“زۆرجار ماددی دەبێتە گرفت لەبەردەم كار و چاڵاكیەكانمان”
دیدار-محەمەد هەسنانی
بەرپرسی نووسینگەی سۆرانی دەزگای پاراستنی ئاڵای كوردستان، لە دیدارێكی زاری كرمانجی دەڵێت: تا ئێستا دەیان هەزار ئاڵای كوردستانمان لە سنووری ئیدارەی سەربەخۆی سۆران بەسەر چین و توێژەكان دابەش كردووە، لەگەڵ نوێكردنەوە و هەڵكردنی ئاڵا لەسەر دامودەزگا حكوومی و حزبی و ڕێكخراوەكان و بەردەوامیش دەبین و بە كارێكی پیرۆزی دەزانین.
لە بەردەوامی قسەكانیدا نورەدین دری، بەرپرسی نووسینگەی سۆرانی دەزگای پاراستنی ئاڵای كوردستان، گوتی: بۆ یەكەمین جار لە ساڵی 2017ـەوە نووسینگەی پاراستنی ئاڵامان لە ئیدارەی سەربەخۆی سۆران كردووەتەوە، كە سنووری سەرجەم شار و شارۆچكە و گوندەكانی ئیدارەی سۆران لەخۆ دەگرێت، لە ماوەی هەشت ساڵی ڕابردوو تا ئێستا نزیكەی 70 هەزار ئاڵای كوردستانمان دابەش كردووە بەسەر چین و توێژەكان بەردەوامیشین لەسەر ئەو خزمەتە، بەتایبەتیش لە ئاهەنگ و بۆنە نەتەوەییەكاندا ئاڵای زیاتر بە هاووڵاتییان دەدەین، هەروەها گەورەترین ئاڵای كوردستان بەدەم سروودی نیشتمانی ئەی ڕەقیب بەز دەكەینەوە”.
بەرپرسی نووسینگەی سۆرانی دەزگای پاراستنی ئاڵای كوردستان، ئاماژەی بەوەشدا: هەر كاتێك هەست بكەین كە ئاڵای كوردستان، لەسەر بینای دامودەزگاكانی حزبی و حكوومی و ڕێكخراوەكانی كۆمەڵگەی مەدەنی كۆن بووە یان دڕاوە ئاگادار كردوونەتەوە، لە نوێكردنەوە و هەڵدانی ئاڵای نوێ و تازە، بە گشتی ئەركی سەرەكیمان خزمەتكردن و پاراستنی ئاڵای كوردستانە، تەنانەت ئەگەر تێبینیمان كرد شوێنێك كەمتەرخەمە لە نوێكردنەوەی ئاڵای سەر بیناكەیان یان ئەوانەی لە ژوورەكانیان دادەنرێن، لەسەر ئەركی خۆمان هەوڵی نوێكردنەوەیان دەدەین”.
نوردەین دری، ئەوەش دەخاتەڕوو: جگە لە ئاڵای سەر بینا و بارەگاكان، ئاڵای كوردستان بەشێوەی مەداڵیا و لۆگۆ بە هاووڵاتییان دەدەین، هەروەها كارێكی دیكەمان دانانی ئاڵای كوردستانە لە دەروازە و شوێنە گەشتییەكان، تەنانەت هەندێ شوێن زۆر سەخت و مەترسیدار بوونە، بەڵام توانیومانە ئاڵای كوردستان لەسەر هەڵبكەین، بۆ نموونە لەناو گەلی عەلی بەگ ڕێگای گشتی سۆران-خەلیفان، لەگەڵ ئەوەشدا نەخشاندنی ئاڵای كوردستان لە دیوار و پانتای شاخ و شوێنە گشتییەكان”.
بەرپرسی نووسینگەی سۆرانی دەزگای پاراستنی ئاڵای كوردستان، ئاشكراشی دەكات: لەگەڵ بەڕێوەبەری گشتی گەشتوگوزاری سۆران، لە گفتوگۆداین بۆ ئەوەی بتوانین زۆرترین ئاڵای كوردستان لە شوێنە گەشتوگوزارییەكانی ئیدارەی سۆران هەڵبدەین، چونكە ساڵانە گەشتیارێكی زۆری ناوخۆیی و بیانی و شار و شارۆچكەكانی عێراق ڕوو لە سەیرانگە و ناوچە گەشتیارییەكانی دەڤەرەكە دەكەن، بۆیە بایەخدان بە ئاڵای كوردستان لەم شوێنانە زۆر بە پێویست و گرنگ دەزانین، هیوادارین بتوانین كاری جددی لە سەری بكەین و بەرنامە و پلانەكانمان سەركەوتووانە جێبەجێ بكەین”.
نوردەین دری، بەرپرسی نووسینگەی سۆرانی دەزگای پاراستنی ئاڵای كوردستان، نیگەرانی خۆشی دەربڕی لەوەی زۆرجار گرفتی ماددی ئاستەنگ لەبەردەم كارەكانیان دروست دەكات، بۆ نموونە كڕینی ئاڵا و پێداویستییەكانی خەرجی زۆری دەوێت، ئەگەر بودجەیەكی تایبەت بە خۆمان هەبوایە ئەگەر بڕێكی كەمیش بوایە، دەمانتوانی كار و چالاكییەكانمان فراوانتر بكەین، بەڵام سەرەڕایی ئەوەش بەپێی ئەو ئیمكانیاتەی لەبەردەستمان بووە، كارمان لەسەری كردووە و بەردەوامیش دەبین و بە كارێكی پیرۆزی نەتەوەی دەزانین، چونكە ئاڵا دروشم و ناسنامەی گەلانە”.
لە دوا قسەكانیدا بەرپرسی نووسینگەی سۆرانی دەزگای پاراستنی ئاڵای كوردستان، داواكار بوو لە لایەنە پەیوەندیدارەكان و هاووڵاتییان بە گشتی هاوكار و هەماهەنگ بن لەگەڵیاندا، بۆ ئەوەی بتوانن بە هاوكاری هەموو لایەك خزمەت بە ئاڵای كوردستان و گەل و نەتەوەكەمان بكەین و هەردەم ئاڵای كوردستان شەكاوە بێت، بە دروشمی بەر و ئازادی زیاتر و سەربەخۆ بوونی كوردستان.
