زاری كرمانجی :
بەڕێوەبەرایەتی گشتی كاروباری شەهیدان و ئەنفالكراوانی سۆران، لە بەیاننامەیەكدا بۆردوومانی پردی گەڵاڵە بیر دەهێنێتەوە، لە بەیاننامەكەی بەرێوەبەرایەتی ناوبراو هاتووە “پەنجا و دوو ساڵ بەسەر یەكێك لە تاریكترین و خوێناویترین لاپەڕەكانی مێژووی نیشتمانەكەمان تێدەپەڕێت، كاتێك لە ٢٦ـی نیسانی ١٩٧٤دا، دەستی ڕەشی ستەم و داگیركاریی ڕژێمی بەعسی ڕووخاو گەیشتە قەزای چۆمان و دەڤەری باڵەكایەتی.”
ئاماژە بەوەش كراوە “لەو سەردەمەدا گەڵاڵە مەڵبەندێكی ستراتیژی و ناوەندێكی سەرەكی بڕیاری سیاسی و بازرگانیی شۆڕشی ڕزگاریخوازی گەلەكەمان بوو، هەر ئەمەش وایكرد ڕژێمی بەعس دوور لە هەموو بەها مرۆیی و نێودەوڵەتییەكان، دڕندانەترین جۆری چەكی قەدەغەكراوی نێودەوڵەتی، دژ بە خەڵكی سڤیلی ئەو ناوچەیە بەكاربهێنێت. بۆردومانكردنی پردی گەڵاڵە، كە دەمارێكی گرنگی ژیانی ناوچەكە بوو، نەك هەر تاوانێكی جەنگ بوو، بەڵكو كۆمەڵكوژییەكی ڕێكخراو بوو كە تێیدا زیاتر لە 105 هاووڵاتی بێتاوان، لەوانە منداڵانی چاوگەش، قوتابیانی زانستخواز، گەنجان و پیرە پەككەوتەكان بوونە قوربانی و خوێنی ئاڵیان تێكەڵی خاكی پیرۆزی كوردستان بوو.”
بەڕێوەبەرایەتی گشتی كاروباری شەهیدان و ئەنفالكراوانی سۆران، لە بەیاننامەیەكدا هاوسۆزی و پاڵپشتی خۆیان بۆ برینداربووان و كەسوكاری سەربەرز و نیشتمانپەروەری شەهیدانی كارەساتی گەڵاڵە دەردەبڕێت و دەڵێ “لەم یادە پڕ لە ئێش و ئازارەدا، جارێكی تر هاوسۆزی و پاڵپشتی بێپایانی خۆمان بۆ برینداربووان و كەسوكاری سەربەرز و نیشتمانپەروەری شەهیدانی كارەساتی گەڵاڵە دەردەبڕین. جەخت دەكەینەوە كە ئەركی یاسایی و ئەخلاقی حكومەتی فیدراڵی عێراقە، كە بەگوێرەی ماددەی ١٣٢ی دەستووری هەمیشەیی، قەرەبووی شایستەی ماددی و مەعنەوی سەرجەم كەسووكاری شەهیدان و زیانلێكەوتووانی دەستی ڕژێمی پێشوو بكاتەوە و ئاوڕی جددی لە ئاوەدانكردنەوە و گەشەپێدانی ئەو ناوچانە بداتەوە كە بەهۆی سیاسەتی سووتماككردن و بۆردومانەوە وێران كراون. ئێمە وەك لایەنی پەیوەندیدار، هەموو هەوڵ و توانایەكی خۆمان خستۆتە گەڕ و لە فشارەكانمان بەردەوام دەبین تا ئەو كاتەی مافە دەستوورییەكانی بنەماڵەی شەهیدان بەدی دێن و خزمەتگوزارییەكان لە ئاستی گەورەیی قوربانیدانی ئەواندا دەبن.”
