جوولانەوەی خیانەتی نوێ

پشتیوان كەریم

هێزەكانی حەشدی شەعبی چەندین رۆژە هەڕەشە لە لایەنە كوردییەكانی خانەقین دەكەن كە پێویستە خێرا ئەو شارە بە جێ بڵێن.
رۆژانە لە كەركووك پۆست لە كورد وەردەگیرێتەوە و خانووی كوردەكان دەڕووخێنن و دەریان دەكەن.
لە گوندی پەلكانە و دەورووبەری هەڕەشەی كوشتن لە هاووڵاتییە كوردەكان دەكرێت.
دۆخی شنگاڵ نەك ئاسایی نەبۆتەوە بەڵكو رۆژانە بە هۆی هاووڵاتییان تیرۆر دەكرێن.
حكومەتی ناوەندی ئەوەی بۆی كرابێت لە هەموو بوارەكانەوە دژایەتی هەرێمی كوردستانی كردووە.
جوتیارانی عەرەب رۆژانە دێنە سەر جوتیارانی كورد و زەوییەكانیان داگیر دەكەن.
وەزارەتی بەرگری عێراق رێگری دەكات لەوەی هێزی پێشمەرگە پڕ چەك بكرێت.
وەزارەتی دارایی بە ئاشكرا مافی هەرێمی كوردستان نانێرێت.
وەزارەتی كشتوكاڵی عێراق بۆ پاڵپشتی عەرەبەكان كار بە گرێبەستەكانی سەردەمی رژێمی بەعس دەكات، بەڵام كار بە تاپۆی رەشی كوردان ناكات كە خاوەنی راستەقینەی زەوییەكانن.
وەزارەتی ناوخۆی و دەرەوەی عێراق لە كاتی كوژرانی چەند گەشتیاری عەرەب لە زاخۆ هاتنە ناوچەكە و پەرلەمان و حكومەتی عێراق هاتنە سەر هێڵ، بەڵام رۆژانە هاووڵاتییانی كورد دەبنە قوربانی تۆپبارانەكانی توركیا و ئێران.
ئەوانەی سەرەوە مشتێكن لە خەروارێكی ئەو زۆرداریی و غەدرەی حكومەتی ناوەندی بە هەموو دامەزراوەكان و حەشدی شەعبیش بەهەموو هێزە جیاكانییەوە لە ئاست نەتەوەی كورد و كیانی سیاسی هەرێمی كوردستان دەیكەن.
ئەمە جگە لە پێشێل كردن 55 ماددەی دەستووری كە حكومەتی عێراق لە ئاست حكومەتی هەرێمی كوردستان دەیكات.
ئەو هەموو بابەتانە هەن كە رۆژ بە رۆژ لە دژی نەتەوەی كورد بەكار دەهێندرێن و پێویستە هەموو هێز و لایەنە كوردییەكان لە بەغدا شەڕی لەسەر بكەن و لە دادگای باڵای فیدراڵی عێراقی سكاڵای لەسەر تۆمار بكەن، بەڵام جگە پارتی لەم چوارچێوەیە لایەنی زیاتر نابیندرێن، شاخەوان عەبدوڵڵا جێگری سەرۆكی پەرلەمانی عێراق لەسەر لیستی پارتی، بە هاوكاری تیمی پارتی بە تەنها شانیان داوەتە بەر ئەو ئەركە.
یەك لایەنی سیاسی لەسەر ئەو بابەتانە نە قسەی كردووە و نەهەڵوێستیان هەبووە، بەڵام بۆ دژایەتیكردنی پارتی و هەندێكشیان بۆ دژایەتی كردنی كیانی سیاسی هەرێمی كوردستان بە قسەی دژە كوردەكان، چاوەِرێی ئەوە دەكەن لە هەرێمی كوردستان شتێك رووبدات، كە لە بەرژەوەندی ئەوان وەك حزب یا جوڵانەوە یا هەر ناوێكی دیكە نەبێت، یەكسەر رادەكەنە دادگای باڵای فیدراڵی عێراق و سكاڵا لەسەر هەرێم تۆمار دەكەن، ئەو دادگایەی بە قسەی زۆرینەی لایەنە سیاسییەكانی كوردستان و عێراق لە شوێنێكی دیكە ئاراستە دەكرێت.
دوای درێژ كردنەوەی ماوەی تەمەنی ئەم خوولەی پەرلەمانی كوردستان كە 80 پەرلەمانتار دەنگیان بۆی دا، نەوەی نوێ لە دادگای باڵای فیدراڵی عێراق سكاڵای لەسەر هەر سێ سەرۆكایەتییەكەی هەرێمی كوردستان تۆمار كردووە، بەڵام لە ئاست ئەو بابەتانەی كە لەسەرەوە باسم كردوون كوێر و كەڕ و ڵاڵن، یا باشتر بڵێم بەقسەی ناحەزانی كیانی سیاسی هەرێمی كوردستان كەڕ و كوێر و ڵاڵ كراوون.