ئەمساڵ تێرمیناڵێكی نێودەوڵەتی لە ئیدارەی سۆران دروست دەكرێت
بەڕێوەبەری گواستنەوەی سۆران: پێویستە خەڵك تەنها ئەو تاكسیانە بەكاربهێنن كە لای ئێمە رێگەپێدراون
پشتیوان كەریم- سۆران:
لە میانەی دیدارێكی هەفتەنامەی زاری كرمانجیدا، بارزان میر عەلی بەڕێوەبەری گواستنەوەی ئیدارەی سۆران، باس لە پلانێ بەڕێوەبەرایەتییەكەیان بۆ ساڵی نوێ دەكات، هەروەها رێژەی نووسینگەكانی گواستنەوە و رێكخستنەوە و میكانیزمی نوێ بۆ شۆفێرانی تاكسی پاس و مینی پاس دەخاتەڕوو، وادەی دروستكردنی تێڕمیناڵێكی نێودەوڵەتیش ئاشكرا دەكات.
لە دەستپێكی قسەكانیدا، بارزان میر عەلی بەڕێوەبەری گواستنەوەی ئیدارەی سۆران، دەڵێت:”پلانی سەرەكیمان بۆ ئەمساڵ زیادكردنی رێژەی تاكسییە لە سەنتەری شاری سۆران، بۆ ئەم مەبەستەش دەبێت بە هاندان و ئاسانكاری كۆمپانیاكانی فرۆشتنی تاكسی كە لقی كۆمپانیاكانیان لە سۆران بكەنەوە و كار بە تاپۆی سۆران بكەن، بۆ ئەوەی ئەوكەسانەی دەیانەوێت كاری تاكسی بكەن لە ئۆڤەرەكانی كۆمپانیاكان سودمەندبن، هەروەها دەمانەوێت رێگە چارەكی كاتی بۆ رێكخستنی كاری گواستنەوەی هاووڵاتییان لەم سنوورە بدۆزینەوە بە میكانیزمێك بۆ ئەو ئۆتۆمبێلانەی ئێستا كاری تاكسی دەكەن بە لۆگۆ یا ئاڕمێك رێكیان بخەین.
بارزان میر عەلی، ئەوەش دەخاتەڕوو:” سەرپەرشتیاری ئیدارەی سەربەخۆی سۆران لیژنەیەكی پێكهێناوە بۆ دەستنیشانكردنی كەم و كوڕی چارەسەركردنی كەرتی گواستنەوە لەم سنوورە، بۆیە ئێمە لەگەڵ قایمقام و بەڕێوەبەری ئاسایشی ناو شاری سۆران و بەڕێوەبەری پۆلیسی هاتووچۆی ناو شاری سۆران، ماوەیەكی زۆرە خەریكی كەم كردنەوەی نرخەكانی گواستنەوەی هێلی قوتابین، كە كارەكان تەواو بوونە تەنها ئەوە ماوە لەم رۆژانە نرخەكانی گواستنەوەی قوتابیان رابگەیێنین.
لە بارەی بەرزكردنەوەی رێژەی پاس و مینی پاسەكان، رونیكردەوە:” ساڵی 2021 تەنها 40 ئۆتۆمبێل جۆری مینی پاس و مینی پاس لەم سنوورە تۆمار كراون، كە كاری گواستەوەی هاووڵاتیانییان دەكرد، بەڵام دووای ئەوەی مەفرەزەكانی هاوبەشی گواستنەوە و پۆلیسی هاتووچۆ چالاكمان كردووە، ئێستا نزیكەی 300ی ئۆتۆمبێلی جۆری پاس و مینی پاس لە شاری سۆران كار دەكەن، هەروەها چوار نوسینگەی گواستنەوەی قوتابیانیش بەفەرمی مۆڵەتی كار كردنیان پێدراوە و لە نوسینگەكان كار دەكەن .
بەڕێوەبەری گواستنەوەی ئیدارەی سۆران، لە بارەی گرفتی تاكسی و رێكخستنەوەی لە گەراجەكان و لەناو شار، گووتی:” دەمانەوێت كار بكەین لە رێگەی كەناڵەكانی راگەیاندن و رۆژ نامەكان و سۆشیال میدیا بۆ ئەوەی خەڵك هۆشیار بكەینەوە كە تەنها ئەو تاكسیانەی بەكار بهێنن بۆ گواستنەوە كە لەلایەن ئێمەوە تۆمار كرابن و ریچگە پێدراوبن، یان رێگە چارەیەكی كاتی بدۆزینەوە بۆ رێكخستنی كاری گواستنەو كەبە میكانیزمێك ئەو ئۆتۆمبیلانەی تایبەت لە سۆران كاری تاكسی دەكەن بە لۆگۆ یا ئاڕمێك رێكیان بخەین.
