بەڕێوەبەری گشتی گەشتوگوزاری سۆران:
هانی كەرتی تایبەت دەدەین بۆ ئەوەی وەبەرهێنان لە كەرتی گەشتیاریدا بكەن
پشتیوان كەریم- سۆران:
لە دیدارێكی زاری كرمانجیدا، فەیسەڵ سادق، بەڕێوەبەری گشتی گەشتوگوزاری ئیدارەی سۆران، باس لە پلانی بەڕێوەبەرایەتییەكەیان و ئەو بەربەستانەی لە بەردەم ئەنجام نەدانی پڕۆژەی گەشتیاری دەكات، كۆی شوێنە گەشتیاریەكان دەخاتە بەر باس و هاوكات داهاتی گەشتیاری ساڵانەی سنووری ئیدارەی سەربە خۆی سۆران ئاشكرا دەكات. دەشڵێت:” سەرۆكی حكومەتی هەرێمی كوردستان، گرنگی زۆر بە ئیدارەی سۆران و بەرەوپێش بردنی كەرتی گەشتیاری لەو دەڤەرە دەدات.
لە دەستپێكی قسەكانیدا، بەڕێوەبەری گشتی گەشتوگوزاری سۆران، دەڵێت:” ئێمە لە چوارچێوەی ئیدارەی سەربەخۆی سۆران كاردەكەین، لەبەر گرنگی و هەڵكەوتەی جوگرافی ناوچەكەش كە زۆر لەبارە بۆ كەرتی گەشتیاری، بەدەر نابێت لەو بزاڤە ئاوەدانی و پێشوەچوونانەی لەسایەی پڕۆژە هەمەچەشنەكانی دێنە ئەنجامدان، هاوكات ئێمەش لەلای خۆمانەوە كار دەكەین بۆ ئەوەی پڕۆژەی باش بێنە جێبەجێكردن كە گونجاو بن لەگەڵ خواستی خەڵكی ناوچەكە و بە پلەی یەكەم بۆ خزمەتی گەنج بێت، ئەوەش بە دوولایەنە، لە لایەك گەنج بتوانێت سوود لەو پڕۆژە گەشتیاریانە ببینێت و جێگای حەسانەوەی بێت و جێگایەكیش بێت بۆ ئەوەی حەزو ئارەزووەكانی تێر بكات، بە بوونی شوێنی ” تەرفیهی“، وەرزشی، رۆشنبیری و لەلایەكی دیكە ئەو پڕۆژە گەشتیاریانە دەبێ لە خزمەت گەنجان بێت و باشترین هەلی كاریان بۆ بڕەخسێنێت.
فەیسەڵ سادق، ئەوەش دەخاتەڕوو:” كاری سەرەكی و لە پێشینەمان پێداچوونەوەیە بە گشت پڕۆژە گەشتیاریەكان، ئەوانەی كەرتی تایبەت و وەبەرهێنان و یان ئەوانەی تێكەڵن لە نێوان حكومەت و كەرتی تایبەت، دەبێ هەموو لایەك پابەندی یاسا و رێنماییەكانی یاسایی نوێ گەشتیاری بن، هاوكات وەك بەڕێوەبەرایەتی گشتی گەشتو گوزار، كاردەكەین بۆ ئەوەی ئەو پڕۆژە گەشتیاریانەی پێویستن لە ناوچەكە ئەنجامبدرێن و یەكانگیربن لەگەڵ بنەما و ستانداردە جیهانییەكان، گرنگترین شت بۆ ئێمە ئەوەیە كە پڕۆژەكە كاریگەری خەراپ نەكاتە سەر سروشتی ناوچەكە و لە رووی دیزاینەوە زۆر سەردەمیانە و سەرنج ڕاكێش بێت و دەرفەتی كار بڕەخسێنێت. بۆ ئەمەش لەگەڵ هەموو لایەنە پەیوەندیدارەكان هەماهەنگی دەكەین بە تایبەتی بەڕێوەبەرایەتی وەبەرهێنان و ئیدارەی سەربەخۆی سۆران.
