سەردەمی گووتاری حەماسی كۆتایی هاتووە

ئیسماعیل ئیبراهیم
گووتاری هاندان بۆ ئاراستەی بە لاڕێدا بردنی شەقام كۆتایی هات، ئێستا تێڕوانینی هاووڵاتییان بە بەراورد كردنی بە چەند ساڵی رابردوو گۆڕانی جۆری بەسەردا هاتووە، ئاوەدانكردنەوە و بەرەو پێش بردنی هەموو سێكتەرەكانی ژیان لە هەرێمی كوردستان بە گووتاری حەماسی ناشاردرێنەوە، هەر وەك چۆن بەشێك لە كەموكورتییەكانی هەندێك بوار پەردەپۆش ناكرێن و كاریان لەسەر دەكرێن.
گووتارەكانی هەندێك بەرپرسی یەكێتی نیشتمانی كوردستان لە كەناڵەكانی راگەیاندن و نێو جەماوەر ئەوەندە كلاسیكین هەست دەكەی لە سەردەمی شاخن، بیریان چۆتەوە ئەو جۆرە گووتار دانانە كۆتاییان هاتووە، خەڵك هەم چاوی هەیە و هەمیش عەقڵ، بە چاوی خۆیان دەبینن یەكێتی چی بەسەر سلێمانی، هەڵەبجە، گەرمیان و رانیە هێناوە، هێزە مافیاكانیش دەبینن چۆن بەربوونەتە داهاتی ئەم وڵاتە لە خاڵە سنوورییەكانی پارێزگای سلێمانی، بە پێی ئەو راپۆرتانەی لە كەناڵەكانی راگەیاندن بڵاوبۆتەوە زۆرترین پارە بۆ سلێمانی نێردراوە كەچی كەمترینی كراوەتە پڕۆژە و لە بانكەكان نامێنن، بۆیەش ئێستا بەشێكی زۆری كۆمپانیاكان و وەبەرهێنەرەكان خۆیان لە ئەنجامدانی پڕۆژەكانی زۆنی سەوز دەپارێزن، تەنها ئەو پڕۆژانە نەبێت كە حیسابی ژمێریارییان لە هەولێرەوە بۆ خەرج دەكرێت، وێڕای ئەو دۆخە خراپەی بەهۆی سیاسەتی چەوتی یەكێتی بەسەر هاووڵاتییان هاتووە، كەچی بۆ تەسفییەی حیساباتی كەسی لە سلێمانی دەست لە هیچ ناپارێزن، ئەگەر رێگرییان لێ نەكرێت هەمان رەفتاری قێزەوونیش لە هەولێر و شارەكانی دیكەش دەكەن، نموونەی هەرە بەرچاومان كوشتنی موراد كانی كوردەیی و كردەوە تیرۆرستییەكەی هەولێرە.
جگە لەمانەش هەمیشە بۆ بەدەست خستنی پۆست و پلە و پارە كۆسپیان بۆ دۆخی سیاسی هەرێمی كوردستان دروستكردووە، داوا كردنی ژمارەیەك سەركردەی یەكێتی لە حكومەتی عێراق بۆ بڕینی مووچە و بوددجەی هەرێمی كوردستان لە لایەك و داوا كردنی جیاكردنەوەی سلێمانی لە هەرێمی كوردستان لە لایەكی دیكە، سەرباری هەمووشیان خیانەتی 16ی ئۆكتۆبەر كە تا مێژوو هەیە وەك پەڵەیەكی رەش باسی لێوە دەكات.
یەكێتی بەم گووتارە وێرانە حەماسییە كلاسیكییە دەیەوێت وای وێنا بكات غەدرێكی زۆری لێ كراوە، بۆیەش دەیەوێت هەموو ئەو نەهامەتییانەی بەسەر هاووڵاتییان لە سنووری دەستەڵاتی ئەوان هاتووە، بخاتە ئەستۆی پارتی و خەوشەكانی خۆی پێ بشارێتەوە، هەموو جاریش بە دەست بەتاڵی لەم جۆرە پیلانانە دێتە دەرەوە.
تا ئێستاش ئەو برادەرانەی بە ناوی یەكێتی قسە دەكەن یا لەسەر یەكێتی حیسابن، جیاوازی ململانێی سیاسی و حزبی لە گەڵ پاراستنی بەرژەوەندییە باڵاكانی نەتەوەیی كورد و كوردستانیان تێكەڵ كردووە، هەرگیز ناشێ یەكێتی و پارتی كە دوو حزبی جیان و خاوەن دوو دیدگا و رۆئیای جیاوازن بۆ بەڕێوە بردن، لە هەموو پرسەكان هاوڕا و تەبا بن، بەڵام كارێكی نالۆژیكییە و ژیرانەش نییە بەرژەوەندییە باڵاكانی كوردستان و هەرێم بكرێنە قوربانی ویستی لایەنێك، واتە ململانێی سیاسی و حزبی تا ئەو شوێنە رێگە پێدراوە كە نەچێتە چوارچێوەی دروستكردنی مەترسی بۆ كیانی سیاسی باشووری كوردستان.
كێشەكە ئەوەیە برادەران تا ئێستا تێنەگەیشتوون گووتاری (ستۆپ بە پارتی دەكەین)، یا (ئیتر قبوڵی ناكەین)، یا (هەڕەشەی دوو ئیدارەیی كردن) پارتی نالەڕزێنێت و چیتریش خەڵك بەم گووتارانە ناڵێن ئامین، تەنها ئەو كەسانە نەبن كە بەرژەوەندییان لە ئاژاوەیە، یا پیاوی بێگانە و دوژمنانن.
هاووڵاتی بەچاوی خۆی دەبینێت چ گۆڕانكارییەكی جۆری لە هەرێمی كوردستان هاتۆتە ئاراوە، رۆژ لە دوای رۆژ هەم دۆخی ژیانی خەڵك بەرەو باشتر دەڕوات، هەمیش ژێرخانی هەمەچەشنەی وڵات دەبووژێندرێتەوە و بنیاد دەندرێت.
بۆیە پێویستە كۆتایی بەم گووتارە بریقەدارە كلاسیكییە بهێندرێت.