لەسەروبەندی دەنگدان بۆ سەركۆماری عێراق، پارەیەكی زۆر لەلایەن بافڵ تاڵەبانیەوە لە سلێمانییەوە براوە بۆ بەغدا
زاری كرمانجی- سلێمانی:
بافڵ تاڵەبانی پارەی خەڵكی سلێمانی دەباتە بەغدا و كۆشك و زەویی گرانبەهای پێدەكڕێت یان كاری سەفەقاتی جۆراوجۆری پێ دەكرێ، دەشڵێ، پارە بۆ مووچە نییە.
هەر رۆژە و قەیرانێكی نوێ روو لە شاری سلێمانی دەكات، بەتایبەت پرسی دیارنەمانی پارەی بانكەكان، كە بەهۆیەوە ژمارەیەكی زۆری خانەنشین لە سلێمانییەوە مووچەكانیان دەگوازنەوە بۆ هەولێر، چونكە داهاتی ئەو شارە و پارەی خەڵكی سلێمانی لەلایەن بافڵ تاڵەبانییەوە دەبرێتە دەرەوە و لە بەغدا كاری سیاسیی پێ دەكات و كۆشك و زەویی گرانبەهای پێدەكڕێت، هاوكات لەسەروبەندی دەنگدان بۆ سەركۆماری عێراق، پارەیەكی زۆر لەلایەن بافڵ تاڵەبانیەە لە سلێمانییەوە برا بۆ بەغدا بۆ ئەوەی كەمپین و لۆبی بۆ كاندیدی خۆی بكات و دواجار دەنگدانەوەی زۆری لە سلێمانی لێ كەوتەوە و ناچار خەڵكی سلێمانی رژانە سەر شەقامەكان و داوای روونكردنەوەیان لە بافڵ تاڵەبانی كرد، دوای بردنی پارەكانیان دەست كرا بە سووتاندنی دارسنۆبەرەكانی سلێمانی و دواتر دروستكردنی پرۆژەی حزبی و بردنی دووبارە پارەی ئەو پرۆژانە بۆ بەغدا، بۆ دروستكردنی لۆبیی حزبی.
شوان زراری، پەرلەمانتاری پارتی دیموكراتی كوردستان لە پەرلەمانی كوردستان، دیاركرد:بافڵ تاڵەبانی شكستی هێناوە لە ئیدارەدانی حزبەكەی و كۆنترۆڵكردنی ئارامی سلێمانی، لەو رۆژەوە حوكمی وەرگرتووە دزی و تاڵانی و پارە خواردن لە سلێمانی زۆر بووە پارە لە سلێمانییەوە بۆ هەموو شوێنێك دەڕوات تەنیا بۆ حكوومەت نەبێت، بۆ قاچاغ، بۆ ساغكردنەوەی پرسی سیاسی لە بەغدا، بۆ كڕینی ڤێلا، ئەی بۆچی پارە بۆ شاری سلێمانی و خەڵكەكەی نییە؟ خاڵی دواتر، وەك گرووپی مافیا دەستیان گرتووە بەسەر داهاتی سلێمانی و یاری بە پرسی گاز و هاوردە و ناردەكاری بەو شارەوە دەكەن، كەس ناپرسێ كوا داهاتی مەرزەكان؟ كوا داهاتی فرۆشتنی ئەو هەموو شتانە لە سلێمانی و بۆ پارەكە ناگەڕێتەوە بۆ حكوومەت، بۆ ئەوەی بەسەر دابەش بكرێت.
ئەو پەرلەمانتارە، ئاشكراشی كرد: دەبێ روونكردنەوە بدرێت سەبارەت بەوەی ئەمانە چی دەكەن لە بەغدا ئەوەندە هاتوچۆ دەكەن؟ دەیانەوێت بە پارەی سلێمانی چییان دەست بكەوێت لە بەغدا، هەر خۆیان نەبوون داوایان لە بەغدا كرد وەك هەرێمێكی سەربەخۆی مامەڵە لەگەڵ سلێمانی بكات؟ ئەی بۆچی پێیان نەكرا؟ ئەی بۆچی نەیانتوانی تەنانەت لەوبارەوە قەناعەت بە بەغدا بهێنن؟ ئێستا دەیانەوێت بە پارەی خەڵكی هەژار و نەداری سلێمانی چییان لە بەغدا دەست بكەوێت.