لە بارەی نوسینگیە تاكسی تەلەفۆنییەوە، ئاشكرایكرد:” لە سنووری ئیدارەی سۆران 16 نوسینگەی تاكسی تەلەفۆنی بوونی هەیە كە 13 یان لە شاری سۆران دوو نوسینگەش لە قەزای رواندز و یەكێكشیان لە خەلیفان هەیە، سەرجەمیشیان لە لایەن وەزارەتی گواستنەوە مۆڵەتی كاركردنیان پێدراوە، كار بە رێنمایەكانی گواستنەوە دەكەن و لە رێگەی لیژنەكانیشمان چاودێری دەكرێن، هەروەها بوونی ئەم نووسینگانەش زەحمەتی زۆری لە سەر شانی ئێمە لابردووە وە كارئاسانی تەواویش بۆ هاوڵاتیانی سنوورەكە دەكات، هاوكات چوار نوسینگەی گواستنەوەی (قوتابی، فەرمانبەر، مامۆستا) بوونیان هەیە كە زیاتر 200 جۆر ئۆتۆمبێلی پاس و مینی پاس كاردەكەن، بە هاوكاری مەفرەزە هاوبەشەكانیش توانیومانە %90ی كۆی ئەو ئۆتۆمبێلانەی كاری گواستنەوە دەكەن مۆڵەتیان پێبدرێت، هەروەها چوار نوسینگەی گواستنەوەی هاووڵاتییان بۆ دەرەوەی ووڵات لە سنووری ئیدارەی سەربەخۆی سۆران هەن كە ئەركیان گواستنەوەی هاووڵاتییانە بۆ ووڵاتی توركیا پابەند نەبوونیشیان بەرێنماییەكانی گواستنەوە نوسینگەكانییان دادەخرێت.
بارزان میر عەلی بەڕێوەبەری گواستنەوەی ئیدارەی سۆران، گووتیشی:” لە پلانمان دایە تا كۆتایی ساڵی 2023 سۆران ببێتە خاوەن تێرمیناڵێكی نێودەوڵەتی و داوامان لە كەرتی تایبەتكردووە بۆ ئەو مەبەستە پڕۆژەشمان پێشكەش كردووە دوای تەواوبووونی هەڵسەنگاندن و كارە رۆتینیاتەكان دەست دەكرێت بە دروستی كردنی تێرمیناڵ و كارەكە لە پلانی ئەمساڵدایە .
ئاماژەشی بەوەدا، بۆ رێكخستنەوەی گەڕاجەكانی ناو شاریش، نوسراومان ئاڕاستەی ئیدارەی سەربەخۆی سۆران كردووە كە شوێنی گونجاو بۆ گەڕاج دەستیشان بكەن تا بتوانین كاری گەڕاجەكانیش رێكبخەینەوە و بەكاری بهێنین، هاوكات داواشمان لەوەزارەتی گواستنەوەو گەیاندن كردووە رێنماییەكانی وەزارەت بۆ ساڵی 2023 هەموار بكرێتەوە و رێنمایەكان بەپێی سروشتی ناوچەكان بن، چونكە بەپێی رێنماییەكان بێت بە هیچ شێوەیەك بۆمان نییە كار لەسەر ئۆتۆمبێلی تایبەت بكەین، بۆیە ئەو ئۆتۆمبێلانەی تایبەتن دەبێت جۆری ئۆتۆمبێلەكانیان بگۆڕن بۆ جۆری تاكسی، وەك بەڕێوەبەرایەتی گواستنەوەی سۆرانیش لە پلانمان دایە سێ نووسینگەی گواستنەوە لە قەزای سیدەكان و دەروازەی نێودەوڵەتی حاجی ئۆمەران و دەروازەی زێت سەر بە قەزای مێرگەسۆر بكەینەوە، بۆ ئەم كارەش پێویستمان بە رەزامەندی وەزیری گواستنەوەدەبێت“.
