زاری كرمانجی، سەربازە ونەكەی رواندز بەسەر دەكاتەوە

تانیا سۆفی -رواندز:

نزیكەی بیست ساڵە هەموو بەیانییەك لەگەڵ گزنگی خۆردا، ملی رێگا دەگرێت و بەرەو ئەركەكەی دەچێت، ئەو دەزانێت دەیان ئەرك لە چاوەڕوانیدان تا پێیان رابگات. هەر رۆژە و ئەركێكی نوێ هەر ساتە و بەرگێكی نوێ، لە هەموو كوچەیەكی ئەوشارە پیاوێكی بارگاوی لەویقار دێتە بەردیدە، كە ئارەقەی دڵسۆزی نێوچاوانی تەنیوە و، لەدیوێكدا رێنمایی كرێكارەكان دەكات تا بەڕێكی ئەركەكەیان راپەڕێنن.
سەعید قادر مستەفا، ناسراو بە “سەعید قەساب” هەژدە ساڵە بەبێ پچڕان لە شارەوانی رواندز خزمەت بە هاوشاریان دەكات، وەك خۆی دەڵێت: هەر ئەركێكم پێ بسپێرن بەبێ سڵكردنەوە لە ماندوو بوون ئەنجامی دەدەم.
ئەو ئێستا بەڕێوەبەری بەشی خزمەتگوزارییە لە شارەوانی رواندز و، سەرپەرشتی كرێكارەكان دەكات، بەهۆی زۆری ئەركەكانی لە شارەوانی رواندز، ناتوانێت كاری قەسابی بكات، كە پیشەكەی كاری كۆنی خۆی بووە.
سەعید قەساب، گوتیشی: ماوەی 18 ساڵە لە شارەوانی رواندز كار دەكەم ئەو ئەركانەی كە لەلایەن سەرۆك شارەوانی رواندز پێم رادەسپێردرێت ئەنجامیان دەدەم، درێخیم نەكردووە ئەو كارانەی كە كردوومە بریتی بوونە لە بەرید بردن و نەهێشتی زێدەڕۆیی، شۆفێری ئۆتۆمبێلە جیاوازەكانی شارەوانی تەنانەت ماوەی دوو ساڵ كاری شۆفێری “دەمبەڵ”ـم كردووە، چونكە بەشێكی كۆڵانەكانی رواندز سەختن و، ئۆتۆمبێلی گەورەی كۆكردنەوەی زبڵ ناگاتە هەموو شوێنەكان، بۆیە ناچار بووم بە دەمبەڵ زبڵی ماڵان كۆ بكەمەوە.
ئەو كارمەندە ماندوونەناسەی شارەوانی ئامانجەكەی دەخاتەروو و دەڵێ: ئامانجم لە راپەڕاندنی ئەركەكان تەنها خزمەتكردنی ئەو شارەیە و شانازی دەكەم گەر توانیبێتم ببمە هۆی رەزامەندی هاوشاریانم، سەرجەمی ئەركەكانم سەختن، بەڵام ئەو ئەركەی كە ئێستا لەسەر شانمە لە لیژنەی ئابووری قەزای رواندز سەخترین ئەركە كە پێمدرابێت.
سەعید قادر، لە هەمان كاتدا ئەندامی لیژنەی ئابووری قەزای رواندزە، گوتی: سەرپێچی خاوەنی ماركێت، دوكان و چێشتخانەكان و.. هتد، ناتوانم چاوپۆشی بكەم، ئاگاداریان دەكەین و، سەردانی شوێنەكە دەكەم ڕێكاری یاسایی دەگرینەبەر، داوا لە هاووڵاتییانیش دەكەم كاتێك سەردانی دوكانێك یاخود ماركێتێك دەكەن پێش ئەوەی شتومەك بكڕن سەیری ماوەكەی بكەن و، ئاگادارمان بكەنەوە لە هەر حاڵەتێك لەو پێداویستییانەی ماوەیان بەسەر چووە.”
لەدرێژەی ئەم گفتوگۆیەدا لەگەڵ ئێمە، سەعید بەشێكی ئەو بەسەرهاتانە باس دەكات، كە لەماوەی كاركردنیدا بینیویەتی.
سەعید، دەیگێڕێتەوە، لەو ماوەی كە كاری كردووە كە زیاتر لە 18 ساڵ دەبێت، بەسەر هاتی زۆری بینیوە و دەڵێ: جارێكیان دەمبەڵم پێ بوو ئاماژەیەكی لە تەنیشت درا بوو، كە نابێت پێشەوەی قورس بێت نابێت لە نشێو بڕوات منیش كرێكارم لەگەڵ بوون، دەمبڵەكە پێشەوەی پڕ بوو هاوسەنگی تێكچوو منیش چوومە جێگەی زبڵ و خاشاك كە لەسەر لێواری خەرەند بوو لە كاتی فڕێدانی زبڵ هەر هندەم زانی تایەكانی پشتەوەی بڵند بوون بەكرێكارەكانم گوت خۆتان بخەنە سەر دواوە، ئەگەر وایان نەكردبایە ئێستا زیندوو نەمابووم.”
سەعید، بەردەوامی دەدات بە بەسەرهاتەكانی خۆی و دەڵێ: رۆژێكی دیكە بەفرێكی زۆر باری بوو كاتژمێر 4 بەیانی بوو چوومە گەڕەكی “بانە زێوك” هەمووی بەست بوو شۆفەلمان برد تا رێگا بكەینەوە، بەهۆی نەمانی ئستۆپ منیش لە دواوەی شۆفەلەكە خۆم فڕێدایە خوارەوە، ئەو جارەش خوا ژیانی پێدامەوە، لەپاڵ ئەو سەربوریانەدا، دڵسۆزی سەعید بۆ ئەركەكەی تا رادەیەك هەنگاوی ناوە، كە چەندیجار رێزلێنان و شانازی پێدراوە لەلایەن بەڕێوەبەرایەتی گشتی شارەوانییەكان، قایمقامیەت و شارەوانی رواندز”.