زاری كرمانجی – سۆران:
مەردان خدر، بەرپرسی لقی نۆی پارتی، لە وەڵامی هەردوو پەیامەكەی ئەم دواییەی سەڵاحەدین بەهادین و عەلی باپیر كە سەركردایەتیی دوو حزبی ئیسلامیی كوردستان دەكەن، رایگەیاند: بۆ یەك جاریش بێت مونافیق مەبن و لەگەڵ خوای خۆتان ڕاستگۆ بن و ئاوڕێك لە ویژدانی خۆتان بدەنەوە، ئێوە كە ناوێرن باش و خراپ لە یەك جیا بكەنەوە، بۆچی هەموو لایەك وەك یەك تاوانبار دەكەن؟ ئەگەر جورئەتی باسكردنی راستیەكانتان نییە، هیچ نەبێت لە خوا بترسن و بوختان مەكەن.
ئەو بەرپرسەی پارتی ڕوونیشی كردەوە: ”بەس پێمان بڵێن سەرۆكی حكوومەت چی كردووە جگە لەوەی داوای كردووە كۆتایی بە گەندەڵی بهێنن و داوای رادەستكردنی تۆمەتبارانی كردووە و ئامادە نەبووە خەڵك بكوژرێت و بۆ بەرژەوەندیی تایبەتی و حزبی چاوپۆشی لە تاوان بكات؟“
هەروەها پرسیاری ئەوەی لەو سەركردە ئیسلامییانە كردووە: ”ئایا ئێوەش داوا دەكەن لەپێناو بەرژەوەندی و ترسنۆكیی خۆتان بەرامبەر بە دزی و كوشتنی خەڵكی فەقیر و بێدەسەڵات، بێدەنگی هەڵبژێرن و بۆ ئەوەی رۆتینی ژیانتان تێك نەچێت هیچ نەڵێن؟ ئەی باوەڕی ئێوە بە دادپەروەری و شەریعەتی خوا لە كوێیە كە باوكێك لەپێش چاوی كچە شەش ساڵانەكەی لەنێو ئۆتۆمبێلێكدا بكوژن و بسووتێنن و ئێوەش بێدەنگ بن و ئەگەر كەسێكیش داوای دادپەروەری بكات، ئێوە تاوانباری دەكەن بە تێكدانی دۆخی هەرێم؟ یان كە داوای كۆتاییهێنان بە دزی و گەندەڵی دەكرێت، ئێوە بۆچی بە تێكدانی دۆخی هەرێم ناوی دەبەن؟“
بەرپرسەكەی پارتی گوتیشی: ”ئەوەی یەكێتی و جێگری سەرۆكی حكوومەت دەیكەن، ڕاكردنە لە بەرپرسیارێتی و داڵدەدانی تاوانباران و گەورەكردنی كێشەكانە بۆ ئەوەی تاوان بشارنەوە، ئیتر بە كام پێوەر هەردوو لا وەك یەك سەیر دەكەن؟“