لەلایەكی دیكەوە خدر مەنتك، پەرلەمانتاری پارتی دیموكراتی كوردستان لە ئەنجوومەنی نوێنەرانی عێراق بە كەنالەكانی راگەیاندن گوت: ”بافڵ تاڵەبانی بەرپرسیاری یەكەمە لە بردنی سەروەت و سامانی شاری سلێمانی بۆ دروستكردنی لۆبی سیاسی لە بەغدا، ئەو پارەیەی لە سلێمانییەوە بۆ مووچەی خەڵك پەیدا دەكرێت، وەك سەرچاوەی نادیار دەبرێتە دەرەوە و خەڵكیش ناچار دەبێت تەماشای یارییە قێزەونەكانیان بكەن، هەرجارێك كە پارەیەكی زۆر لە سلێمانی دەبرێتە دەرەوە، سیناریۆی جیاواز دروست دەكرێت، ماوەیەك بەهۆی دیارنەمانی پارەی بانكەكانەوە هاتن پرسی هێرشكردنە سەر حكوومەتیان كردە ئامانج، گوایە پارەی سلێمانی نادات، بۆ ئەوەی خەڵك بیری بچێتەوە چییان كردووە، دواتر هاتن سنۆبەرەكانیان سووتاند و زەوییەكانیان كردە پرۆژە، ئینجا هاتن پاكتاوی حسابی سیاسیی ناوخۆیان كرد و گوتیان ئەمە گرووپێكی دیكەی ناو یەكێتی ئەو كارەیان كردووە و ئێمە راستمان كردووەتەوە، دواتر پرسی نەمانی خزمەتگوزاری و شكستی تیمی ئەوان لە حكوومەت و دیارنەمانی پارە لە سلێمانی سەری هەڵدایەوە، هاتن بە سیناریۆی قێزەون و تیرۆكردنی خەڵك لە هەولێر، ویستیان خەڵكی سلێمانی فۆكس لەسەر ئەو پاشاگەردانی و دزی و فزیەیان نەكات.
ئەو پەرلەمانتاری پارتی لە بەغدا، راشیگەیاند: ”چەند ساڵە پارە لەلایەن حكوومەتەوە بۆ پرۆژەكان لە سلێمانی خەرج دەكرێت، بەڵام پارەكە دیار نامێنێت، ئەوەتا رێگای جووتسایدی كەلار بۆ سلێمانی چەند ساڵە كاری تێدا دەكەن، پارەی بۆ خەرج دەكرێت و كەس نازانێت ئەمە چی بوو بۆ تەواو نەبوو؟ پرۆژە هەیە لە سلێمانی زیاتر لە جارێك پارەی بۆ خەرج كراوە، كوان پرۆژەكان ئەی پارەكەی چی لێهاتووە؟.“
گوتیشی: سەرجەم ئەم وێرانكارییانە لە سلێمانی یەكێتی دەیكات و پارەی خەڵكی سلێمانی دەبرێت بۆ بەغدا، بۆ كڕینی دەنگی خەڵك و ڤێلا و خانوو و زەوی، بافڵ تاڵەبانی لێی بەرپرسیار، چونكە ئەو نەیتوانیووە ئیدارەیەكی باشی سلێمانی بكات، ناچار بە دروستكردنی سیناریۆی جۆراوجۆر دەیەوێت خەڵك باسی ئەو بەهەدەردانە نەكات، جیالەوەش، ئەو پارەی لە هەولێرەوە بۆ مووچە دەچێتە سلێمانی، لەوێ دەیانەوێت بە ئارەزووی خۆیان یاریی پێوە بكەن، بەجۆرێك، هەندێك جار مووچەی خەڵك دوادەخەن بۆ ئەوەی لەپشتەوە پاكتاوی حسابیی خۆیانی پێ بكەن، كە لە رێگای بانكەكانیانەوە دەیكەن.
