رۆژگار موحسین
ڕۆژنامەنووسان، پێشكەشكارانی بەرنامەكان و دروستكەرانی ناوەڕۆك لە تۆڕە كۆمەڵایەتییەكان ڕۆڵێكی كاریگەر دەبینن لە دروستكردنی هۆشیاریی گشتی. كاریگەریی ئەوان تەنها لە گواستنەوەی هەواڵ یان پێشكەشكردنی خۆشگوزەرانی نییە، بەڵكو دەگاتە كاریگەری لەسەر ڕەفتار، بەها كۆمەڵایەتییەكان و كولتووری كۆمەڵگا، بە تایبەتی لە نێو گەنجاندا.
لەبەر ئەوە، هەڵبژاردنی جلوبەرگ و دەركەوتنی دەرەوە لە میدیادا نابینرێت تەنها وەك بابەتێكی كەسی، بەڵكو بەشێكە لە پەیامی میدیایی كە دەگاتە جەماوەر. زۆرجار كەسایەتییە میدیاییەكان دەبنە نموونەیەك بۆ شوێنكەوتن، و ئەمەش بەرپرسیارییەكی زیاتر دەخاتە سەر شانیان بەرامبەر بەو كۆمەڵگایەی قسەی بۆ دەكەن.
لە چوارچێوەی مافی مرۆڤدا، كارمەندانی بواری میدیا مافی ئازادیی دەربڕین و هەڵبژاردنی شێوازی دەركەوتنی خۆیان هەیە، بەبێ جیاكاری یان سووكایەتی. بەڵام لە هەمان كاتدا، بەكارهێنانی ئەم مافانە پەیوەستە بە بەرپرسیارییەكی پیشەیی و ئەخلاقی كە تایبەتمەندی و بەها كولتوورییەكانی كۆمەڵگا و هەست و سۆزی جیاوازی تاكەكان ڕەچاو دەكات.
گفتوگۆ دەربارەی جلوبەرگ یان شێوازی دەركەوتن لە میدیادا دەبێت لە چوارچێوەی ڕێزگرتن و دیالۆگی بابەتی بمێنێتەوە، دوور بێت لە تانەدان، سووكایەتی و تۆمەتباركردنی كەسان. هەروەها ڕەخنەی دروست ئەوەیە كە سەرنج بخاتە سەر پەیام و كاریگەریی كۆمەڵایەتی، نەك شكاندنی كەرامەت و مافەكانی تاك.
سەركەوتنی میدیا تەنها بە ژمارەی بینەران یان شوێنكەوتووان پێوانە ناكرێت، بەڵكو بە توانای لە دروستكردنی هاوسەنگی لە نێوان ئازادیی پیشەیی و بەرپرسیاریی كۆمەڵایەتیش پێوانە دەكرێت. میدیای هۆشیار ئەو میدیایەیە كە مافی مرۆڤ ڕێز لێدەگرێت، بەها ئەرێنییەكان بەرز دەكاتەوە و نموونەیەكی پیشەیی پێشكەش دەكات كە لەگەڵ كولتوور و ئامانجەكانی كۆمەڵگا هاوتا دەبێت، بەبێ دەرخستن یان جیاكاری.
