“پلان و بەرنامەی باشمان داناوە بۆ زیاتر خزمەتكردنی لاوە بەهرەمەندەكان”

“هونەر و میوزیك سەرەكی ترین خواستی ژیانی من بووە”

محەمەد هەسنانی- سۆران:

بەڕێوەبەری رۆشنبیری و هونەری سۆران، دەڵێت: دوای راگەیاندنی ئیدارەی سەربەخۆی سۆران، لەلایەن سەرۆكی حكوومەتی هەرێمی كوردستان، وەك بەڕێوەبەرایەتی رۆشنبیری و هونەری سۆران، دەستەڵاتەكانمان فراوانتر بووە، بۆ خزمەتكردن بە بواری رۆشنبیری و هونەری لە دەڤەرەكە.
یوسف عومەر، ناسراو بە باپیر رواندزی، بەڕێوەبەری ڕۆشنبیری و هونەری سۆران، بە زاری كرمانجی گوت: هەر لە تەمەنی منداڵیەوە ئارەزووی زۆری هونەر و میوزیكم هەبووە، بەمەش لە ساڵی 1978 دەستم بە كاری فێربوونی ئامێرەكانی موزیكژەنی كرد، دەركەوت كە بەهرە و توانایەكم لەم رووەوە هەیە، دوای ئەوەی بۆ یەكەمینجار لە ساڵی 1979 لە تیپی پاشای گەورەی رواندز رۆڵی خۆم بینیەوە و بەهاوبەشی لەگەڵ بەڕێوەبەرایەتیی چالاكی قوتابخانەكانی هەولێر بەشداریمان لە فێستیڤالی مۆسیقا و گۆرانی كرد، دوای ئەوەش ساڵانە بەشداریم لە كۆنسێرت و موزیك و تۆمار كردنی چەندین گۆرانی هونەرمەندان كرد تا ئێستاش لە پاڵ كاری حكوومیم لەسەر ئەو پیشەیەم بەردەوامم و ئاشنایەتیم لە ژەنینی چەندین جۆر ئامێری میوزیك هەیە.
بەڕێوەبەری رۆشنبیری و هونەری سۆران، دەشڵێت: لە ماوەی دەیان ساڵی رابردوو وەك ئەندامی تیپ و سەرپەرشتیاری چەند گروپێكی میوزیك ڕۆڵی خۆم بینیووەتەوە و بۆ ماوەی هەشت ساڵیش وەك مامۆستای وانەبێژی میوزیك لە پەیمانگەی هونەرە جوانەكانی رواندز وانەی پڕاكتیكی ئامێری پیانۆم دەگوتەوە بۆ ئاشنایی كردنی قوتابییان، هەروەها بەشداریم لە زۆربەی چالاكییە هونەرییەكانی پەیمانگە كردووە، جگە لەوانەش بەشداریم لە دوو كۆنسێرتی تیپی ئۆرگسترای كوردستان كردووە، لەگەڵ بەشداری كردنم لە زۆربەی چالاكییە هونەری و رۆشنبیرییەكانی ئیدارەی سۆران و چەندین چالاكی دیكە، بەگشتی هونەر و میوزیك سەرەكی ترین خواستی ژیانی من بووە و تا كۆتایی تەمەنیشم لەگەڵی دەمێنمەوە.
ئاماژەی بەوەشكرد: چەند ساڵێكە وەك بەرپرسی بەشی رۆشنبیری و هونەری سۆران دەستبەكار بوومە و توانیومە لەم ماوەیەدا چەندین چالاكی جۆراوجۆر ئەنجام بدەم، لەم ساڵەدا دوای هاتنە كایەی ئیدارەی سەربەخۆی سۆران، دەڤەرەكە لە هەموو رووێكەوە بووژانەوەی زۆری بەخۆیەوە بینیوە، بەڕێوەبەرایەتی رۆشنبیری و هونەری سۆران یەكێك دەبێت لەو دەسكەتانەو دەستەڵاتەكانمان فراوانتر دەبێت، بۆ خزمەتكردن بە بواری رۆشنبیری و هونەری لە دەڤەرەكەمان بەتایبەتیش پلان و بەرنامەی باشمان هەیە بۆ پێگەیاندنی گەنج و لاوەكان و زیاتر دەرخستنی تواناو بەهرەكانیان.
بەڕێوەبەری رۆشنبیری و هونەری سۆران، ئەوەشی گوت: بە هاوكاری ئیدارەی سەربەخۆی سۆران چەندین چالاكی هونەری و رۆشنبیری لە پلانان و بەرنامەماندان كە ئەنجامیان بدەین، بۆ ئەوەی بتوانین زیاتر خزمەت بە سەرجەم چین و توێژەكان و ئارەزوومەندانی بواری هونەر و رۆشنبیری بكەین لە دەڤەرەكە، هەروەها چەندین گەنجی خاوەن بەهرە لە دەڤەرەكەمان هەن پێویستیان بە ئاوڕلێدانەوە هەیە تا بەهرە و تواناكانیان بخەنە گەڕ، لەگەڵ ئەوەشدا هەماهەنگی زیاتر لە ناوخۆ و بگرە دەرەوەش دروست بكەین، بۆ ئەنجامدانی چالاكی هونەری و رۆشنبیری هاوبەش”.