زاری كرمانجی خەباتی پێشمەرگە و فەرماندە رەشید خواكوڕكی بڵاودەكاتەوە

سەرۆك بارزانی پێی گووتین: كلیلی سەركەوتنی پارتی میحوەری سیدەكان بوو

خۆی و یانزدە كوڕی پێشمەرگەنە و دەڵێت: ئامادەین بۆ كوردستان گیانی خۆمان بكەینە قوربانی

موڕشید برادۆستی – سیدەكان:

لە دیمانەیەكی هەفتەنامەی زاری كرمانجیدا، عەمید رەشید ئەحمەد شێخەكت، ناسراو بە ” رەشید خواكوڕكی ” فەرماندەی فەوجی سیدەكان لە هێزی خەبات و كەسایەتی دیاری دەڤەری برادۆست، باس لە ژیان و ساتەوەختی پێشمەرگایەتی خۆی دەكات و دەڵێت:” بە فەرمانی سەرۆك بارزانی بۆ یەكەمینجار چەكی پێشمەرگایەتیم هەڵگرت و بەردەوامم بێدابڕان و تامردنیش هەر پێشمەرگەدەبم، ناوبراو ناشی شارێتەوە، سنووری برادۆست، هەزاران كەسی پێشمەرگەیە و توانایان تێدایە ناوچە سنووریەكانی خۆیان بەباشی بپارێزن و بەرگی لێبكەن، دەشڵێت:” لە كۆبوونەوەیەكدا، سەرۆك بارزانی پێی گووتین:” كلیلی سەركەوتنی پارتی میحوەری سیدەكان بوو.
لە دەستپێكی قسەكانیدا، عەمید رەشید خواكوڕكی، فەرماندەی فەوجی سیدەكان لە هێزی خەبات، بۆ زاری كرمانجی گووتی:” لە دووای راپەڕین كە سەرقاڵی كار و كاسبی بووین، ئۆتۆمبێلێك كە” حەمید ئەفەندی و ئەنوەر خانەمیر”ی لەگەڵ بوو، لە دیلزیان هاتە لامان و بەباوكمیان گووت” سەرۆك بارزانی لە میحوەری سیدەكانە و داوای ئێوە دەكات، هەر ئەوكات لەگەڵ ئەوان چووینە خزمەت سەرۆك و لەگەڵی كۆبوینەوە، دووای گفتوگۆیەكی زۆر، سەرۆك بازرانی باسی دەڤەرەكەمانی زۆر بە جوانی كرد، هەمو هاوكاری و پشتگیری خۆی بۆ دەربڕین و بە حاجی ئەحمەدی باوكمی گووت، دەبێت رەشیدی كوڕت بدەیە ئێمە و لای ئێمە ببێتە پێشمەرگە، باوكیشم پێی گووت، ئێمە هەموومان خۆمان بە كەس و كاری جەنابت دەزانین، هەر هەمان رۆژ، كە ساڵی 1995 بوو، وەك ئامر فەوج لە سنووری سیدەكان دەستبەكاربووم و نزیكەی 100 كەس لەگەڵم بوونە پێشمەرگە و بەشی زۆریان كەس و كار و خزم و خەڵكی دەڤەرەكە بوون، بەردەوام بووین لە خەبات و پێشمەرگایەتی و پاراستنی وڵات لە دوژمن و ناحەزانی كوردستان، تا ئەمڕۆشی لەگەڵ بێت بەو پەڕی شانازییەوە بەردەوامم.
رەشید خواكوڕكی، دووپاتی كردەوە:” باپیریشم كە شێخەكت ناسراوبوو، لەگەڵ بارزانی نەمر دۆستایەتی هەبوو، لە كاتی گەڕانەوەی بارزانی لە كۆماری مەهاباد لە پردی ” سپیارا لە ناوچەی خواكوڕك”، بانگی شێخەكتی كرد، ئەوكات حەمە شەریف و مەحموود مامند و حاجی نەبی لەوێ ئامادەییان هەبوو، دوو چەكی جۆری ” بڕنۆ ” و ” تفەنگێكی دیموقرات “ی بە دیاری پێشكەشی باپیرمی كرد، بۆیە ئەو خزمەت و خەبات و رێبازەی ئێمە ئێستە لەسەری دەڕۆین، لە باب و باپیرانمەوە بۆمان ماوەتەوە.