بەڕێوەبەری گشتی گەشتوگوزاری سۆران، جەختی لەوەشكردەوە:” ناوچە گەشتیاریەكانمان دابەشی سەر قەزا و ناحیەكان بوونە، بەدیاریكراویش قەزای سۆران و رواندز و چۆمان و مێرگەسۆر و هەروەها سنووری خەلیفان و قەزای سیدەكانیش كاری رژد دەكەین تا پەرەی زیاتر بە كەرتی گەشتیاری بدرێت، جۆری شوێنە گەشتیاریەكانیش لە رووی چۆنیەتی و چەندایەتی جیاوازن شوێنی گەشتیاری هۆتێل و مۆتێل و هەوارگە و چێشت خانە و كەپری گەشتیاری و گوندی گەشتیاری لە خۆ دەگرێت، هاوكات بۆ مەبەستی زیادكردنی ئەم جۆرە شوێنانە ئێمە هانی كەرتی تایبەت دەدەین كە وەبەرهێنان لەم بارەیەوە بكەن، چونكە راستیەك هەیە پێویستە خاوەن كار بزانێت، كە پڕۆژەی گەشتیاری لە ناوچەكەمان قازانجی زۆر بەدوای خۆیدا دەهێنێت بەتایبەتی ئەگەر پڕۆژەكە خزمەتگوزاری باشی تێدا بێت.
سەبارەت بەداهاتی گەشتیاریش، فەیسەڵ سادق بەڕێوەبەری گشتی گەشتوگوزاری ئیدارەی سۆران، ئاشكرای دەكات:” بۆ ئێمە تازەیە ئەم پرسە و بۆ ئەمساڵیش لەبەر ئەوەی كارەكانی ژمێریاری و داهات لە كۆتا مانگەكەكانی ساڵ كراوەتەوە داهاتەكەمان سنووردار بوو، بەڵام لە هەموو بارودۆخێكدا كەرتی گەشتیاری پێویستی بە پشتگیری و بایەخی زیاترە لەوەی تەنها پشت بە داهاتی خۆی ببەستێت، لەكاتێكدا كە زۆرینەی هەر زۆری پڕۆژە گەشتیاریەكان هی كەرتی تایبەتە، یەكێك لەكارە هەرە سەرەكیەكانی ئێمە بۆ ئەمساڵ ئەوە دەبێت كە ماستەر پلانی گەشتیاری گشتی دەڵەمەند وفراوان بكرێت و پەسەند بكرێت لە چوارچێوەی ماستەر پلانەكەشمان بیر لە پڕۆژەی ستراتیژی باش كراوەتەوە كە لە كاتی خۆی باسی لێیەوە ودەكەین .
لە دواین قسەكانیدا، فەیسەڵ سادق بەڕێوەبەری گشتی گەشتوگوزاری ئیدارەی سۆران، گووتی:” هیچ كارێك بێ ئاستەنگ و بەربەست نابێ، بۆ ئێمەش وەكو بەرێوبەرایەتی گشتی لەبەر ئەوەی تازەین و پێشتر كارەكانی هاووڵاتییان لە رێگای هەولێرەوە ڕای دەكران، كۆمەڵێك كێشە لە دۆسییە و پڕۆژەكاندا هەیە، دەبێ راستبكرێنەوە و لەلایەكی تر بەڕێوەبەرایەتی گشتی یەكەی یاسایی نەبووە و نەتوانراوە مامەڵەی یاسای لەگەڵ كەیسەكاندا بكرێت، هاوكات بوونی كێشەی زەوی وزار لە نێوان هاووڵاتییان لە نێوان خۆیان و دامەزراوەی دیكەی حكومەت كێشە دەخەنە بەردەم پڕۆژەكان، بۆیە هەموو هەوڵێكمان بۆ ئەوە دەبێت بەشێوەیەكی دادپەروەرانە و لە چوارچێوەی یاسا بەركارەكان و رێنماییەكانی دەستەی گەشتوگوزار و وەزارەتی شارەوانی و گەشتوگوزار كارەكان ئەنجام بدەین، بەڵام ئەوەی زیاد لە هەموو شتێك ئێمە دڵمان پێی خۆشە ئەو پاڵپشتی و بایەخ و گرنگیەی سەرۆكی حكومەتی هەرێمی كوردستانە كە بە ناوچەكەی دەدات و بەتایبەتی جەختی لەوە كردۆتەوە پاڵپشت و هاوكار دەبێت بۆ ئەوەی كەرتی گەشتیاری بوژانەوەی زیاتر بەخۆیەوە ببینێت و ئەو كاریگەریەی خۆی لەسەر ئاستی كوردستان و عێراق و ناوچەكە و جیهان زیاتر بكات”.
