رێبوار حەمەلاو شوانی
بەدرێژایی خەبات و تێكۆشانی پارتی دیموكراتی كوردستان بە ڕابەرایەتی بارزانی لە دوێنی و ئەمڕۆ بەرامبەر بە ڕژێمە یەك لە دوای یەكەكانی عێراق زۆر قورس و بەرپرسیارانە بووە، بە شێوەیەك باوەڕ وابووە بە بێ چەسپاندنی دیموكراسی لە عێراق ئەستەمە بتوانرێت مافەكانی گەلی كورد بەدی بهێنڕێت، بۆیە شەڕ و خەباتی پارتی و بارزانی لە پێناو چەسپاندنی دیموكراسی و ئاشتی بووە، هەر ئەوەش بوو ناكۆكییەكان كوردستان و عێراق بۆ ڕەتكردنەوەی دیموكراسییەت و مافەكانی گەلی كورد بووە و بۆیە هەرگیز سازشی لە سەر مافەكانی گەلی كورد و بستێك خاكی كوردستان نەكردووە.
هەر بۆیە، پارتی دیموكراتی كوردستان بە سەرۆكایەتی بارزانی، ڕۆڵی گرنگ و كاریگەریی لە ڕووخانی ڕژێمی دیكتاتۆری و دواتر بەشداریكردنی ڕاستەوخۆ لە نووسینەوەی دەستوور هەبووە ، لە پێناویشدا نەك تەنها پێداگری لەسەر مافەكانی گەلی كورد ، بەڵكو مافی هەموو پێكهاتە نەتەوەیی و ئایین و ئایینزاكان كردووە و لەو پێناوەشدا هەمیشە لەسەنگەری پێشەوەی بەگریكردن بووە دیموكراسی و ئازداری و پێكەوەژیان و چەسپاندنی هاوسەنگی و سازان و هاوبەشی.
پارتی و بەرپرسیاریەتی مێژوویی لە شەشەمین خولی هەڵبژاردنەكانی پەرلەمانی عێراق :
ئاشكرایە ، هەڵبژاردنی ئەمجارەی ئەنجوومەنی نوێنەرانی عێراق لە رەوشێكی سەخت و هەستیار وپڕ ئاڵنگارییدا بڕیارە بەڕێوە بچێت ؛ چاوەروان دەكرێت بەغدای ئەمجارە جیاوازی هەبێت لەگەڵ بەغدا 20ی ساڵی رابردوو ؛ بۆیە گرنگی ئامادەبوونی پارتی دیموكراتی كوردستان بەهێز و قورساییەكی زۆرەوە ، بەدڵنییاییەوە مەترسیی و كێشەكان لە سەر داهاتوویی گەلەكەمان و مافەرەواكانی ، لەڕووی پێشێڵكردنی مافە دەستوورییەكانی پارێزراوتر دەبێت ، بەتایبەتی كە پارتی تاكە هێزی كاریگەرە كە رژدە لە سەر جێبەجێكردنی دەستوور و بنەماكانی فیدڕاڵی ، سازان ، هاوبەشی ، سازان
لەم روانگەیەوە ، بەهێزی پارتی لە هەر كاتێكی تر دا گرنگترە ، چونكە ڕووبەڕووی شەڕێكی گەورە لە ناو پەرلەمانی عێراق دەبێتەوە لە پێناو پارێزگاریكردن لە مافە دەستوورییەكانی خەڵكی كوردستان ، بەتایبەتی ماددەی 140ی دەستووری هەمیشەیی وەك چۆن پارتی هەردەم هێزێكی كاریگەری بووە لە جەنگ و ململانێ ، ئەو هێزە گەورەیە ، بێ سڵكردنەوە هەمیشە شانی داوەتە بەر سەختییەكان و بەرپرسیارییەتەكان تا هەموو مافەدەستورییەكانی دەستبەر بكات ، هەروەها ماف و شایستە داراییەكانی تر ، كە مێژوو سەلمێنەرە پارتی لەسەنگەری پێشەوەیە بۆ بەرگریكردن لەمافەكانی گەلی كورد و هەموو پێكهاتەكانی دیكە كە چەندین ساڵە لەلایەن دەسەڵاتدارانی بەغداوە نكۆڵی لێدەكرێت .
