زاری كرمانجی :
فراكسیۆنی پارتی دیموكراتی كوردستان لە پەرلەمانی عێراق، زیادكردنی بڕگەیەكی بۆ بەرنامەی كاری كۆبوونەوەی پەرلەمان بە “پێشێلكاریی ئاشكرای دەستوور” و مادەكانی پەیڕەوی ناوخۆ ناو برد. فراكسیۆنەكە رایدەگەیەنێت كە ئەو هەنگاوە دژی پرەنسیپی كۆدەنگیی سیاسییە و بە تەواوی رەتی دەكەنەوە.
رۆژی سێشەممە، 17ـی شوباتی 2026، فراكسیۆنی پارتی دیموكراتی كوردستان لە پەرلەمانی عێراق، لە راگەیەنراوێكدا ناڕەزایەتیی توندی خۆی بەرانبەر بە ڕێڕەوی كۆبوونەوەی پەرلەمان دەربڕی و جەختی كردەوە كە شێوازی زیادكردنی بڕگە بۆ بەرنامەی كار بە ڕوونی پێچەوانەی بڕگەكانی مادەی (37/دووەم)ی پەیڕەوی ناوخۆی پەرلەمانە.
فراكسیۆنەكە ئەو هەنگاوەی بە “پێشێلكارییەكی ئاشكرای دەستوور” و لێدان لە “كۆدەنگیی سیاسیی نێوان پێكهاتەكان” وەسف كردووە.
لە بەشێكی دیكەی راگەیەنراوەكەدا هاتووە: “رەتكردنەوەی یەكجارەكیی خۆمان بۆ ئەو پێشێلكارییە رادەگەیەنین كە بووەتە هۆی تێكدانی رێككەوتنە سیاسییەكان، ئەمەش دژی پرەنسیپی كۆدەنگی و هاوسەنگییە لە پرسی یەكلاكردنەوە و دانانی پۆستە باڵاكانی دەوڵەتدا”.
فراكسیۆنی پارتی دیموكراتی كوردستان، رەخنەی توندی لە شێوازی بەڕێوەبردنی كۆبوونەوەی پەرلەمان لە لایەن سەرۆكی پەرلەمانەوە گرتووە و هۆشداریی داوە لە دووبارەبوونەوەی ئەو شێوازە كاركردنە.
هاوكات فراكسیۆنەكە جەختی كردووەتەوە: “بونیاتنانی دەوڵەت لە رێگەی قۆرخكردنی بڕیارەكان و پەراوێزخستنی مافی پێكهاتەكانەوە بە دی نایەت”.
هاوكات، فەرهاد ئەمین ئەترووشی، جێگری دووەمی سەرۆكی پەرلەمان لە راگەیەندراوێكدا بە توندی دژی شێوازی بەڕێوەچوونی دانیشتنەكەی رۆژی سێشەممەی پەرلەمان وەستایەوە و ڕایگەیاند، تێپەڕاندنی پۆستی سوپاسالار بەو شێوەیە “پێشێلكارییەكی زەقە” و پەنا بۆ دادگا دەبەن.
لە راگەیەندراوەكەدا هاتووە، “سەرەڕای ئەو دۆخە سەختەی عێراق و ناوچەكە پێیدا تێدەپەڕێت، سەرۆكی پەرلەمان هەنگاوێكی نا كە دۆخەكە زیاتر ئاڵۆز دەكات، ئەویش بە پەلەكردنێكی گوماناوی لە دەنگدان لەسەر هەندێك لە پلە تایبەتەكان.”
ئەمەش لە كاتێكدایە، عەبدولئەمیر یارەڵڵا كە پێشتر بە وەكالەت پۆستی سوپاسالاری عێراقی وەرگرتبوو لە كۆبوونەوەی پەرلەماندا، بەفەرمی بە سوپاسالاری عێراق هەڵبژێردرا، لە كاتێكدا پۆستەكە پشكی كوردە.
