دیدار-مستەفا دۆڵەمەری
بەڕێوەبەری كارگەی زۆم، لە دیدارێكی زاری كرمانجیدا باس لە گرینگی دامەزراندنی كارگەكە دەكات و تیشك دەخاتە سەر كواڵێتی و خۆماڵی بەرهەمەكانیان و ڕەخساندنی هەلی كار بۆ سەدان هاووڵاتی.
شەهرام سەعید ناوخۆش، بەڕێوەبەری كارگەی زۆم، بە زاری كرمانجی راگەیاند: لە پێناو خزمەت گەیاندن بە خەڵك و ڕەخساندنی هەلی كار بۆ هاووڵاتییان و برەودان بە بەرهەمی ناوخۆیي، كارگەی زۆم لە سنووری قەزای مێرگەسۆر، لەسەر راسپاردەی سەرۆك بارزانی، لە ژێڕ سەرپەرشتی راستەوخۆی مەلا مستەفا بارزانی دامەزراوە، سەرۆك بارزانی بەردەوام جەختی لەوە كردۆتەوە كە پێویستە گوندنشینان هان بدرێن پشت بە خۆیان ببەستن و خۆیان سوود لە توانا خۆماڵییە مرۆیەكان و سامانە سروشتییەكانی كوردستان وەرگرن، ئەم كارگەیەش زۆر پێویست بوو بۆ خەڵكی دەڤەری بارزان، چوونكە لە رابردوودا خەڵكێكی زۆر كێشەی ساخكردنەوەی بەرهەمەكانیان هەبوو و بۆیە كارگەی زۆم بووە هۆكارێك بۆ ئەوەی كە چیتر ئاژەڵدار و گوندنیشینانی ئەو ناوچەیە گلەیی ساخبوونەوەی شیرەكەیان نەكەن.
گووتیشی: ناوی زۆم بۆ ئەو كارگەیە لەوە دێت ناوێكی رەسەن و كوردەوارییە، بەو شوێنە دڵرفێنە دەگوترێت كە ئاژەڵداران لە كوێستانەكان ڕەشماڵەكانیان لێ دادەنێن جێگیردەبن، ئەو شوێنەی كە ئێستا كارگەی زۆم لێیەتی لە رابردوودا چەندین داستان لێی تۆماركرداوە و چەندین شەهید دراون لەو شوێنە بۆیە زیاتر لەبەر ئەو هۆكارەش بە پێویست زانرا لە شوێنەكە كارگەی شیرەمەنی دابنرێت.
بەڕێوەبەری كارگەی زۆم، دەشڵێت: لە پێناو كەمكردنەوەی تێچووی گواستنەوەی شیر و ئەركی سەر شانی ئاژەڵداران، هەڵساین بە دامەزراندنی تۆڕێكی بەرفراوانی بنكەكانی كۆكردنەوەی شیر لە سنووری هەردوو پارێزگاری هەولێر و پارێزگای دهۆك و ئیدارەی سەربەخۆی سۆران، كە بریتین لە ٢٥ بنكە كە بەپێی سنووری جوگرافی و لەسەر داواكاری ئاژەڵداران دامەزراون و ٣ بنكەی دیكەش لە دەڤەری باڵەكایەتی و دەشتە هێرت و ڕواندز، تا كۆتای مانگی هەشت دەكەونە خزمەت هاووڵاتییان و لە ڕێگەی ئەم بنكانەوە كۆمپانیای زۆم ڕۆژانە شیری تازەی مانگا لە ئاژەڵداران دەكرێت و لەم پرۆسەیەدا ٢،٧١٢ دوو هەزار وحەفت سەدو دوانزە، خانەوادەی گوندنشین و ئاژەڵدار سوودمەند بوونە و بۆتە سەرچاوەیەكی داهات بۆیان و بەرهەمەكانی ئەو كارگەیە بریتین لە ماست و ماستاو، قەیماغی لولپێچی خۆماڵی و پەنیری سپی، پەنیری كەم چەوری و ماستی سروشتی كەم چەوری.
شەهرام سەعید، دەشڵێت: كارگەی زۆم بۆتە هۆی كەمكردنەوەی ڕێژەی بێكاری و بەرزكردنەوەی هێزی كاری ناوخۆیی بە شێوەیەك كە هەلی كاری بۆ ٣٢٨ هاوڵاتی رەخساندووە وەكو كارمەندی خۆماڵی كاردەكەن، لە هەموو شتێك گرینگتر و جیاوزتر لە پڕۆژەكانی تر ئەوەیە كە داهاتی ئەم كارگەیە بۆخزمەتگوزاری و پێداویستیەكانی دەڤەرەكەیە و بۆ دروستكردنی چەندین كارگەی دیكە لە داهاتوودا.
