دەڤەرەكەمان سەدان گەنجی لێیە و مەگەر كاتەكانیان لە كافتریا و بەردەم دوكانەكان ببەنەسەر، ئەگەرنا شوێنێكی گشتی گونجاو نییە ڕووی تێبكەین و كاتەكانمان ببەینەسەر .
زیاتر گووتی، كوێستانەكانیش ئارام و سەلامەت نین، تا لە وەرزی هاوینان ڕووی تێبكەین، یا گەشتیار و هاووڵاتییانی بیانی سەردانی بكەن، بەڵام ئەگەر پاركێك لە سەنتەری قەزاكەمان دروست بكرێت ئاسانكاری زۆر بۆ هاووڵاتییان دروست دەبێت، هەر كاتێك لە ماڵ بێزار بووین یا مێوانێكمان بێت پیاسەیەكی نێو پارك دەكەین، بۆیە هیوادارین پاركێكی مۆدێرن دروست بكرێت .
لای خۆیەوە، عەبدولقادر ئەكڕەم سەرۆكی شارەوانی قەزای سیدەكان، بە زاری كرمانجی راگەیاند:” سیدەكان لە دوای بە قەزاكردنی وەكو حكوومەت هەموو هەوڵێكمانداوە بۆئەوەی سیمایەكی جوانتر بە بازاڕ و گەڕەك و كۆلانەكانی ببەخشین، لە هەمان كات كارمان لەسەر دروست كردنی پاركێكی مۆدێرن كردۆتەوە و خۆشبەختانە ڕەزامەندی وەرگیراوە.
سەرۆكی شارەوانی سیدەكان، دووپاتی لەوەكردەوە، پاركەكە لە سەر ڕووبەری هەزاران مەتر دەبێت، گوژمەی 450 ملیۆن دیناری بۆ تەرخان كراوە و لە نزیك بازاڕ دروست دەكرێت، بڕیارە لە ئایندەیەكی نزیكدا پڕۆژەكان بكەونەوە واری جێبەجێ كردن، ئەو پڕۆژەیەش دەستی پێدەكرێت.
بە گووتەی سەرۆك شارەوانی، پاركەكەی سیدەكان گشتییە و بۆ هەموو تەمەنێك دەبێت، دەشڵێت:” هەوڵ دەدەین پاركێك بێت سەرجەم خزمەت گوزاریەكان لە خۆبگرێت، تا گەشتیار و هاووڵاتییانی دەڤەرەكەمان ڕووی تێبكەن و كاتەكانیان لە كەشێكی ئارامدا ببەنەسەر”.