لە بانكی خوێنی هەولێر دەیان هەزار یەكەی خوێن وەرگیراوە

شەهلا رەشید- زاری كرمانجی:
د. سانع ئەبابەكر، بەڕێوەبەری بانكی خوێن لە هەولێر، ئامارەكانی ساڵی 2022ی ئاشكرا كرد و بە زاری كرمانجی راگەیاند” ساڵی رابردوو 67536 یەكەی خوێن وەرگیراوە و ئەوەی زۆر دڵخۆشكەرە بۆ ئێمە 50% ی بەخشینە، چونكە هاووڵاتییان بۆ بەخشینی خوێن سەردانی بانكی خوێنیان كردووە، ئەم رێژەیەش كەم نییە، 10 ساڵ پێش ئێستا بەخشینی خوێن كەمبوو، لە 10% بەڵكو كەمتریش بوو، هەروەها لە كۆی خوێن و پێكهاتەی دابینكراو بۆ سەرجەم نەخۆشخانەكانی كەرتی گشتی، 50% زیاتریش بێ بەرامبەر بەخشراوە بە نەخۆشانی تالاسیمیا، تووشبووانی شێرپەنجە، بەشی شتنی گورچیلە و نەشتەرگەری چاندنی جگەر، بەڵام ئەوە جێی نیگەرانییە كەمی رێژەی خوێن بەخشینی ئافرەتانە، كە كەمترە لە 1%، سەرەڕای ئەوەی ساڵانە یەكێتی ئافرەتانی كوردستان، چەند هەڵمەتێكی خوێن بەخشین ئەنجام دەدەن بەڵام رێژەكە هەر ناگاتە ئاستی داخوازی ئێمە.
بەڕێوەبەری بانكی خوێن لە هەولێر، ئاشكراشی كرد:” لە ئێستادا باڵانسی خوێن لە ئاستێكی باش دایە، ئەوەش بە هیممەتی خوێن بەخشان، نزیكەی دوو ساڵە بەرنامەیەكی تۆكمەمان داناوە هاوسەنگیەك بەرجەستە بكەین لە نێوان رێژەی خوێنی وەرگیراو لە خوێن بەخش بەرامبەر رێژەی پێدانی خوێن بە نەخۆش، ئەمەش وای كردووە بانگەوازی بە پەلەمان نەبێت، بەڵام هەڵمەتی خوێن بەخشین بەردەوامە، هەروەها لەماوەی ئەم دوو ساڵەدا بانكی خوێن هەمیشە لە گۆڕانكاری ئەرێنیە، ئەوەی كردوومانە و پێی دڵخۆش بم گۆڕانكاری نەخشەی ئەندازەیی تاقیگەكانە كە زیاتر گونجاوتر بوو بۆ كارمەندان و سەردانیكەرانی بانكی خوێن، دروستكردنی هۆڵێكی شایستە و گەورە بۆ پشووی خوێنبەخش دوای خوێنبەخشین كە زۆر گرنگ بوو، بەڵام ئەوەی لە هەمووی زیاتر گرنگتر بوو بە دیجیتاڵكردنی سیستەمی زانیاری بانكی خوێن بوو، كە لە رۆژی ئاڵای كوردستان بە ئامادەبوونی جەنابی وەزیری تەندروستی و بەرێوەبەری گشتی تەندروستی هەولێر كارا كرایەوە، ساڵی رابردوو لەسەر ئاستی شار و شارۆچكەكان كارمان لەسەر دابین كردنی كیسی فلتەركراو كرد بۆ ئیدارەی سەربەخۆی سۆران، تا نەخۆشانی تالاسیمیای دەڤەرەكە هاوشێوەی شارەكانی تر لە كاتی خوێنبەخشین پارێزراو بن لە هەستیاری، چەند هەنگاوێك نراوە بۆ كردنەوەی بانكی خوێن لە ئیدارەی سەربەخۆی سۆران لە ئایندەدا.