زاری كرمانجی- سۆران:
سەرۆکی فراکسیۆنی پارتی دیموکراتی کوردستان لە پەرلەمانی عێراق گوتی: حکوومەتی هەرێمی کوردستان پابەندی یاسای بودجە بووە و حکوومەتی عێراق لەجیاتی پابەندبوون بە یاسای بودجە دەیەوێت بەقەرز مانگانە 500 ملیار دینار بداتە هەرێمی کوردستان کە بەشی مووچە ناکات و کەمە، بۆیە پێویستە بەپێی یاسای بودجە مانگانە 902ملیار دینار بۆ هەرێمی کوردستان ڕەوانە بکات.
د. ڤیان سەبری، سەرۆکی فراکسیۆنی پارتی دیموکراتی کوردستان، حکوومەتی هەرێمی کوردستان پابەندە بە ڕێککەوتنی یاسای بودجە و ئەوەی لەسەری بووە جێبەجێی کردووە لە ڕادەستکردنی نەوت و داهاتە نانەوتییەکان، چونکە بەپێی پێویستی وەزارەتی نەوتی عێراق نەوتمان ڕادەستکردووە و بەپێی یاسای بەڕێوەبردنی دارایی داهاتی نانەوتیشمان ڕادەست کردووە.
سەرۆکی فراکسیۆنی پارتی دیموکراتی کوردستان لە پەرلەمانی عێراق گوتیشی: حکوومەتی عێراق لە کۆتایی مانگی سێ تا ئێستا 598ملیار دیناری بۆ هەرێمی کوردستان ناردووە و ئێستاش دەیەوێت بە قەرز پارە بۆ هەرێمی کوردستان ڕەوانە بکات، حکوومەتی عێراق خۆی دەزانێت ئەو پارەیە بەشی مووچەی فەرمانبەرانی هەرێمی کوردستان ناکات و زۆر کەمە.
گوتیشی: بەپێی یاسای بودجەی گشتی عێراق کە لە پەرلەمان دەنگی لەسەر دراوە و پەسەندکراوە و بۆتە یاسا پێویستە هەموو مانگێک حکوومەتی عێراق 902ملیار دینار بۆ مووچەی فەرمانبەران ڕەوانە بکات، بۆیە لەجیاتی ئەوەی 500ملیار دینار بەقەرز بداتە هەرێمی کوردستان پێویستە بەخۆیدا بچێتەوە و پابەندی یاسای بودجە بێت، چونکە ئەوەی ئەوان باسی دەکەن بەشی مووچەی فەرمانبەرانی هەرێمی کوردستان ناکات.
