جەبار عەلی
هەڵبژاردنی كەسایەتیی ساڵ، لەسەر بنەمای كۆمەڵێك پێوەر و پێودانگی زانستی هەمەلایەن و فرەڕەهەند دەبێت، لە هەر بوارێكی جڤاكی، سیاسی، هونەری، وەرزشی و ئەدەبی بێت، دەبێت ناوەندێكی پیشەگەری زانستی باوەڕپێكراوی ناسراوی نێوخۆیی یان دەرەكی بێت، دووربێت لە لایەنگری و تەواو سەربەخۆ و بێلایەن بێت، دەبێت لەو بوارەدا پسپۆری تەواوی هەبێت و جێی متمانە بێ لە هەمانكاتدا ئەو كەسانەی دەنگ دەدەن دەبێت بابەتییانە بیربكەنەوە و دەنگ بدەن و دوور بن لە لایەنگری، لە كوردستان ئەم ناوەندانە بوونییان نییە و تەنانەت لە هەڵبژاردنی كەسایەتیی ساڵ وەك شاجوان و باشترین یاریزان و مامۆستای ئایینی و پەرلەمانتار…هتد شتێكی وا نەبووە، كەوا بێ خەوش بێت، هەرگاڤ بوونەتە جێی قسەلۆكی تۆڕە كۆمەڵایەتییەكان، ئیدی بەكارهێنەری كوردیش بێ سێ و دوو و ڕاست و چەپ دەكەونە وێزەی هەڵبژێردراوەكە، لە سەری ساڵی زاییندا، لەناو پەیج و ئەكاونتە ماستاوچی و بێ خاوەنەكان، هەر كەس و لەلای خۆیەوە، بە گوێرەی بەرژەوەندییە كەسی و حزبی و هۆزگەرایی و شارچێتی، دەیانووسی فلان بەرپرس كەسایەتی ساڵە لە سۆران، بێ ئەوەی هەڵسەنگاندنی بۆ بنەمای شیاوبوون و شایان بوون بزانێت، باشە سەرۆكی ئیدارەی سەربەخۆی بێت یان بەرپرسێكی حزبی خۆجێی سۆران بێت، ئەوەی سەرۆكی ئیدارەی خۆجێی بۆ شار دەكات لە ڕووی پڕۆژەی هەمەجۆری خزمەتگوزاری بۆ ئاكنجیی و هاوشارییان چ منەتێكی تێدایە، لەكاتێكدا ئەنجامدانی پڕۆژەكان ئەركی خۆیەتی و خزمەتگوزارییەكانیش مافی سروشتی هاووڵاتییانن، هێندەی بزانم خودی خۆیشی لەگەڵ ئەمجۆرە پیاهەڵدانە هەڕەمەكییانەی دانییە، ئەگەر بەلای تۆوە، قیرتاو كردنی كوچە و كۆڵانەكانەكانی گەڕەكەكەت هۆكاری ئەوەیە بە باشترین كەسایەتی ساڵی هەڵبژێریت، ئەوە بۆ ئەو هاوشارییەشت دروست و ڕەوایە كەوا هێشتا هیچ خزمەتگوزاریی نەگەیشتۆتە گەڕەكەكەی خراپترین كەسایەتی ساڵ بێت، تەنانەت بەرژەوەندیخوازی وا هەبوو، هەڵبەت ئەمشیان هەر لە تۆڕەكانی كۆمەڵایەتی كەوا وەها پەسنی بەرپرسی حزبی دەكرد و بە شازادەی كارە باش و لەخۆبردووی لە قەڵەم دەدا، كەوا هێشتا خودی بەرپرسەكە دەستبەكارنەبووە! دەشێ كەسێك لای تۆ ئازیز و ڕێزدار بێت، مافی خۆتە لەخۆت خۆشتربوێت، لێ ناكرێ بەناوی كۆمەڵگە بڕیاری چاك و چەوتی كەسەكان بدەیت، كەس ناتوانێت لە باتی من بڕیارێكی وەها بدات، وەك چۆن منیش ناتوانم و بۆم نییە، لە بری تۆ بڕیار بدەم. ئەفسووس دەمێكە هەندێ دەزگای میدیای ئاراستەكراو و سێبەر و حزبی و بەناو سەربەخۆ و بێلایەن…هتد لە ئەنجامی بێباكییان لەو هەموو كێماسی و مەینەتییەكانی ناو كۆمەڵگە و دوور كەوتنەوەیان لە پەیامی میدیا و ئەركی ڕاگەیاندنكار و دووریان لە خواستنی خەڵك و بەكەڵكوەرگرتن لە بەكارهێنەرانی پلاتفۆرمەكانی تۆڕەكانی كۆمەڵایەتی، هەڵدەستن بە ورووژاندنی پرسیارێكی بێمانا، كێ باشترین كەسایەتی ساڵە؟ یان لە ڕۆژی دایكاندا دایكت خۆشتر دەوێت یان باوكت…هتد
تێبینی: سەرپەرشیاری حكوومەتی خۆجێی سۆران بە نموونە هێنراوەتەوە.
