زاری كرمانجی-سۆران
فەرمانگەی میدیا و زانیاری بڵاوی كردەوە: ” لە چوارچێوەی هەوڵە بەردەوامەکان بۆ دابینکردنی ئاسایشی خۆراک و بەهێزکردنی ژێرخانی ئابوری، حکومەتی هەرێمی کوردستان هەنگاوی گەورە و ستراتیجیی لە کەرتی کشتوکاڵدا ناوە، تەنیا لە ماوەی ساڵی ڕابردوودا 2% قەبارەی وەبەرهێنان گەشەی كردووە و بە تێكڕا لە ماوەی كابینەی نۆیەمدا، ئەم ڕیژەیە لە 1.8%ـەوە بۆ 12% بەرز بووەتەوە.
قۆناغی نوێ لە پەرەپێدانی سایلۆکان
بۆ پاراستنی گەنم و بەرهەمی ناوخۆیی، پڕۆژەی دروستکردنی 4 سایلۆی نوێ، كە هەریەكەیان توانای کۆگاکردنی 40,000 تۆن گەنمیان یان هەیە و تێكڕا دەكاتە 160 هەزار تۆن گەنم و بە گوژمەی 90 ملیار دینار جێبەجێ کراون، سایلۆی قوشتەپە لە هەولێر بە گوژمەی 21 ملیار، سایلۆی کەلار لە سلێمانی بە گوژمەی 21 ملیار، سایلۆی ڕۆڤیا لە دهۆک بە گوژمەی 20 ملیار و سایلۆی هەڵەبجە بە بەهای 28 ملیار دینار دروست كراون.
هەروەها لە پلانی حکومەتدایە چەند سایلۆیەكی دیكە لە دهۆک، زاخۆ، کفری، کۆیە و هەریر دروست بكات و بەمەش ئاسایشی خۆراك و پاراستنی بەرهەمی دانەوێڵە، دەچێتە قۆناغێكی نوێ و سەقامگیرترەوە.
گەشەی کەرتی پیشەسازی و بازرگانیی کشتوکاڵی
لە چوارچێوەی گەشە و پاراستنی ئاسایشی خۆراكدا 13,943 کۆمپانیا، 1,341 کارگەی جۆراوجۆری پیشەسازی و 30,000 خانووی پلاستیکی بۆ بەرهەمهێنانی بەروبوومی كشتوكاڵی لە وەرزە جیاوازەکاندا و 319 کۆگای ساردکەرەوە بۆ پاراستنی بەرهەمەکان دروست كراون.
تێكڕای ئەم گەشەسەندنە وایان كردووە بەروبوومی جووتیاران و بەرهەمی کارگە ناوخۆییەکانی کوردستان بە ڕێژەیەکی بەرچاو بۆ ناوەڕاست و خوارووی عێراق بنێردرێت، کە قەبارەکەی بە سەدان هەزار تۆن مەزەندە دەکرێت، هەروەها بۆ یەکەمینجار بە دەیان هەزار تۆن بەروبوومی جووتیارانی کوردستان، هەناردەی بازاڕەکانی کەنداو و جیهان کرا.
هەرێمی کوردستان هەنگاوەكانی بەرەو خۆبژێوی و کەمکردنەوەی پشتبەستن بە هاوردەکردن خێراتر كردووە و ئەمەش داهاتوویەکی گەشتر بۆ جووتیاران و هاووڵاتییانی هەرێمی كوردستان مسۆگەرتر دەکات.
