رواندز بە بەرگێكی نوێوە پێ دەنێتە قۆناخی دووەم

وەرزش ـ زاری كرمانجی:

ئەنجامە نەخوازراوەكانی قۆناخی یەكەمی خولی یانە پلە یەكەكانی كوردستان بۆ رواندزییەكان مایەی نیگەرانی بوو، چونكە قەدەر ئەوانی لەدوا پلەی ریزبەندی گیركرد.
رواندز، لەقۆناخی یەكەم لەكۆی 8 یاریی 4 یەكسانبوون و 4 شكستی هەبوو، بە چوار خاڵ دوا یانەكەی خولەكە بوو.
لەدوای تەواو بوونی قۆناخی یەكەم بەرپرسانی رواندز بەخێرایی كەوتنە جوڵە و گۆڕانكاری گەورەیان ئەنجامدا.
دەستەی كارگێڕی یانەی رواندز، ئەركی سەرپەرشتیكردنی یانەكەیان بەخشیە فازڵ عەباس، راهێنەری خودان ئەزموونی كوردستان لەشوێنی ستافی پێشوو دەستبەكاربوو.
هاوكات پتر لە 8 یاریزانی نوێیان هێناوەتە ریزی یانەكە، كە لەنێویاندا پیشگەرێكی ئەفریقی هەیە. دەیانەوێ قەرەبووی ئەنجامەكانی قۆناخی یەكەم بكەنەوە.
رواندز، ئەمڕۆ یەكشەممە كاتژمێر 2:30 ـی دوانیوەڕۆ لەسەر یاریگەی دێڵزیان تایبەت بەیانەی سۆران، رووبەڕووی یانەی بروسك دەبێتەوە.
هۆكاری گواستنەوەی یارییەكانی رواندز بۆ یاریگەی یانەی سۆران، بەهۆی نۆژەنكردنەوەی یاریگەی ”بانەزێوك“ ـو، نەبوونی مەرجە یاساییەكانە لەیاریگەی گەردەگەرد.