سەردار قازی – سۆران:
لە چەند رۆژی رابردوو لەژێر ناوی (شەفیق عەلی باویل) وەرزشوانی كۆچكردووی دەڤەری سۆران، پاڵەوانێتییەكی تێنسی سەر زەوی لە رواندز بۆ ئارەزوومەندانی یارییەكە رێكخرا.
لەم پاڵەوانێتییەدا 12 یاریزان بەشدارییان كردبوو، رۆژانە لە یاریگەی تێنسی سەر زەوی ڕواندز یارییەكان بەڕێوە دەچوون.
دوای كێبڕكێیەكی زۆر، سەرەنجام هەر دوو یاریزان عەلی سەباح لە یانەی سۆران و شەهید سەباح لە یانەی رواندز گەیشتنە یاریی كۆتایی.
عەلی سەباح، بەدوو كۆمەڵەی بێ بەرامبەر كە ئەنجامی كۆمەڵەكان (6-3)، (6-0) بوون، یارییەكەی لە سوودی خۆی تەواو كرد و نازناوی ئەو پاڵەوانێتییەی لە باوەش گرت.
