ئەندامێكی پەرلەمانی عێراق: وەزیری دارایی خۆی بەسەروی ئەنجوومەنی وەزیران دەزانێت

موڕشید برادۆستی – زاری كرمانجی:
ئەندامێكی پەرلەمانی عێراق، ڕایدەگەینێت، ئەنجوومەنی وەزیران گەورەرترین دەسەڵاتی جێبەجێ كردنە لە هەموو عێراقدا، بەڵام وەزیری دارایی بە بڕیارەكانی پابەند نییە و وەك دیكتاتۆر مامەڵە لەگەڵ فەرمانبەرانی هەرێمی كوردستان دەكات .
سیپان شێروانی ئەندانی پەرلەمانی عێراق، بۆ زاری كرمانجی ئاشكرای كرد:” ئەنجومەنی وەزیرانی عێراق بەیەك فەرمان بڕیاریداوە سێ 700 ملیار دینار بۆ سێ مانگی موچەخۆرانی هەرێمی كوردستان ڕەوانە بكات، پێویست ناكات مانگانە بۆ ئەو بڕە پارەیە دیسان كۆبوونەوە ئەنجام بدرێت، تەنها ئەركی وەزارەتی دارایییە هەڵبستێت بە جێبەجێ كردنی بڕیاری ئەنجوومەنی وەزیران و ناردنی پارەكە، بەڵام وەزیری دارایی عێراق وەك دیكتاتۆرێك مامەڵە لەگەڵ فەرمانبەرانی هەرێمی كوردستان دەكات و خۆی بەسەرووی ئەنجوومەنی وەزیرانەوە دەزانێت، بەپێی یاسا و دەستوور ئەمە كارێكی هەڵەیە، بەڵام لە عێراق هەموو كارێك دەكرێت، وەزیری دارایی جاری یەكەم نییە ئەو رێگریە لە موچە و بودجەی هەریسَمی كوردستان دەكات.
شێروانی، ئاشكراشی دەكات، بابەتی ڕۆتینی و ڕێكارە كارگێڕی دەكەنە بیانوو بۆ دواكەوتن، ئەمە پێمان وایە بە هانەكە ڕاست نییە و ئامانج لەو كارەیان برسی كردنی زیاتری خەڵك و فەرمانبەرانی كوردستانە، هەرچەندە بە ئەگەری زۆرەوە ئەو هەفتەیە 700 ملیار دینارەكە دەگات، بەڵام پێویست بوو هەفتەی پێشتر ڕەوانە بكرێت و موچەی فەرمانبەرانی هەرێمی كوردستانی پێ دابەش بكرێت”.