گوڵستان فریشتەیەك لە بەهشتی نانەكەلی

ئا/ رێبین رواندزی
تا بڵێی روح سووك و میهرەبانە، رۆژانە رێكارەكانی چارەسەر كردنی دەیان نەخۆشی تووشبووی بە شێرپەنجە دەكات، بێ ئەوەی بچووكترین ماندوویەتی پێوە دیار بێت، بەردەوام بزەی لەسەر لێوە، هەست ناكەی كەسێكی بیانیی بێت، لەبەر ئەوەی ئەو وەك فریشتەیەك مامەلە لەگەڵ نەخۆشەكان و سەردانیكەرانی ئەوێ دەكات، ئەو فریشتەیە تەنها كاتێك نیگەران دەبێت كە بزانێت یەكێك لە نەخۆشەكان هەست بە نا ئارامی دەكات، ئیتر ئەو هەوڵ دەدات بە قسە و رەفتارەكانی هەم چارەسەرییەكانی بۆ بكات هەمیش لە رووی دەروونییەوە هاوكاریان بێت.
ئەو پەرستارە میهرەبانە ناوی (گوڵستان رەسول)ە، گولستانێك لەناو بەهشتی نەخۆشخانەی نانەكەلی، كە هیوا بە مرۆڤەكان دەبەخشێتەوە.
گوڵستانەكەی نانەكەلی، نموونەی پزیشك و پەرستاران و كارمەندانی نەخۆشخانەی نانەكەلییە، ئەو نەخۆشخانەیە كە تاكە هیوای هەزاران تووش بووی نەخۆشی شێرپەنجەی جۆراوجۆرن، هەر كە پێ دەنێیتە ئەو نەخۆشخانەیە دەیان فریشتەی نەجات لە هەر پلە و پۆستێك دابن، دەستی خەمخۆری و دڵسۆزیت بۆ درێژ دەكەن، هیوای ژیانت پێ دەبەخشنەوە، ئومێدی داهاتوویەكی گەشت لە ناخ دەچێنن.
ئەو رۆژەی بەهۆی نەخۆشكەوتنی كەسێكی ئازیزم چوومە نەخۆشخانەی نانەكەلی، لە میهرەبانییەكانی (گوڵستان خزر رەسول)ی فریشتە جوانییەكانی مرۆڤایەتی راستەقینەم بینی، جوانییەك كە ئامانجە سەرەكییەكەی رزگار كردنی مرۆڤەكانە بێ جیاوازی رەگەزی، نەتەوەی، ئاینی، مەزهەبی و تەمەن، گەورەیی پزیشكان و پەرستارانی نانەكەلیم لە چاوان و رەفتاری ئەو فریشتەیە دەبینی، ئەو دوای 20 ساڵ خزمەتكردن هیچ هیلاكی پێوە دیار نییە، گولستان بە دەنگێكی لێوان لێو لە ورە بەرزی بە نەخۆشەكانی دەگووت ” ترستان لە هیچ نەبێت، هەموو نەخۆشییەك چارەسەری هەیە، ئێوەش چاك دەبنەوە و دەچنەوە ناو خێزان و بنەماڵەكانتان”. وشە بە وشەی قسەكانی پرستارە خوێن شیرینەكە جگە لەوەی ئاماژەیەك بوون بۆ پەروەردەیەكی تەندروست لە خێزانەوە، بە هەمان ئەندازەش رەنگدانەوەی رێنماییەكانی نەخۆشخانەكەیە، هەروەها پابەندییەتی ئەوانە بەو سوێندەی لەكاتی وەرگرتنی بڕوانامە خواردوویانە كە مرۆڤانە مامەلە بكەن و ئامانجیان خزمەتی نەخۆشان بێت.
هەر بە مەبەست لەو هۆڵەی ئەو خانەمە خزمەتی نەخۆشانی دەكرد، چوومە هۆڵێكی دیكە، تا ببینم هەموو پەرستاران وان یا ئەو خانمە تایبەتمەندی و رەفتاری وایە، لە تەنیشت ئەو هۆڵە كە لە بینایەی ژمارە 2 بوو ، دوو هۆڵی دیكە هەبوون، لەولاتریشەوە دیسان چەند هۆڵێكی دیكە هەن، هەموو هۆڵەكان پڕ بوون لە نەخۆش، لە دەرەوەی ئەو بینایەش چەند هۆڵی دیكە هەن، ئەوانیش هەر پڕ بوون، پەرستارێكم نەبینی رەفتاری نەشیاو یا توڕە بوونێكی لە ئاست یەك نەخۆش هەبێت، بە پێچەوانەوە هەندێك لە نەخۆشەكان یا كەس وكاریان تووند رەفتاریان دەكرد و دەیانویست زووتر لە نۆبەتی خۆیان چارەسەری نەخۆشەكانیان بكرێت، بێ گوێدانە ئەوەی نەخۆشەكانی پێش ئەوانیش مرۆڤن، بەڵام فریشتەكانی رزگاكەر لە نانەكەلی بە میهرەبانییەوە وەڵامی هەموویان دەدایەوە.
ناشێ باسی گەڵاوێژ خانیش نەكەم، ئەو خانەمەی لەبینایەی پێشەوە دۆسیەی نەخۆشەكان وەردەگرێت و بۆلای پزیشكان دەیانبات، بە خۆی و دوو هاورێی دیكەی ناچارن رۆژانە مامەلە لەگەڵ دەیان نەخۆش بكەن، ئەوەی لە دوورەوە هاتووە، ئەوانەی لە شارەكانی دیكەی عێراقەوە هاتوون، ئەوانەی توڕە و تووندن و هەر یەكەوە لە خەمێكی هەیە، بەڵام ئەو بە هێمنی كاری هەموویان تەرتیب دەكات بێ توڕە بوونێكی سادەش.
ئەوەی دەهاتە نەخۆشخانەی نانەكەلی، لە خەمی خۆی و نەخۆشەكەی بوو، بەڵام گوڵستان خان و باقی فریشتەكانی نانەكەلی خەمی هەموویانیان لە كۆڵ ناوە.
لە هەمووشی گرنتر ئەوەیە تەواوی ئەو چارەسەرییانەی لەو نەخۆشخانەیە بۆ هاووڵاتییان دابین دەكرێت، بێ بەرامبەرە و لە رێگەی حكومەت و خێرخوازانەوە دابین كراوە.
ژیانی هەر یەك لە پزیشك و پرستار و كارمەندانی ئەو نەخۆشخانەیە و ئەو نەخۆشانەی سەردانی نانەكەلی دەكەن چیرۆكێكی جیاوازە، كە لە هەندێكیان خەم بەرۆكت دەگرێت، لە هەندێكشیان هیوا و ئومێد بۆ ژیانێكی گەشتر بۆ داهاتوو، چیرۆكە خەماوییەكان لە ناڵە و چاوی نەخۆشەكان دیارە و ئومێد و مرۆڤایەتیش لە رەفتار و گوفتاری فریشتەكانی نەخۆشخانەی نانەكەلی بەدی دەكرێت، گوڵستان خزر رەسول بە نموونە.