بەكر كەریم حەسەن
بەرێوەبەری گشتی/ وەزارەتی پەروەردە ماستەر لە كارگێڕی پەروەردەیی
فەیلەسوف و بیرمەندی ئیتاڵی (نیكۆلا مكیاڤیلی) دەڵێ” هەركاتێك ئامادەكارییەكان گەورە و مەزن بوون، ئەوا هەرگیز قورسی و سەختییەكان گەورە نین”.
لە چەند ڕۆژی داهاتوو ساڵی نوێی خوێندنی (2022-2023) دەست پێ دەكات، هەموو لایەك لە پەروەدە و قوتابخانە و خێزان دەبێ بەوپەری دڵخۆشی و جۆش و خرۆشی خۆیان ئامادەكردبێ بۆ پێشوازی كردن لە ساڵی نوێی خوێندن كە بێگومان هەموو ئامادەكارییەك ووزەیەكی ئەرێنی دەبەخشێت. بۆیە پێویستە سەرەتا لەلایەن بەرێوەبەرایەتی پەروەردەی گشتی پارێزگاكان و پەروەردەی قەزاكان ئامادەكاری پێویست كرابێ و پلان و ساڵنامەی نوێی گشتاندنی بۆ كرابێ بۆ قوتابخانەكان، لەوەش گرنگتر قوتابخانەكانە چۆن خۆیان ئامادەكردووە بۆ پێشوازی كردن بە گوڕ وتین و پلانی نوێ ، سەرەتا پێویستە سەرتاپای قوتابخانە بشۆردرێ هەموو ژوورەكان و ئاودەستەكان و كارگێڕی و گۆڕەپان و مێزوكورسییەكان خاوێن بكرێتەوە و ئامادە بكرین كۆگا پاك بێت، قوتابخانەیەكی پاك و خاوێن و جوان و دڵگیر بێنە پێش چاوان، بئگومان بەرێوەبەری قوتابخانە بەوكارانە هەڵدەستێ بە هاوكاری یاریدەدەرەكانی و بەهەماهەنگی لەگەڵ فەرمانگەی شارەوانی و ئاو یانیش لە پارەی فرۆشگا، پەروەردەی قەزاكان پێویستە بەدواداچوون بكەن و هاوكاریان بكەن لە ئامادەكردنی قوتابخانەكان لە هەموو ڕوویەكەوە، پێش دەستپێكردنی ساڵی نوێ لیژنەكانی پێشوازی كردن لە قوتابیان و دابەشكردنی پەرتووك ئامادەكرابێ و بەرێوەبەر و یاریدەدەر و مامۆستاكان بە دلێكی خۆش و ڕوویەكی گەش و جل و بەرگی فەرمی پێشوازی لە دەست پێكردنی ساڵی نوێ بكەن و كەشێكی پەروەردەیی لە باروگونجاو بڕەخسێنن بۆ قوتابییان.
هەر لە سەرەتاوە پشوو درێژی ودادپەروەری و دانایی بكەنە پڕەنسیپی دەست پێكردنی ساڵی نوێ چونكە قوتابخانە كارگەی بنیاتنان و دروست كردنی تاكی كۆمەڵگەیە و هەرگیز جیاوازی لە نێوان قوتابییەكان نەكەن و قوتابخانە بكەنەماڵی دووەمی هەمووان.
ئەوەی لە سەر كەس و كار و خانەوادەی قوتابییە ئازیزەكان پێویستە دەبێ پێش دەست پێكی ساڵی نوێی منداڵەكانیان ئامادە كردبێ و سەرجەم پێداویستییەكانیان بۆ فەراهەم و دابین كردبێ لە ڕووی جل و بەرگ و جانتا و دەفتەر و قەلەم و پێداویستییەكانی تری قوتابخانە، لەوەش گرنگتر پێویستە كەشێكی هێمن و ئارام و گونجاو بۆ منداڵەكانیان لە ماڵەوە دروست بكەن، چونكە زۆر جار وا بووە خێزان هەموو پێداویستییەكی بۆ منداڵەكەی دابین كردووە، بەڵام بە پێچەوانەوە لە ماڵەوە گرنگی بە ڕەخساندنی كەشێكی ئارام نەداوە بۆ خوێندنی، پێویستە لایەنی دروونی منداڵ لە ماڵ جێگیر و هێمن بێت ئەوەش دەكەوێتە ئەستۆی خێزان بە تایبەتی دایك و باوك نابێ ئەو لایەنە فەرامۆش بكرێ، بۆ منداڵ گرنگە ڕۆژی یەكەم دایكی یان باوكی لەگەڵ خۆی بباتە باخچەی منداڵان یان قوتابخانە پۆڵی یەكەم كەسەرەتا وەردەگیرێ لە ئەنجامدا دڵنەوایی و هێوری دەبەخشێتە قوتابی و لە هەمان كاتیشدا ئاماژەی گرنگیدانی خێزانە بە منداڵەكەیان.
بۆ قوتابییەكانیش لە سەرجەم قۆناغەكانی تر پێویستە بەوپەری دڵخۆشی و گڕوتینەوە پێشوازی لە ساڵی نوێ بكەن، چونكە هەموو دڵخۆشییەك نیشانەی هەبوونی ووزەی ئەرێنییە و پەرۆشی بۆ خوێندن زیاتر دەكات، ئەلێرەوە گرنگە قوتابیەكانمان هەر لە سەرتاوە بە دیدگا و نیگای ڕۆشنەوە بەوپەری پابەند بوون بە رێنماییەكان و خوێندن و دەوام كردن و سەركەوتن و دەرچوون لەو ساڵەدا ڕوو لە قوتابخانەكان بكەن و تەنها و تەنها چاویان لە سەر سەركەوتن و كۆڵنەدان و كۆشش كردن بێت و خۆیان ماندوو بكەن و هەوڵ بدەن، چونكە دەرئەنجام هەموو ماندووبوونێك و هەوڵدانێك بۆ بەرژەوەندی خودی قوتابیەكانە و خودای گەورەش پادداشتی ئەوانە دەكات كە خۆیان ماندوو دەكەن و هەوڵ دەدەن و بەدڵنیایش دەگەن بە ئامانجەكانیان.
