د. مەیادە نەجاڕ
پەیامەکەی سەرۆکی حکومەتی هەرێمی کوردستان، پەیامێکی زۆر روون و شەفافە و پێویستی بەهیچ تەفسیر و تەئویلێک نیە، هەرچی هاوڵاتی هەرێمی کوردستانە و تەنانەت ئەوانەشی لە دەرەوەی هەرێمی کورستانن و تەنها چاودێری دۆخی هەرێم دەکەن دەزانن ئەوەی لە هەرێم بووەتە کێشە سیاسی و حکومڕانی هەرێم, هیچیان لەو پێنچ خاڵەی بەیاننامەکەی سەرۆکی حکوومەت بەدەر نیە، کێشەکانی هەرێم یان کێشە لەسەر دزینی داهاتی بەشێکی هەرێمە بەتایبەت خاڵە سنوریەکانی ناوچەی سلێمانی و گەرمیان یاخود کێشەی تێکەڵاوکردنی کێشەکانی حزبە بە کاری حکومەت، بەڵام بەیاننامەکەی ئەمجارەی حکوومەتی هەرێم لە لایەن خودی سەرۆکوەزیرانی هەرێم پەردەی لادا لەسەر هەموو ئەو ڕاستیانەی کە پێویست بوو هاونیشتیمانیانی هەرێم بیزانن، ئێمە مانان کە دوور و نزیک ئاگاداری راستی کێشەکان بووین، بەڵام هاوڵاتیانی هەرێم بە روونی وەکو ئێستا بۆیان روون نەبوو، ئاخۆ چی دەگوزەرێت، بەتایبەت لەم دیدارەی دوای سەرۆکی یەکێتی نشتیمانی ئەنجامیدا وا خۆی وێناکرد کە هەرچی روودەدات لە هەرێم و زۆنی سلێمانی دەستی یەکێتی تێدانیە و بەڵکو ئەوە پارتیە نایەوێت سلێمانیش وەکو هەولێر و دهۆک پێشبکەوێت و ببێتە شارێک هاوشێوەی هەولێر و دهۆک لەسەر ئاستی عێراق شارێکی پێشکەوتو و سەردەمیانەی لێ دەربچێت و ببێتە جێگای بایەخی گەورە بازرگانانی عێراق وناوچەکە، بە بڕوای خۆم دوای ئەو بەیاننامەی سەرۆکی حکوومەت یەکێتی نشتیمانی لە دوو ڕێگە زیاتری لەبەردەستدانیە، یەکەمیان ئەگەر راست دەکات، داهاتی خاڵە سنووریەکانی زۆنی سلێمانی و گەرمیان بەشێوەیەکی راست و دروست و بەبێ دەست تێوەردانی حزب و چەند کەسێکی باڵادەستی ناوچەکە کۆدەکرێتەوە ئەوا با بێ سێ و دوو کردن و خۆ دزینەوە رازی بێت بە چاودێری کردنی ئەم خاڵە سنووریانە لەلایەن وەزارەتی دارایی و ناوخۆ و پێشمەرگە.
دووەم، ئەگەر حزبی حاکم لە زۆنی سلێمانی کە یەکێتی نشتیمانی کوردستانە وەڵامی ئەو بەیاننامەیە دەداتەوە و وەکو هەمیشە بیەوێت کێشە و شکستەکانی بخاتە ئەستۆی پارتی و کورد گوتەنی(دەستە چەورەکەی بە پارتی بسڕێت) ئەوا دڵنیام هاونشتیمانیان و بەتایبەت خەڵکی بەشەڕەفی سلێمانی چیتر ئەوەیان قبوڵ نیە و قبوڵیان نابێت شارێک بەو هەموو داهات و خاڵە سنوریەوە ببێتە قوربانی دەستی چەند کەسێکی مافیا و نەیەلێت هەرچی خزمەتگوزاری و پێشکەوتنە پێشکەش بەم شارە بکرێت و بۆ هەر داواکاریەکی سادەی وەکو ئاو وکارەبا و ڕێگەوبان خۆپشاندانێک ونارەزایەتیەک ئەنجام بدەن ودواتریش بەدیدارێکی پاڤل تاڵەبانی ڕێگەی ماڵەوە بگرنە بەر و دواتریش لە ڕێگەی بەرنامەی تەلفزیۆنیەوە شکستەکانی خۆی و حزبەکەی بخاتە ئەستۆی حکومەتی هەرێم و پارتی دیموکراتی کوردستان .
