د.سانع شەریف، مامۆستا لە فاكەڵتی یاسا و زانستە سیاسییەكان لە زانكۆی سۆران، بۆ زاری كرمانجی گوتی: ئەگەر هەر لایەنێكی سیاسی دوای هەڵبژاردن بڕیاری بەشداری نەكردن لە پەرلەمانی هەرێمی كوردستانی بدات، دەتوانرێت چەند هەنگاوێكی یاسایی و ڕێكارانە بنرێت لەسەر بنەمای یاسا و چوارچێوەی هەڵبژاردن كە هەرێمی كوردستان بەڕێوەدەبەن، بەتایبەت یاسای هەڵبژاردنەكانی هەرێمی كوردستان و پەیڕەوی ناوخۆی پەرلەمانی كوردستان، گۆڕینی ئەندامان بەڕێوەدەبەن و باس لە دەستلەكاركێشانەوە یان بەشدارینەكردنی نوێنەرانی هەڵبژێردراو لە حزبە سیاسییەكان دەكەن.
دەشڵێ: ئەگەر كاندید دەست لەكار بكێشێتەوە یان ڕەتی بكاتەوە لە پەرلەمان سوێندی یاسایی بخوات ، ئەوا دەكرێت لە چوارچێوەی یاسای هەڵبژاردنی پەرلەمانی كوردستان ژمارە (١)ی ساڵی ١٩٩٢ و دوایین هەمواركردنی حەوتەم بە ژمارە (١٥)ی ساڵی ٢٠١٣، كە هەڵبژاردنەكانی خولی شەشەمی بەڕێوە برد مامەڵەی لەگەڵ بكرێت. بەپێی مادەی ٦١ برگەی سێیەم لەبەشی حەوتەم تایبەت بە حوكمە جیاجیاكان لە یاساكەدا “لە حاڵەتی سوێند نەخواردنی كاندیدانی هەڵبژێردراو بۆ پەرلەمان لە ماوەی ٩٠ رۆژ لە مێژووی ناوبراو مافی ئەندامێتی نامێنێ و كاندیدێكی دیكە بەپێی یاسا شوێنی دەگرێتەوە”.
د.سانع شەریف، مامۆستا لە فاكەڵتی یاسا و زانستە سیاسییەكان لە زانكۆی سۆران، جەختیشی لەوە كردەوە: ئەگەر ئەندامانی حزبێكی سیاسی ڕەتیانكردەوە بەشداری بكەن، ئەوا كاندیدی داهاتوو لە هەمان حزبدا دەتوانێت جێگەی ئەوان بگرێتەوە، بەڵام كاتێك حزبە سیاسیەكە بیەوێت بە فەرمی بایكۆتی پەرلەمان بكات و ئەندامانی بۆ سوێند خواردن نەنێریت ئەوا كورسییەكە بە بەتاڵی بمێنێتەوە بەپێی مادەی ٦١ی بڕگەی یەكەمی یاساكە، ئەمەش ئەوكات بەندە بە چۆنیەتی بڕیاردانی پەرلەمان بۆ لێكدانەوەی ئەم حاڵەتە، بۆیە ئەوكات پەرلەمان بەپێی مادەی ١٣ برگەی ٢ی پەیڕەوەكەی مامەڵەی لەگەڵ دەكات كە دەڵێت: “ئەگەر كاندیدی هەڵبژێردراو، بەبێ پاساوی ڕەوا، لە دانیشتنی یەكەمەوە بۆ ماوەی 30 رۆژ لە پەرلەمان سوێندی نەخوارد، مافی سوێندخواردنی یاسایی نامێنێت”، بەمەش كۆمیسیۆن بەربژێرێكی دیكە لە جێگەیان ڕادەسپێرێت بۆ جێگرتنەوەیان كە لەسەر بنامەی زۆرترین دەنگ شوێنی ئەو بەربژێرانە پڕدەكرێتەوە كە بایكۆتیان كردووە، لەلایەكی تریشەوە ئەگەر كشانەوەی دوو حیزبە سیاسیەكە كاریگەرییان لە سەر نیسابی یاسایی پەرلەمانی كوردستان هەبێت لەوكات دەكرێت پەرلەمان دەستوەردان بكات بەلام بەوپێیەی ئەو حیزبە سیاسیانە بچووكن كاریگەرییان لەسەر نیسابی یاسایی پەرلەمان نیە ئەوا وا دەخوازرێت كورسییەكانیان لە پەرلەمان تەنها پڕبكرێنەوە
