“تەمەنێكی كەم خاوەن سەركەوتنێكی زۆر، یەكێكە لە خانمە دیارەكانی نێو جیهانی وەرزشی”

چراخان ئەحمەد ـ زاری كرمانجی:
بەشداری چەندین جۆر وەرزش و پاڵەوانێیەتی و خولی كردووە، لە زۆربەی یاریەكان ئاستێكی باشی تۆماركردووە، وەك دەڵێن لە هەر پەنجەیەكی هونەرێك دەبارێت.
خانمێكی وەرزش وانە، هەر لە تەمەنی منداڵیەوە خولیایی وەرزش لە دڵ و مێشكیدا چەكەرەدەكات، سەرباری ئەو ئاستەنگیانەی لە ژیانی وەرزشی رووبەرووی دەبێتەوە، بەڵام ئەو هەرگیز كۆڵ نادات و دەست بەرداری خەونەكانی نابێت.
رۆژانە سەرقاڵی مەشق و راهێنانە تاوەكو بتوانێت لە جاران ئاستی باشتربكات.
“ئیمان هەڤاڵ مەحمەد” تەمەن 24 ساڵ، خانمێكی درەوشاوەی تۆپی پی سۆرانە، جگە لە تۆپی پێ شارەزایی لە چەندین جۆر وەرزش هەیە، لە میانەی دیدارێكی بۆ زاری كرمانجی دەڵێت ” دەست پێكردنم بە وەرزش، لە قوتابخانەوە بوو، كاتێك وانەی وەرزشمان دەبوو، دەچووین بۆ یاریگای قوتابخانە و لەگەڵ هاوپۆلەكانم بە شێوەی تیم یاری تۆپی پێمان دەكرد”.
حەزێكی زۆرم بۆ وەرزش هەبوو، بویە بەشێوەیەكی گشتی بەشداریم كردووە لە هەموو جۆرەكانی وەرزش لەوانەش: تۆپی پێ، تۆپی دەست، مەلەوانی و شمشێربازی، هەروەها بەرز كردنەوەی قورسایی و هێزی لەش.
ئیمان بۆ بەرەوش پێشبردنی تواناكانی بەشداری دەكات لە چەندین خولی راهێنەری لەوانە: خولی راهێنەری تۆپی سەبەتە، خولی راھێنەری شمشێربازی، خولی راهێنەری لەش جوانی، خاوەن بروانامەی(A) كە هەشت ساڵە یاریزانە، ئاستی زۆر باشی لە راهێنانەكان تۆمار كردووە.
دواجار بەمەبەستی گرنگی دانی زیاتر بە راهێنان و تواناكانی دەچێتە كۆلێژی وەرزشی و دەبێتە خاوەن بروانامە.
سەبارەت بەگرنگ ترین ئەو دەسكەوتانەی كە لە وەرزش بە دەستی هێناون و دەڵێت” وەك دەسكەوت گرنگترین دەسكەوتم ئەوە بوو كە بەردەوام بم لەوەی خەونەكانم بكەم بەراستی، جگە لەمەش فێری ئەوە بووم چۆن بە بەهێزی و بروابە خۆبوونەوە بمێنمەوە، هەر بەم هۆییەوە ئێستا خاوەنی چەندین مەدالیا و بروانامەم”.
بەهۆی كار و چالاكیەكانی دەبێتە كەسێكی ناسراوی ناو كۆمەڵگە، لەم رێگاییەوە ئیمان هانی هەموو توێژە جیاوازەكان دەدات، كە بێنە ناو یارییە ەرزشیەكان بەتایبەت و ئەو خێزانانەی كە رێگە نادان كچەكانیان بەشداری وەرزشە جۆراو جۆرەكان بكەن، چونكە وەرزشیش بەشێكی كۆمەڵگا پێكدێنت و خانمان و لاوان هۆشیار تردەكات.
وەك خۆی دەڵێت” ماوەی شەش ساڵە بەشدارم لە وەرزش، زۆر بەی كاتەكان بە سەر بە خۆیی كارم كردووە تەنیا بۆ سێ یانە نەبێ”.
لە درێژەی قسەكانی ئاماژە بەوەش دەدات، سەرەتای دەست پێكردنی لە وەرزش حەزێكی مناڵی خۆی بووە هیچ كاتێك بە سەرچاوەی داهات سەیری نەكردووە.
جگە لە وەرزشی ناوخۆ بینەرێكی باشی یاری تۆپی پێ دەرەوەی ووڵاتە، لەوانەش هاندەری ریاڵ مەدرید وهەڵبژاردەی ئەڵمانیایە.
سەبارەت بە رێگا خۆشكردنی ئافرەتان بۆ هاتنە ناوەوەیان بۆ ناو وەرزشی تۆپی پێ و جۆرەكانی تری دەڵێت” ئێستا كۆمەڵگا زۆر هۆشیارە ئافرەتان لە چاو ساڵانی رابردوو زیاتر دەبیندرێن لە نێو هۆڵەكانی راهێنان و كۆلێژە وەرزشیەكان، ئەمەش جێگەی خۆشحاڵی ئێمەیە كە پێشانی وڵاتانی تر بدەین كۆمەڵگاكەمان وەك كۆمەڵگەی ئەوان لە رووی وەرزشی، تەندروستی و هۆشیاری پێشكەوتووە”.
لە داهاتوودا ئامانجم ئەوەیە هۆلێكی لە شجوانی بكەمەوە تاوەكو بتوانین رێگە خۆشكەربین ئافرەتانیش هاوشێوەی پیاوان بێنە ئەو جیهانە جوانە، بەلایەنی كەمەوە خزمەتێكی بچوكی كۆمەڵگە بكەم.
ئەو زۆر خۆشحاڵە كە دەبینێت زەمینەسازی تەواوتی كراوە بۆ ئافرەتان كە زیاتر ئاشنای وەرزش بن.
لە كۆتایی دیداری دەڵێت” هەمووكات وەرزش بەشیكی گەورە بووە، لە ژیانم سوپاس بۆ خوای گەورە هێزی ئەوەی پێ بەخشیوم بتوانم رووبەروی هەموو ئاستەنگەكانی ژیانم ببمەوە تاوەكو بەرەو لوتكە هەنگاو بنیم هەموو كات گەیشتن بە لوتكە ئاسانە بەڵام پارێزگاریكردن لێ قورسە”.