پارتی و بارزانی هەوڵدان بۆ بەدیموكراسیكردن و هاوبەشیكردنی عێراقێكی نوێ :
هەوڵەكانی پارتی دیموكراتی كوردستان لە عێراقی نوێ و لەماوەی 22 ساڵی رابردوودا ، بۆ بونیاتنانی عێراقێكی دیموراسی بوو تا كو هەموو گەل و پێكهاتەكانی ناویدا ، ئەوانەی كە دەیان ساڵ بوو مافەكانیان زەوتكرا بوو و ڕووبەڕووی دڕندانەترین هەوڵی ستەمكارانە ببوونەوە لە ناو عێراقێكی نوێدا زامنی مافەكانیان بكرێت بەتایبەتی گەلی كورد و هەموو پێكهاتەكانی تر كە پارتی هێزی كاریگەری داكۆكیكاری ئەو مافانەیە ،پارتی هەمیشە ئامانجی بوو گشت هێزە سیاسییەكانی كوردستان بە یەكدەنگ و ڕێكبخات ، تاكو بەهێزەوە بەرگریی لەمافەكانی كوردو هەموو پێكهاتەكانی تر بكەن ؛ بۆیە، پارتی بەلیستی 275 لەبەردەم ئەركێكی قورس و بەرپرسیاریەتی گەورەدایە لە بەغدا ، چونكە هێزێكی كاریگەری ومتمانەپێكراوە خەڵكی كوردستان ، بۆیە ، دەنگدان ومتمانەبەخشینی خەڵكی كوردستان بە پارتی ، وادەكات ،لە عێراق بەڕێگەی شەڕێكی دەستوور ویاسایی بۆ مافەرەواكانی خەڵكی كوردستان و هەموو پێكهاتەكانی تر بكات ،چونكە ئەوەی بەرگری لە ماف و دەسكەوت و قەوارەی هەرێمی كوردستان دەكات تەنها پارتی دیموكراتی كوردستانە
پارتی ، هێزی رژدە بۆ زامنی جێبەجێكردنی مادەی 140ی دەستوور و گەڕاندنەوەی بۆ باوەشی كوردستان :
پارتی دیموكراتی كوردستان ، جیاواز لە هەموو لایەنەكانی تر ، شانی داوەتە بەر ئەم ئەرك وبەرپرسیاریەتییە قورسە لە بەغدا و لەمێژە شەڕی یاسایی و دەستووری دەكات ، لە لایەن بەهێزكردنی سەنگ وپێگەی هەرێمی كوردستان و لەلایەكی تریشەوە ، فەراهەمكردنی ژیانێكی پڕ خۆشگوزەرانی بۆ خەڵكی كوردستان ، بۆیە هەڵبژاردنی ئەمجارەی پەرلەمانی عێراق ، پارتی بەهێزەوە دەچێتە بەغدا لە پێناو جێبەجێبوونی گشت بڕگەكانی مادەی 140ی دەستوور و گەڕاندنەوەی بۆ باوەشی كوردستان و فەراهەمكردنی سەقامگیری ئابووری و كۆمەڵایەتی لەو ناوچە كوردستانییانەی كە چەندین ساڵە داگیركراون
بۆیە، ئەمڕۆ پارتی بە لیستی 275 و بەهێزەوە ئەو شەڕە دیموكراسییە دەكات لە پێناو سەركەوتنی سیاسی بۆ مافەرەواكانی گەلەكەمان و چیتر كێشەكان بە هەڵپەسێراوی نەمێنێتەوە و مافە دەستوورییەكانمان نەكەونە بەر هەڕەشە و مەترسیی و چیتر مووچە و بودجە وەك چەكێك وئامرازێك بۆ سەر خەڵكی كوردستان دروست دەكرێت ؛ گرنگە هەموو كوردێك بە بێ دووڵی دەنگ و متمانەی بۆ ئەو هێزولایەنە بێت كە زۆر بەرپرسیارانە و كوردپەوەرانە لە خەمی نیشتیمانەكەی ومافەرەواكانی خەڵكەی بێت ؛ ئەوەش فاكتەری سەرەكییە بۆ سەقامگیری سیاسی و بایەخی زۆریشی دەبێت بۆ سەنگ و پێگەی هەرێمی كوردستان لە سەر ئاستی عێراق و ناوچەكە و نێودەوڵەتی .
