وەرزش ـ زاری كرمانجی:
یاریگەی فەهدی نێو دەوڵەتی لەسعوودییە، باوەش بۆ یاریی كۆتایی جامی سوپەری ئیسپانی دەكاتەوە.
ئەمشەو كاتژمێر 10 بارسێلۆنا و ریال مەدرید، یەكەم یاریی لە ساڵی نوێ ئەنجامدەدەن.
مێرەنگێ، پێش ئەوەی بگاتە فایناڵ، لەڤاڵێنسیای بردەوە بەلێدانی یەكلایكەرەوە، بلوگرانا بەهەمان شێواز بەسەر ریال بێتیس ـدا سەركەوت.
ئەم یارییە بۆ یانە كەتەلۆنییەكە چارەنووساز دەبێت، بەوەی بەگوێرەی پشت بەستن بە هەواڵی سەرچاوە نزیكەكانی بارسا، لەئەگەری شكست هێنان لەم یارییە چاڤی هێرناندێز پۆستی راهێنەرایەتی یانەكە لەدەستدەدات.
دوا چوار یاریی نێوانیان بەهاوسەنگی تێپەڕیوە، بارسێلۆنا دوو بردنەوە و ریال مەدرید ـیش دوو بردنەوەی بەدەستهێناوە.
بۆ ریال مەدرید گرنگیەكی دیكەی هەیە، ئەویش یەكسانكردنەوەی ژمارەی نازناوەكانی ركابەرە مێژووییەكەی بارسێلۆنایە لەم پاڵەوانێتیە. بارسا 13 جار و ریال مەدریدیش 12 جار ئەو نازناوەیان لەباوەش گرتووە.