ئاشكراشی دەكات:” لە ساڵی 1970 بارزانی نەمر كە ئەوكات لە باڵەكایەتی نیشتەجێ بوو، ئاگاداری خانەوادەی ئێمەی كردەوە ئەگەر كوڕەكانی شێخەكت لە ژیان ماون، با بێنە لام، ئەوكات بابم ” ئەحمەد شێخەكت ” لەگەڵ مامەكانم چوونە لای بارزانی نەمر، داوای لێكردن چەك وەرگرن و لە ریزەكانی شۆڕشی ئەیلوول ببنە پێشمەرگە، ئەوكات بابم وەك سەرلق لە نێو شۆڕش لەگەڵ عەریف یاسین دەستبەكاربوو.
عەمید رەشید خواكوڕكی فەرماندەی فەوجی سیدەكان لە هێزی خەبات، ئاماژەشی بەوەدا:” لە دووای ئەوەی چەكی پێشمەرگایەتیمان هەڵگرت، بەشداری هەموو جەنگ و شەڕێكم كردووە كە نەیار و دوژمنانی كوردستان هێرشیان كردبێتە سەر دەڤەری برادۆست و ناوچەكانی دیكەی كوردستان، لەو ماوەیەدا كە خەباتی پێشمەرگایەتیمان كردووە، پۆلێك لە خزم و كەسەكانم و ئەو خەڵكەی لەگەڵم بوونە شەهید بوون و ژمارەیەكیشیان برینداربوونە، لە شەوی 13 – 9 – 1997 لە دەشتی هێرت بە سەختی برینداربووم، هەر ئەوكات دوو پێشمەرگە و دواتریش خوارزێكم بە ناوی “محەمەد عەزیز” شەهید بوو، دووای وەرگرتنی چارەسەری، هێشتا برینی گولەی بەر جەستەم كەوتبوو بەباشی ساڕێژنەببوو، لە نەخۆشخانە هاتمە دەرەوە و لە نێو تازیە بووم، ئەوكاتیش سەرۆك بارزانی هاتبووە سیدەكان و ئاگاداریان كردمەوە داوای بینینی من دەكات، چوومە خزمەتی لە میحوەری سیدەكان، رەمەزان دۆسكی، حەمید ئەفەندی، ئەنوەر حاجی عوسمان، هەڵگۆرد زاهیر، ئەنوەر كۆلیت، تەها خواكوڕكی، هەریەك لە سیداد بارزانی و نیهاد بارزانیش لەوێ ئامادەییان هەبوو، كە چوومە ژوورەوە سەرۆك زۆر رێزی گرتم، بە شێخ نیهادی برای كە لە تەنیشتی دانیشتبوو فەرمووی، با رەشید خواكوڕكی بێتە تەنیشتم دابنیشێت و پێی گۆتم، ئەوكاتەی برینداربووی لەسەر خەت بووم و زۆر پێم ناخۆش بوو، باسی خانەوادەی ئێمەی كرد و بە خەباتگێڕ و قارەمان وەسفی كردین.
لە درێژەی قسەكانیدا، خواكوڕكی، ئەوشی خستەڕوو:” دووای ئەوەی لای سەرۆك گەڕامەوە نێو تازیەی خوارزامان كە شەهید ببوو، سەرۆك بارزانی لە ئێمە تێپەڕی و ئاگادار نەبوو كە تازیەمان هەیە و بەرەو سۆران دەگەڕایەوە، لە رێگادا لە نزیك سەری بەرد لە نێوان سۆران – سیدەكان، باسی ئەوەی بۆ كرابوو كە تازیەی پێشمەرگەیەك هەیە، جەنابی سەرۆك توڕەدەبێت و لە سەری بەرد راستەوخۆ گەڕایەوە و لە سەربیش بەشداری تازیەی ئێمەی كرد، بە شێوەیەكی گشتی نزیكەی 10 جار لەگەڵ سەرۆك بارزانی دانیشتوومە و قسە و گفتووگۆم لەگەڵ جەنابیان كردووە و رێزی زۆری لە خانەوادەی ئێمە گرتووە.
