شەهلا رەشید- زاری كرمانجی:
بە گۆتەی هاووڵاتییانی ئیدارەی سۆران، لە دەرمانخانەكانی سۆران و دەورووبەری جیاوازیەكی زۆر بەدی دەكرێت لە رووی نرخەكانی دەرمانەوە، هۆكارەكەشی دەگەڕێنەوە بۆ بازاڕی بەناو ئازاد و داواكارن ئەو جیاوازیانە نەمێنێت و لە ساڵی نوێ نرخەكان یەكبخرێن.
كرمانج فەتاح، بەزاری كرمانجی گووت ” ئاشكراكردنی كۆی رەهەندە فێڵاوییەكانی دونیای بزنس كارێكی ئاسان نییە لە سیستەمی نوێی جیهان هەموو شتێك بووە بە بزنس، كەرتی تەندروستیش بێبەری نییە لەم دونیایە و یەكێك لە رێگا دیار و ئاشكراكان بۆ ئەم پرسە بریتیە لە نرخی دەرمان و پێداویستییەكان لە نۆرینگەكان، نۆرینگەیەك پاراسیتۆڵێك بە هەزار دەفرۆشێت یەكێكی تر بەناوی بڕاندینگ و كواڵێتیەوە بە نرخێكی گرانتر دەفرۆشێت، لە كاتێكدا هیچ شتێك نییە بەناوی براندینگ بەڵكو دەكرێت ئەوەی نرخەكەی جیاوازە زۆر باشتر بێت لەوەی تر، بەڵام بە پێی ئەوەی نۆرینگەكە رێكەوتنی كردوە لەگەڵ مەندۆبی بڕاندەكە كە مەوادەكەی بفرۆشێت بە پێش مەرجی پارەیەكی باش ئەو رووداوە روودەدات، بەپێی میتۆدی بزنس ئەم شتە پێی دەگووترێت ethical busienss واتا ئەخلاقیاتی بزنس، پێویستە لە كەرتی تەندروستیش هەمان ئەخلاقیات دەستی پێوە بگیرێت و كڕیار نەكەنە كەرەستەی جەنگەكانی نێوان كۆمپانیاكان، بۆیە بەكورتی هۆكاری سەرەكی بریتییە لە بابەتی كاری بزنسدا بۆ مەبەستی دەستخستنی پارەی زیاتر.
ئاوات قورتاس، هاووڵاتییەكی دیكەی ئیدارەی سۆرانە، سەبارەت بە نرخی دەرمانەكان لە سۆران، بە زاری كرمانجی گووت” نرخی دەرمانەكان لە هەندێك دەرمانخانەكانی ئیدارەی سۆران تا دێت گرانتر دەبێت و نرخەكان جێگیر نین، هەندێك دەرمانخانە نرخی دەرمانیان بەشێوەیەكی بەرچاو بەرزكردۆتەوە كە ئەمەش بۆ مەرامی بازرگانی خۆیانە، كەچی هەمان دەرمان لە دەرمانخانەیەكی دیكە هەرزانتر دەفرۆشرێن، بەشێك لە خاوەن دەرمانخانەكان بە مەبەستی كوالیتی باش بازرگرانی بە هاووڵاتییان دەكەن و بارگرانیان خستۆتە سەر هاووڵاتییان، بۆیە داوا لە بەرپرسان و سەندیكای دەرمانسازانی كوردستان دەكەین نرخی دەرمانەكان هاوسەنگ بكرێن و چیتر بازرگانی بە خەڵك نەكرێت، هەروەها ئەوانەی پابەند نین و نرخی دەرمان بەرزدەكەنەوە رێگریان لێبكڕێت و سنورێكیان بۆ دابنرێت.
لای خۆیەوە د. كامەران مەلا محەمەد، بەڕێوەبەری گشتی تەندروستی ئیدارەی سۆران، بە زاری كرمانجی راگەیاند” لە سنووری ئیدارەی سۆران لیژنەیەكی توكمەمان پێكهێناوە بۆ ئەوەی هەموو كۆنتڕۆڵی بازاڕی هێنان و بردنی دەرمانەكان و بەكارهێنانیان بكرێت، لە ماوەی دەستبەكار بوونمدا چەند نۆرینگە و سەنتەری پزیشكیمان داخستووە بەشێكیشیان ئاگادار كرانەوە، هەندێك لەوانەش سزای دارایی دراون و هەندێكیش درانەتە دادگا بۆ یەكلای كردنەوەی كەیسەكانیان، گەورەترین ئامانجی ئێمە خزمەتكردنی هاووڵاتییانە بەبێ جیاوازی، چونكە لێرەدا تەنها هاووڵاتی گرنگە بۆ پاراستنیان لە نەخۆشییەكان، بەكارهێنانی دەرمانی باش و لە هەموو روویەكەوە، لەبەر ئەوەی تەندروستی كەرتێكی گرنگە، هەروەها سەبارەت بە دەرمانەكانیش وەزارەتی تەندروستی بۆ ساڵی 2023 پلانی ئەوەیە كە نرخەكان یەك بخات و چیتر هاووڵاتییان دەرمانی بێ كوالیتی و بە نرخە جیاوازەكان نەكڕن، هەموو ئەوانە دەكرێنە سیستەم و دەتوانن لە رێگەی ئەپڵیكەیشنێكەوە نرخەكانی هەموو دەرمانەكان و كوالیتیەكەی دڵنیا ببنەوە كە لە نۆرینگە و دەرمانخانەكان بەردەستن و دەچنە بواری جێبەجێكردنەوە.
