ئیسماعیل ئیبراهیم
بە درێژایی بیست ساڵی رابردوو سنووری ئێدارەی سەربەخۆیی سۆران بەمشێوەیە پڕۆژەی ئاوەدانی بەخۆیەوە نەبینیوە، بۆ هەر ناحیە و قەزایەك دەچی چەندین پڕۆژەی گرنگ لە بواری جێبەجێكردندان.
هەر چەندە ئەنجامدانی هەر پڕۆژەیەك بۆ هاووڵاتییان لە هەر رووێكەوە بێت هیچ جێگەی منەت لەسەر كردن نین و حكومەت وەك ئەركێك جێبەجێیان دەكات، بەڵام لە پەنای ئەم هەنگاوەی حكومەت و ئیدارەی سۆران هاندانیش گرنگە، هاندان بۆ جوانتر كردن و زیاتر خزمەتكردنی دەڤەرەكە، هاندان بە پێشنیاری ستراتیژی و گرنگ، هاندان بە خستنەرووی كەموكورتییەكان لە ئەنجامدانی هەر پڕۆژەیەك، دەشێ لە پەنای ئەم هاندانانەش دەستخۆشی و پێزانین هەبێت، پێزانین بۆ كابینەیەكی زیڕین كە لەوەتەی دەستبەكار بووە، گوڕوتینێكی زیاتر خراوەتە كار بۆ ئاوەدانی، بۆ نەهێشتنی كەم و كورتی، شەفافییەت، بنیاد نانی ژێر خانی پتەوی ئابووری، بە سیستەماتیك كردنی دامەزراوەكان و هەتد….
بە دڵنیاییەوە خواست و حەزی هاووڵاتییان بە ساڵێك ناهێتە دی، لەبەر ئەوەی رۆژ لەدوای رۆژ لە هەموو روویەكەوە گەشە و پێشكەوتن هەیە، بە هەمان ئەندازە پێداویستیش زیاد دەبێت، دۆخی سیاسی ناوچەكە و ئابووری جیهان و عێراق و ئەو گەمارۆیەی لە هەموو لایەكەوە خراونەتە سەر هەرێمی كوردستان رێگری سەرەكین لە ئاوەدانی زیاتر و پێشكەوتن، بەڵام ناشێ لە بیر بكەین بەهەمان ئەندازەش بوونی گەندەڵی و كەسانی هەڵ پەرەست رێگرییەكی دیكەی گەشەی وڵاتن بە هەموو پێوەرەكانەوە.
ئیدارەی سەربەخۆی سۆران بەم هەناسە و هەنگاوانەی هاوێشتوونی دەشێ ببێتە نموونەی زێڕینی ئیدارە سەربەخۆكانی دیكە، لەبەر ئەوەی دۆخی ئیدارەكانی دیكە دەبینین چەندین ساڵە مومارسەی ئەم دەستەڵاتەی خۆیان دەكەن، بەڵام سكاڵای هاووڵاتییان بەرزتر بۆتەوە.
تیمی ئیدارەی سەربەخۆی سۆران، دەبێ رەچاوی ئەم بابەتەش بكەن، كە ناشێ هیچ بابەتێك لە بیر بكرێت بۆ خزمەتكردن و هەموو بوارەكان پێویستە هاوشانی یەكتر بۆ پێشەوە برۆن، ناشێ دار بچێنین بەڵام هۆشیاری پاراستنی بڵاو نەكەینەوە، ناشێ شەقامێك چاك بكەن، بەڵام هۆشیاری هەڵنەكەندن و تاسە دروستكردنی بڵاو نەكەینەوە، ناشێ وەرزش ببێتە جێگەی بایەخ، بەڵام شانۆ و مۆسیقا لە بیر بكرێن، ناشێ ئاو بگەینینە ماڵان، بەڵام هۆشیاری پاراستنی ئاو بڵاو نەكەینەوە، بۆیە گرنگە لە پەنای هەر كارێكی خزمەتگوزاری هۆشیاریش هەبێت، بنیادنانی شار تەنها بە بینایە، شەقام و ستوونی كارەبا نییە، شار كۆمەڵێك تایبەتمەندی و بنەمای هەیە، كە پێویستە رەچاو بكرێت، شار پلانی سەد ساڵەی دەوێت، بۆ هەموو بابەتەكانی پەیوەندار بە ژیان و هەموو چین و توێژەكانی كۆمەڵگە.
بە دڵنیاییەوە ئەم هەموو هەنگاوانەی تیمی ئیدارەی سەربەخۆی سۆران بێ تێبینی و رەخنەش نابێت، رەخنەش یەكێكە لە هۆكارەكانی سەركەوتنی زیاتر و پاڵپشتی بەرەو پێشچوون.
ئێستا لە زۆر روویەوە ئیدارەی سۆران لە سەردەمی زێرینی خۆیەتی، ئەوەش بە پاڵپشتی كابینەیەكی ئەڵماسی.
