دیدار- كوردستان یاسین
ئافرەتێكی بەرگدروويي دەستڕەنگینی كاری دەستی لە ئیدارەی سۆران، دەڵێت: ” توانیومە لە رێگەی پیشەكەم چەندین ئافرەت بخەمە سەر كار، داواكاریشە لە بازاڕو فرۆشیاران زیاتر بەرهەمی ناوخۆیی ساخبكەنەوە.
دەریا نەسڕولڵا، ئافرەتێكی خاوەن بەهرەو كاری دەستی بەرگدرووییە، لە ئیدارەیی سۆران، بە زاری كرمانجی راگەیاند: ” زیاتر لە 15 ساڵە لە بواری بەرگدووریی كاردەكەم و توانیوومە لەماوەیی كاركردنمدا چەندين خولی فێربوونی پیشەكە بۆ ئافرەتان بكەمەوە، لەسەرەتادا لەماڵەوە كارەكەم دەست پێكرد، دواتر چالاكییەكانم بەرفرەوان كرد، تەنانەت لەگەڵ رێكخراوەكانی GIZ و روانگەش وەك مامۆستای خولەكان رۆلی خۆم بینیووە لە ئاشناكردنی ئافرەتان بە كاری بەرگدرویی، هەروەها خولی ڕاهێنانی تایبەتیم هەبووەو بەمەش زیاتر لە 50 فێرخوازوو ئارەزوومەندانی بواری دروومان بەشداریان كردووەو بڕوانامەیی كاركردنیان پێدراوە”.
زیاتر گووتی: ” لە ئێستادا خاوەنی شوێنی تایبەت بە كاری بەرگدروویی خۆمانین و توانیومە لەرێگەیی پەرەپێدان و فراوان كردنی كارەكەم چەندین ئافرەت بخەمە سەر كار”.
ئاماژەی بەوەشدا: ” چوار ساڵ دەبێت دەستم كردووە بە دوورینی جلی مۆدە كە خواستی زۆری لەسەرە، هەروەها جلی كوردی و عەزیەو و جلی مۆدەیی پیاوان و ئافرەتان و منداڵان دەدوورین بە تاك و بە كۆ، تا ئێستا چەندان مۆدێل و شێوازی جلوبەرگمان ناردۆتە بازاڕ”.
لەدوا قسەكانیدا باسی لەوە كرد” هەمیشە لە هەوڵداین بۆ زیاتر فراوان كردنی شوێنی كار و بڕاندەكەمان، داواكاریشم خاوەن دوكان و بازاڕ هاوكارمان بن زیاتر گرنگی بە كاری دەستكردی ناوخۆیی بدەن، لەپێناو زیاتر بوژاندنەوەی بازاڕ و بایەخدان بە جلوبەرگ لە كوردستان”.
