“خزمەتگوزاری بۆ هەموو ناوچەكان دابینكراون”

لە گوندەكان كۆمەڵێك پڕۆژەی باش ئەنجام دراون”

هەژار ئەنوەر – خەلیفان:

مەغدید عەریف ئەحمەد، بەڕێوەبەری ناحیەی خەلیفان، لە بارەی بە قەزابوونی خەلیفان و كار و پڕۆژەكانی دەڤەرەكە، بۆ زاری كرمانجی گوتی: لەگەڵ دروستبوونی ئیدارەی سەربەخۆی سۆران، یەكێك لە ئامانجەكان شۆڕكردنەوەی دەستەڵات بوو بۆ فەرمانگە و بەڕێوەبەرایەتییەكان، چونكە بەرنامەی كابینەی نۆیەمی حكوومەتی هەرێمی كوردستان، گەیاندنی خزمەتگوزاری بوو بۆ سەرجەم شوێنەكان، هەروەها كەمكردنەوەی ڕۆتین و كارئاسانی زیاتر بوو بۆ هاووڵاتییان، لەو پێناوەشدا ئیدارەی سەربەخۆی سۆران دروست بوو، بڕیاردرا چەند شوێنێك بكرێن بە قەزا، بۆ ئەوەی بتوانرێت خزمەتگوزاری زیاتر پێشكەش بە هاووڵاتییان بكرێت، خۆشبەختانە لە ساڵی 2022 سیدەكان بوو بە قەزا، پلان هەیە و كاری لەسەر كراوە و چەند هانگاوێكی باشی كارگێڕی بڕیوە كە ئەمساڵ بە فەرمی خەلیفان بكرێتە قەزا، لەگەڵ بوونی خەلیفان بە قەزا پێویستە چەند شوێنێك بكرێنە ناحیە، دۆڵی ئاڵانە، دۆڵی خەلان بیاو و هەروەها گوندی سرێشمەش لەژێر كەنگەشە و دیراسە دانە بۆ ئەوەی ببن بە ناحیە.
بەڕێوەبەری ناحیەی خەلیفان، بە قەزابوونی خەلیفان، بەدڵنیاییەوە ڕۆتین كەم دەبێتەوە و هاووڵاتییانی ناوچەكە پێویست ناكات بۆ كارەكانیان بچنە سۆران و شوێنەكانی دیكە، لە ڕووی خزمەتگوزارییەوە بوودجەی زیاترمان بۆ دابین دەكرێت و دەستكراوەتر دەبین و خزمەتگوزارییەكان فراوانتر دەكەین لە سەنتەری شار و گوندەكانی دەوروبەر.
مەغدید عەریف ئەحمەد، دەشڵێ:” لەبەر كەشوهەوا كۆمەڵێك پڕۆژە كاركردنیان تێدا راگیراوە، هەندێك پڕۆژەش بەردەوامن، وەكو دوو سایدی خەلیفان – سپیلك، پلان و بەرنامەمان هەیە كە خزمەتگوزاری بگەیەنین بە سەرجەم شوێنەكان، گوندەكانیش بەشێكی سەرەكین لە سنووری ناحیەكەمان پێویستە خزمەتگوزارییان بۆ دابین بكەین، تا ئێستاش كۆمەڵێك پڕۆژەی باش لە گوندەكان كراون، وەكو لێدانی بیر بۆ ئاوی خواردنەوە كە كێشەی ئاوی خواردنەوەیان هەبوو، چاككردن و نۆژەنكردنەوەی تۆڕی كارەبا، چاككردنی ڕێگاكان، كاركردن لە ڕێگای ساوا بە گوژمەی یەك ملیار و بیست و نۆ ملیۆن دینار، كە یەكێكە لە پڕۆژە گرنگەكان و كۆمەڵێك گوند لێی سوودمەند دەبن، لە داهاتوویەكی نزیكدا پاركێكی راوەستاندنی ئۆتۆمبێل لە سەنتەری شار دروست دەكەین.
مەغدید عەریف ئەحمەد، بەڕێوەبەری ناحیەی خەلیفان، جەختی لەوەشكردەوە: لە ئێستادا زۆرینەی فەرمانگەكان لە باڵاخانەی خۆیاندان و كرێچی نین، بەڵام ڕەنگە بە راگەیاندنی قەزای خەلیفان، كێشەی باڵاخانە دروست بێت، كە ئێستا خەلیفان ٦٣ گوند و 40 هەزار كەس لە خۆ دەگرێت”.