ئەو فەرماندە سەربازیە، ئاشكراشی دەكات:” سنووری برادۆست هەزاران كەسی پێشمەرگەیە و كۆمەڵێك فەرماندەی چاونەترس و قارەمانی لێیە كە هەریەكەیان خاوەنی خزمەت و خەباتی زۆرە بەشێكیان لەپێش ئێمەش بوونەتە پێشمەرگە، بەگشتی توانایان تێدایە ناوچە سنووریەكانی خۆیان بەباشی بپارێزن و بەرگی لێبكەن، هاوكات هەر ناوچەیەكی دیكەی كوردستانیش پێویستی بە ئێمە و پێشمەرگەی ئەو دەڤەرە هەبێت، ئامادەینە گیانی خۆمان بۆ پارێزگاری لە خاك و خەڵكی كوردستان بكەینە قوربانی، خەڵكی دەڤەرەكەمان مەرد و شەڕكەر و راست و رەوانن، لەگەڵ هەر لایەنێك بن بە راستی لەگەڵی دادەبن و نازانن خیانەت بكەن، هیچ كات دەستی دوژمنیان نەهێناوەتە نێو خاكی خۆیان و نەبوونەتە لایەنگری ئەو حزب و هێزانەی كە نەیاری كوردستانن، هەر ناوچەیەك پێشمەرگە و هێزی سیدەكانیش لێ بووبێت كە جیا لە خەڵكی برادۆست، خەڵكی ناوچەكانی دیكەش لە هێزی سیدەكان فەرماندە و پێشمەرگە بوونە و شەهیید و قوربانیشیانداوە، ئەگەر بە بڕیار و فەرمانمان پێكرابێت، ئەگەرنا شوێن بەردان و چۆڵكردن بە شەڕ، لە ئێمە هیچ كات رووینەداوە، بۆیە لە كۆبوونەوەیەكدا سەرۆك بارزانی لە بابشتیان كە سەرجەم بەرپرس و فەرماندەكانی میحوەری سیدەكان بەشداربوون، فەرمووی” كلیلی سەركەوتنی پارتی، میحوەری سیدەكان بوو، ئەم قسەیە بۆ ئێمە هەمیشە جێگەی شانازیە.
فەرماندەی فەوجی سیدەكان، دەڵێت:” شەڕ كردن لەگەڵ تیرۆرستانی داعش شەڕێكی سەخت بوو، پێشمەرگەكانی فەرماندەی هەڵگۆرد بە گشتی و هێزی سیدەكانیش بە تایبەتی بەو پەڕی ورە بەرزی و خاك و نیشتیمانیان پاراست و تا دووا هەناسە بەرگریان كرد و مێژوویان تۆمار كرد، بەداخەوە پۆلێك لە هاوسەنگەرانمان بە دەستی تیرۆرستانی داعش شەهید و برینداربوون.
رەشید خواكوڕكی لە ساڵی 1959 لە ناوچەی خواكوڕك لە دەڤەری برادۆست لەدایكبووە، خۆی و 11ی كوڕی پێشمەرگەنە و نزیكەی 70 كەسوكاری پێشمەرگەنە، لە خانەوادەیەكی دڵسۆزن، جیا لە برینداربوونی خۆی، ژمارەیەك لە كەسە نزیكەكانی شەهید و بریندار بوونە و كوڕێكیشی بە ناوی”رەشاد”لە شەڕی داعش برینداردەبێت، ئەمە لە كاتێكدایە یەكێك لە كوڕەكانی دیكەشی، بە ناوی”جێگر”بۆ پاراستنی كوردستان رەوانەی كۆبانێ كرد، قۆناخ بە قۆناخ پلە و پایەی پێشمەرگەیاتی بڕیووە و ئێستاش جیا لەوەی كەمئەندامی سەنگەرە، وەكو فەرماندەی فەوج لە هێزی خەبات لە دەڤەری برادۆست دیاری كراوە”.