ئاماژەی بەوەشدا: لە پێناو پارێزگاریكردن لە تەندروستی هاووڵاتییانی كوردستان، كارگەی زۆم لە سەرەتای پڕۆسەی كۆكردنەوەی شیر تا گواستنەوەی بۆ ناو كارگە و دروستكردنی بەرهەم و ناردنیان بۆ بازاڕ، پابەندە بە هەموو ڕێنماییە تەندروستیەكان بۆ بەرهەمهێنانی بەرهەمی %١٠٠ سروشتی و خۆماڵی، كارگەی زۆم مۆڵەتی لە لایەن وەزارەتی تەندروستی حكوومەتی هەرێمی كوردستان بەدەست هێناوە و هەموو بەرهەمەكانی زۆم بە شێوەیەكی بەردەوام لە تاقیگەكانی بەشی چاودێری تەندروستی و سەلامەتی خۆراك پشكنینی تەندروستیان بۆ دەكرێت و دوای دەرچوونیان لە پشكنین دەخرێنە بازار و دەگەنە دەست هاووڵاتییان.
ئەوەش دەخاتەڕوو: كاركردنی كۆمپانیای زۆم بە ستانداردە نێودەوڵەتییەكان بۆتە هۆی بەدەستهێنانی (٣) بڕوانامەی ئایزۆی نێودەوڵەتی كە بریتین لە (9001 ISO – سیستەمی بەڕێوەبردنی جۆری، 22000 ISO – سیستەمی بەڕێوەبردنی سەلامەتی خۆراك، 45001 ISO – سیستەمی بەڕێوەبردنی تەندروستی و سەلامەتی پیشەیی، ئەم بڕوانامانە دوای جێبەجێكردنی كۆمەڵێك ڕێكاری پێویست و لە ژێر چاودێری و پشكنینی لێژنەیەكی پسپۆر بە كۆمپانیای زۆم بەخشراون. هەروەها بەهۆی بەرزی كوالێتی بەرهەمەكانی زۆم و خزمەتكردن و پاڵپشتی كردنی گوندنشینان و ئاژەڵداران و پێشكەشكردنی بەرهەمێكی سروشتی و تەندروست، لە ساڵی ٢٠٢٤ كۆڕبەندی بازرگانی نیشتیمانی عێراقی (INTF) لە بۆنەیەكدا كە لە لایەن ناوەندی بازرگانی نێودەوڵەتی (ITC) و بە پاڵپشتی یەكێتی ئەوروپا (EU) ڕێكخرابوو، بەرهەمەكانی زۆم وەك باشترین بەرهەم لە عێراقدا هەڵبژێردران و خەڵاتی یەكەم بۆ بەرپرسیارێتی كۆمەڵایەتی (Social Responsibility) بە كۆمپانیای زۆم بەخشرا.
دەشڵێت: كۆمپانیای زۆم وەك پڕۆژەیەكی نیشتیمانی گرنگ و بە بەها، لە ڕێكەوتی ٢٠٢٥/٥/٣١ وەكو باشترین بڕاندی نێوخۆیی لەسەر ئاستی كوردستان و عێراق خەڵاتی كۆتلەری بردەوە، كە بردنەوەی ئەم خەڵاتە داننانە بە دەستكەوتە ناوازەكانی زۆم لە ڕووی بەڕێوەبردن و بەرهەمهێنان و خزمەتكردن بە كۆمەڵگە، هەروەها چیرۆكی سەركەوتنی زۆم چووە نێو پەرتووكی جیهانی “بنەماكانی بازاڕگێڕی هاوچەرخ” كە بە بەشداری بەڕێز فیلیپ كۆتلەر نووسراوە.
كارمان لەسەر ئەوە كردووە كە بەرهەمەكانی ئەو كارگەیە هەناردەی وڵاتانی دەرەوە بكەین و تەواوی ئامادەكاریكانمان كردوون و سەرجەم رێكارەكانمان ئەنجام داون و لە ماوەیەكی نزیكدا بەرهەمەكانی كارگەی زۆم هەناردەی وڵاتانی دەرەوە دەكرێن.
لە كۆتای قسەكانیدا، شەهرام سەعید ناوخۆش، بەڕێوەبەری كارگەی زۆم، گووتی: بە پێویستی دەزانین سوپاسی مەلا مستەفا بارزانی بكەین بۆ دروستكردنی ئەو كارگەیە، كە خزمەتێكی زۆری بە گوندنشینان و جوتیاران و ئاژەڵدارانی دەڤەرەكە گەیاندووە و تاكە كارگەی قازانج نەویستە، واتە تاكە كارگەیە كە زۆرترین هاووڵاتی لێی سوودمەند بووە.
