“یەكەی نیشتەجێبوون بۆ كەسوكاری شەهیدانی شەڕی داعش دروست دەكرێت”
محەمەد هەسنانی- سۆران:
كەریم كاوە، بەڕێوەبەری گشتی كاروباری شەهیدان و ئەنفالكراوانی ئیدارەی سۆران، لە دیدارێكی زاری كرمانجی دا تیشكدەخاتە سەر بەرنامە و كار و پلانەكانیان بۆ زیاتر خزمەتكردن بە كەسوكاری سەربەرزی شەهیدان. دەشڵێ: یەكەی نیشتەجێبوون بۆ كەسوكاری شەهیدانی شەڕی داعش دروست دەكرێت.
لە بەردەوامی قسەكانیدا كەریم كاوە، دەڵێ: دوای هاتنەكایەو راگەیاندنی ئیدارەی سۆران لەلایەن مەسرور بارزانی، سەرۆكی حكوومەتی هەرێمی كوردستان، دەڤەری سۆران بووژانەوەی زۆری بەخۆیەوە بینیووە لە رووی زیاتر پێشكەشكردنی خزمەتگوزاری بە سەرجەم سێكتەرەكان و كردنەوە و فراوانكردنی بەڕێوەبەرایەتییە گشتییەكان لە ئیدارەی سۆران، لەم چوارچێوەیەدا بەڕێوەبەرایەتی گشتی كاروباری شەهیدان و ئەنفالكراوانی سۆران كرایەوە، سەرپەرشتی سنووری هەر پێنج قەزاكانی (سۆران، مێرگەسۆر، رواندز، چۆمان و سیدەكان) دەكەین و بەهیواین بە هاوكاری لایەنە پەیوەندیدارەكان، بتوانین زۆرترین خزمەت بە كەسوكاری سەربەرزی شەهیدان و ئەنفالكراوان بكەین”.
گوتیشی: كردنەوەی بەڕێوەبەرایەتی گشتی كاروباری شەهیدان و ئەنفالكراوانی سۆران، پاداشتێك بوو بۆ ئەم هەموو شەهید و قوربانیانەی خەڵكی دەڤەری سۆران داویانە، لە شۆڕشە كوردییەكان و پاراستنی قەوارەی هەرێمی كوردستان و ناوچەكە لە دەست دوژمن و داگیركەران، بۆ ئەوەی ئەو دەسكەوتانەی بەدەست هاتوون بپارێزرێن، كابینەی نۆیەمی حكوومەتی هەرێمی كوردستان ڕۆڵی هەبووە لە پێشكەشكردنی خزمەتگوزاری بە هاووڵاتییان و بەردەوامیشە، چاوەڕوانی زیاتریشی لێدەكرێت، كردنەوەی بەڕێوەبەرایەتی گشتی كاروباری شەهیدان و ئەنفالكراوانی سۆران، ئاسانكاری زۆر دروست دەكات، بۆ ئەوەی لەمەودوا لە بری هەولێر لە سۆران ئیش و كارەكان بۆ كەسوكاری شەهیدان و ئەنفالكراوان رایی بكرێت”.
سەبارەت بە پێدانی زەوی بە كەسوكاری شەهیدان بەتایبەتی ئەوانەی تا ئێستا سوودمەند نەبوونە كەریم كاوە، ئاماژەی بەوە كرد: دەڤەری سۆران پێشەنگ بووە لە شەهید و قوربانیدان، هەروەها لە شەڕی دژ بە داعش چەندین كەس گیانی خۆیان بەخشیووە و شەهید بوونە، هەر لەبەر ئەوەشە سۆران نازناوی شاری شەهیدانی پێدراوە، بۆیە كەسوكار و خانەوادەكانیان شایستەی ئەو پەڕی خزمەتكردنن، هەر چەندە هیچ شتێك ناتوانێت قەرەبووی خوێنی پیرۆزی شەهیدان بكاتەوە، بەڵام لەگەڵ ئەوەشدا حكوومەت ئەم بابەتەی بە هەند وەرگرتووە، بۆ ئەوەی بتوانرێت بە هەموو شێوەیەك ئاوڕ لە كەسوكاری شەهیدە سەربەرزەكان بدرێتەوە، لە رووی دابینكردنی زەوی و یەكەی نیشتەجێبوون و مووچە و هاوكارییەكان و خوێندنی بێبەرامبەر بۆ كچ و كوڕانی شەهیدان لە خوێندنگە و زانكۆ و پەیمانگەكان، هەروەها لە ئێستادا لە بەرنامەو پلاندا هەیە پارچە زەوی یان یەكەی نیشتەجێبوون، بۆ كەسوكاری شەهیدانی شەڕی داعش دابین بكرێن و كاری لەسەر دەكرێت”.
لە وەڵامی ئەو پرسیارەی ئایا تا چەند چاكسازی لە مووچەی كەسوكاری شەهیدان كراوە بەتایبەتی ئەوانەی ناشایستەن؟ بەڕێوەبەری گشتی كاروباری شەهیدان و ئەنفالكراوانی سۆران، رایگەیاند: كابینەی نۆیەم یەكێك لە بەرنامە و پلانەكانی چاكسازی بووە لەسەرجەم سێكتەرەكاندا، بەمەش چاكسازیی لە لیستی شەهیدان كراوە و بەردەوامیشە، بەڵام لە وەزارەتی شەهیدان دۆسیەكان جیاوازن، بۆ نموونە شەهیدی سەنگەر و شەهیدی هاووڵاتیی، ئەنفالكراوەكان، زیندانیانی سیاسیی، بۆ ئەمانە لیژنەیەكی چاكسازی هەیە، بۆ یەكلایی كردنەوەی ئەوانەی زیاتر لە مووچەیەك وەردەگرن، یان بە ناشایستەیی خراونەتە ناو ئەو لیستانە، ئەمەش پێویستی بە كاتە بۆ لێكۆڵینەوەی زیاتر لەوانەی دۆسیەكە بەناویانە، بەڵام ئەوەی گرنگە پرۆسەكە بەردەوامە دواجاریش ئەو چاكسازیانە لە بەرژەوەندی گشتین.
بەڕێوەبەری گشتی كاروباری شەهیدان و ئەنفالكراوانی سۆران، نیگەرانی خۆشی دەربڕی لەوەی كە بەهۆی بڕینی بوودجەی هەرێم لە لایەن حكوومەتی عێراق، هاوشێوەی كارو پڕۆژەكانی دیكە حكوومەت نەیتوانیوە هەموو داخوازییەكانی هاووڵاتیانی هەرێمی كوردستان جێبەجێ بكات، بەڵام حكوومەتی هەرێمی كوردستان بەتایبەت كابینەی نوێم، لەم رووەوە كەمتەرخەمی نەكردووە و ئەو پەڕی هەوڵی داوە مووچە و خزمەتگوزاری بۆ خەڵكی كوردستان دابین بكات، گەشبینیشین بەوەی كە لە داهاتوودا بتوانین زیاتر خزمەتی كەسوكاری سەربەرزی شەهیدان و ئەنفالكراوان و زیندانیانی سیاسی بكەین، ئەوە بە ئەركی سەرشانی خۆمان دەزانین، چونكە شەهیدانمان گیانیان كردۆتە قوربانی تا ئێمە ئازاد بین.
