ئەڤین بارزانی
ساڵانە لەگەڵ هاتنی وەرزی بەهار، سروشت لە جوانترین ئاستیدایە و ملیۆنان کەس بەدوای دەرفەتدا دەگەڕێن بۆ ئەوەی ئەزموونی ئەو جوانیانە بکەن، بەڵام هاوکات لەگەڵ ئەم هاتن و چوونە، بەرپرسیارێتییەکیش لەسەر شانمان هەیە، کە پاراستنی سروشت و پاک ڕاگرتنی ژینگە، لەم وەرزەدا پەرشوبڵاوی دار و گوڵی ڕەنگاوڕەنگ دەبینین و جوانییەکانیان سەرساممان دەکات، بەڵام دوای تەواوبوونی گەشتە گەشتیارییەکان، ڕەنگە شوێنە سروشتییەکان ببنە دۆخێکی پڕِ لە پاشماوە، لێرەدایە کە ئێمە وەک ئەندامانی کۆمەڵگەی ناوخۆیی دەتوانین بەرپرسیارێتی لە ئەستۆ بگرین.
چەندین ڕێگا هەیە بۆ پاراستن و پاک ڕاگرتنی سروشت، لە نێو ئەم شێوازانەدا دەتوانین ئاماژە بە پەروەردەی پەیوەست بە کۆکردنەوە و فڕێدانی پاشماوەکان بکەین بە شێوەیەکی دروست، ئەنجامدانی بۆنەی وەک ڕۆژانی پاککردنەوەی سروشت، هاندانی بەکارهێنانی بەرهەمە دووبارە بەکارهێنراوەکان، لە لایەکی دیکەوە بەشداری چالاکانەی گەشتیارانیش زۆر بەنرخە، بە ڕێزگرتن لە ژینگە و ئاگاداربوون لە کاریگەرییە نەرێنییەکانی ئیکۆسیستەمەکان، دەتوانین یارمەتیدەر بین لە پاراستنی سروشت و دروستکردنی ژینگەیەکی تەندروست بۆ نەوەکانی داهاتوو، بەهار دەرفەتێکە بۆ ئەوەی هەمووان بیربخەینەوە کە پاراستنی سروشت و پاک ڕاگرتنی ژینگە بەرپرسیارێتییەکی هاوبەشە، ئەمەش یارمەتیدەرمانە بۆ چێژوەرگرتن لە جوانییەکان و لە هەمان کاتدا بەشداری بکەین لە پاراستنی،کۆکردنەوەی زبڵ، هەنگاوێکی گرنگە بۆ پاراستنی ژینگە یەکێک لە گەورەترین ئاستەنگەکان کە ئەمڕۆ ڕووبەڕوومان دەبێتەوە، بەڕێوەبردنی دروستی پاشماوەکانە، ڕۆژانە بە ملیۆنان تەن پاشماوە بەرهەم دەهێنرێت.
ئەگەر بە باشی بەڕێوەنەبرێت، زیانی قەرەبوو نەکراو بە ژینگە و سروشت دەگەیەنێت، بۆیە کۆکردنەوەی زبڵ و خاشاک یەکێکە لە کارە گرنگەکان کە هەموو کەسێک دەتوانێت بەشداری تێدا بکات، گرنگی کۆکردنەوەی پاشماوە لە بەرنامەکانی پاراستنی ژینگەدا حاشا هەڵنەگرە، بە کۆکردنەوەی پاشماوە، ڕێگری لە دەردانی ماددە پیسبووەکان دەکرێت بۆ ناو ژینگە و ئەگەری پیسبوونی خاک و ئاو کەم دەبێتەوە، جگە لەوەش بە ڕیسایکلکردنی پاشماوە و دووبارە بەکارهێنانەوەی سەرچاوەکان دەتوانین سامانە سروشتییەکان بپارێزین و ژینگە بپارێزین، یەکێک لە ڕێگا کاریگەرەکانی کۆکردنەوەی زبڵ و خاشاک بریتییە لە ئەنجامدانی ڕۆژانی پاککردنەوە و کۆکردنەوەی گشتی.
لەم بۆنانەدا خەڵک دەتوانن خۆبەخشانە زبڵ و خاشاک لە شوێنە گشتییەکان کۆبکەنەوە و یارمەتی پاک ڕاگرتنی ژینگە بدەن. هەروەها پەروەردەکردن سەبارەت بە جیاکردنەوەی سەرچاوە دووبارە بەکارهێنراوەکان و ڕێگا دروستەکانی فڕێدانی پاشماوە دەتوانێت یارمەتی خەڵک بدات بۆ ئەوەی باشتر کاربکەن لە بەڕێوەبردنی پاشماوەدا، بە کورتی کۆکردنەوەی زبڵ و خاشاک یەکێکە لە ڕێکارە سەرەتاییەکان لە ڕێگەی پاراستنی ژینگە. بە بەشداری هەموو لایەک دەتوانین ژینگە لە پیسبوون ڕزگار بکەین و ژینگەیەکی تەندروست و پاک بۆ نەوەکانی داهاتوو دابین بکەین.
