پشتیوان كەریم- زاری كرمانجی:
ناسك سەید، نووسەر و توێژەر لە بارەی پەیامەكەی سەرۆكی حكوومەتی هەرێمی كوردستان و ڕێگرییەكانی یەكێتی لە بەرامبەر كارەكانی كابینەی نۆیەم بەو شێوەیە قسە بۆ زاری كرمانجی دەكات و دەڵێت: “هەر لە سەرەتای دروستبوونی كابینەی نۆیەم، یەكێتی نیشتمانی لە ڕێگەی كۆمەڵێك بەرنامەوە كە پێشتر كاری لەسەر كردبوو، هەوڵیدا ڕێگرییەكی تەواو بكات لە دروستبوونی پێكهێنانی حكوومەت، هەر ئەمەش وایكرد كە پێكهێنانی حكوومەت دوا بكەوێت”.
ئەو نووسەر و توێژەرە باس لەوەش دەكات یەكێتیی تەگەرەی خستووەتە بەردەم گەڕاندنەوەی داهاتەكانی ژێر دەستەڵاتی خۆی و دەڵێ: یەكێتی زۆر پێداگری دەكات لەسەر نەگەڕاندنەوەی داهاتەكانی خۆی و فرە باڵەكانی دەیانەوێت داهات بۆ خۆیان و بەرژەوەندی حیزبەكەیان بەكاربهێنن، ئەمەش وایكردووە ڕەوشی ئابووری هاووڵاتییانی ناوچەكە بەرەو خراپی بچێت و شارەكان بێ خزمەتگوزاری بن”.
ناسك سەید، باس لە پەیامەكەی سەرۆكی حكوومەت دەكات و دەڵێ: سەرۆكی حكوومەت لە سەرەتای پەیامەكەیدا باس لەوە دەكات كە ئەو سوێندی خواردووە و بەرپرسە لە هەموو ئەو كارانەی لە ماوەی ئەو چەند ساڵەی كە وەك سەرۆكی حكوومەت دەستبەكاربووە بە یەك چاو سەیری تەواوی هاووڵاتییانی هەرێمی كوردستان بكات، لە ماوەی دەستەڵاتی ئەویشدا كۆمەڵێك پرۆژەی زۆر گرنگ بۆ پارێزگای سلێمانی دەرچووە هەر لە شەقامی 100 مەتری كە یەكێكە لەو پرۆژانەی خزمەتێكی باش بەو شارە دەكات، هەروەها چەندین پرۆژەی كارەبا و ئاوەدانكردنەوە و خزمەتگوزاری لە واری جێبەجێكردندان”.
ناسك لەبارەی كابینەی نۆیەم، گوتیشی: كابینەی نۆیەم ئەوەی لە دەستەڵاتی بێت بە زیاتریشەوە كردوویەتی و توانی بەسەر تەواوی ئەو قەیرانە ماددییانەی ڕووی لە هەرێمی كوردستان كردبوو سەربكەوێت و مووچە بۆ فەرمانبەرانی دابین بكات و ڕەوشی ئابووری پێش بخات و قەرزەكانی سەر كابینەكانی پێشوو لەسەر حكوومەت كەڵەكە ببوو بەشێكی زۆری بداتەوە، شانازییەكانی ئەو كابینەیە ئەوەندە زۆرن ناتوانین باسی هەر هەموویان بكەم، بۆیە گرنگە تەواوی حیزب و لایەنە سیاسییەكانی كوردستان هاوكار و پاڵپشتی ئەو كابینەیە بن كە خوازیاری گۆڕانكاری و بەرەوپێشبردنی وڵاتە”.
