مستەفا دۆلەمەری- زاری كرمانجی :
ساڵی رابردوو پەیمانگەی تەكنیكی مێرگەسۆر كرایەوە و قوتابیان لە رێگەی دوو بەشەوە وەرگیران، ئەمساڵ پەیمانگەی ناوبراو كار بۆ كردنەوەی بەشی زیاتر دەكات.
لەمبارەیەوە د. تاڵب محەممەد راگری پەیمانگەی تەكنیكی مێرگەسۆر بەزاری كرمانجی راگەیاند:” ئەم ساڵ پلانمان بۆ كردنەوەی بەشێكی تر هەیە بۆ ساڵی نوێی خوێندن، كە ئەویش بەشی پەرستارییە، بەڵام هەندێ كێشەمان هەیە، بەتایبەت دەبێت وەزارەتی خوێندنی باڵا میلاكێك دابین بكات بۆ ئەوەی بەشەكە بكرێتەوە، بۆیە لە هەوڵداین ئەو كێشانە چارەسەر بكەین و بتوانین ئەمساڵ بەشەكە دەستبەكار بێت لە نێو پەیمانگەكەمان”.
راگری پەیمانگەی تەكنیكی مێرگەسۆر سوپاسگوزاری كابینەی نۆیەمی حكومەتی هەرێمی كوردستان بۆ كردنەوەی پەیمانگە لە سنووری قەزای مێرگەسۆر، گوتیشی:” بوونی ئەم پەیمانگەیە ئاسانكارییەكی زۆری بۆ خوێندكارانی دەڤەرەكە كردووەو لە كۆڵ دووری رێگە و هاتووچۆی زۆری كردوونەتەوە، پێشتر دەبوایە بۆ ئەم مەبەستە بچنە دەرەوەی شار بخوێنن و لەگەڵ كردنەوەی پەیمانگەكە بەشێك لەو خوێندكارانەی وازیان لە خوێندن هێنابوو گەڕانەوە و درێژەیان بە خوێندنی خۆیان دا”،
كردنەوەی بەشی هەنگەوانی پلانی داهاتووی پەیمانگەی ناوبراوە هەروەكو د. تاڵب محەممەد هێمای بۆ كرد.
