محەممەد مەحموود- سۆران:
لەنێو ئاماری بنكەی ژیانەوەی نوێ بۆ پشكنینی خوێنی هاوسەران ڕێكەوتی جوان ڕۆڵ دەبینێت بۆ بەرزبوونەوەی ئاماری هاوسەرگیری، ئەو مانگانەی لە ساڵدا ڕێكەوتی سەرنج ڕاكێشی تێدا بێت هاسەران هەوڵدەدەن مارە بڕین و گواستنەوە ئەنجام بدەن.
مانگی ٦ یەكێكە لەو مانگانەی چەند ڕێكەوتێكی جوانی تێدایە و ئەوانەی لەم ماوەیە دەچنە نێو پڕۆسەی هاوسەرگیرییەوە ئارەزوویانە یەكێك لەو ڕۆژانە هەڵبژێرین بۆ مارەبڕین بێت یان هاوسەرگیری، ڕێكەوتەكان ئەمانە ئەمڕۆ ، ٦-٦-٢٠٢٦، هەروەها ١٦-٦-٢٠٢٦، لەگەڵ ٢٦-٦-٢٠٢٦ بەپێی بەدواداچوونەكانی زاری كرمانجی لە ئارایشگاكانی سۆران ئەمڕۆ زۆرترین خانم بۆ ڕۆژی مارەبڕین و هاوسەرگیری نۆرەیان گرتووە.
لای خۆیەوە وریا محەممەدئەمین، ڕاوێژكاری كیمیایی و بەڕێوەبەری بنكەی ژیانەوەی نوێ بۆ پشكنینی خوێن، بۆ زاری كرمانجی ئاماژەی بەوەدا” لەنێو ئاماری هاوسەرگیری ئەو مانگانەی لە ساڵدا ڕێكەوتی سەرنج ڕاكێشیان تێدابێت، وادەكات ئامار زیاتر بێت، بەشێك لەو كەسانەی دەچنە نێو پڕۆسەی هاوسەرگیری دەیانەوێت لەو ڕێكەوتە جوانانە پرۆسەی هاوسەرگیری ئەنجام بدەن.
خاوەنی یەكێك لە ئارایشگەكانی سۆران، بە زاری كرمانجی راگەیاند” ئاماری جوان داواكاری ئافرتانی لەسەرە، ئەمڕۆ ٢٤ ئافرەت لای ئێمە نۆرەیان گرتووە بۆ ڕازاندنەوە بۆ مارەبڕین و هاوسەرگیری، لەگەڵ ئەوەی چەند ئافرەتێكی تر داوایان كردووە نەمان تووانیووە نۆرەیان بۆدابنێنین.
خاوەنی ئارایشگایەكی تر لە سۆران بۆ زاری كرمانجی گوتی: ئەمڕۆ ١٩ ئافرەت لای ئێمە نۆرەیان گرتووە، جگە لەو ئافرەتانەی كە لە گەڵیان هاتوون.
