ئومێد سەباح: یاسای بودجەی عێراق بۆ تۆڵەکردنەوە لە مافە دەستورییەکانی هەرێمی کوردستان نووسراوە

زاری كرمانجی- سۆران:

ئومێد سەباح، سەرۆکی دیوانی ئەنجومەنی وەزیرانی هەرێمی کوردستان رایگەیاند، یاسای بودجەی عێراق بۆ تۆڵەکردنەوە لەمافە دەستورییەکانی هەرێمی کوردستان نوسراوە.

سەبارەت بە سستی بەغدا لە ناردنی شایستە داراییەکانی حکومەتی هەرێمی کوردستان، ئومێد سەباح لە کۆنفرانسێکی رۆژنامەوانیدا رایگەیاند، دوو هۆکاری سەرەکی لەپشت ئەم بارودۆخەوەیە، یەکەمیان یاسای بودجەیە کە لە پەرلەمانی عێراق دەرچوو، گەورەترین لێدان بووە لە دەستەکەوتە دەستوورییەکانی هەرێمی کوردستان، گوتیشی: ئەم یاسایە بۆ تۆڵەکردنەوە لە هەموو مافە دەستوورییەکانی هەرێمی کوردستان نووسراوە.

ئاماژەی بەوەشدا، دووەم هۆکار، تێگەیشتنی وەزارەتی دارایی عێراقە بۆ جێبەجێکردنی یاسای بودجە، کە لە خودی یاسای بودجە خراپترە.

سەرۆکی دیوانی ئەنجومەنی وەزیران ئەوەی خستەڕوو، مافی هەرێمی کوردستان لە یاسای بودجە نزیکەی 16 ترلیۆن دینارە، بەڵام ئێستا وەزارەتی دارایی عێراق دەڵێت تەنیا هەشت ترلیۆن دینار مافکەوتەی هەرێمی کوردستانە.

ئومێد سەباح روونیشیکردەوە، ئەم دوو ژمارەیە لەگەڵ شایستە داراییەکانی هەرێمی کوردستان، بەهیچ شێوەیەک یەکناگرنەوە.

هەر سەبارەت بە مووچەی فەرمانبەرانی هەرێمی کوردستان سەرۆکی دیوانی ئەنجومەنی وەزیران جەختی کردەوە لەسەر ئەوەی، کاری لەپێشینەی ئەوان، زامنکردنی مووچەی مووچەخۆرانی هەرێمی کوردستان بووە لە هەموو گفتوگۆکاندا، بەڵام حکومەتی عێراق تا ئێستا نەچووەتە ژێر باری ئەوەی مووچەی مووچەخۆرانی هەرێمی کوردستان کە مافێکی دەستووریە، بدات.

ئومێد سەباح لەو کۆنفراسە رۆژنامەوانیەدا راشیگەیاند: حکومەتی عێراق وەک پارێزگایەک مامەڵەمان لەگەڵدا دەکات، بگرە لە پارێزگایەک توندتریش، لەڕووی مافیشەوە کەمتر لە پارێزگایەکمان پێ رەوا دەبینێت، کە ئێمە ئەمە رەت دەکەینەوە.

دەربارەی بڕیارەکەی دوێنێی حکومەتی عێراق، ئومێد سەباح باسی لەوەکرد، ئەو بڕیارەی دوێنێ لە ئەنجومەنی وەزیران دراوە، بڕیارێکی تاکلایەنە بووە و پرسی و رایان بە حکومەتی هەرێمی کوردستان نەکردووە، نە لەسەر بڕەکەی نە لەسەر چۆنێتی ناردنی، گوتیشی: ئێمە هیچ کاتێک لە کۆبوونەوەکان بە 500 ملیار دیناری مانگانە رازی نەبووین، جگە لە خەرجیە پێویستەکانی دیکە.

سەبارەت بە هەنگاوی داهاتووی حکومەتی هەرێمی کوردستان، سەرۆکی دیوانی ئەنجومەنی وەزیران ئاشکرایکرد، بە زووترین کات وەک حکومەتی هەرێمی کوردستان، بەسەرپەرشتی سەرۆکوەزیران مەسرور بارزانی کۆدەبنەوە و، بە ئامادەبوونی هەموو کابینە، قسە لەسەر ئەوە دەکەن کە هەنگاوی داهاتوو چۆن دەبێت و چۆن مامەڵە لەگەڵ ئەم بارودۆخە بکەن.

لەهەمانکاتدا ئەوەشی خستەڕوو، کە دەرگای دانووستان لەگەڵ حکومەتی عێراق ناپچڕێنن، بەڵام هەڵوێستی فەرمی هەرێمی کوردستان لە کۆبوونەوەکانی داهاتووی حکومەتی هەرێمی کوردستان دیاری دەکرێت.

ئومێد سەباح دووپاتی کردەوە، “ئەوەی لە توانای حکومەتی هەرێمی کوردستان بێت بۆ زامنکردنی مافەکانیان، لەسەروو هەمووشیانەوە، مووچەی مووچەخۆران، ئێمە درێغی ناکەین و هەرچی لە تواناماندا بێت دەیکەین”.