سەردار قازی ـ سۆران:
ئامارەكانی یانەی سۆران دوای تەواو بوونی یارییەكانی قۆناخی یەكەمی خولی نایابی كوردستان هاوسەنگ بوون.
سۆران، بەشكست كۆتایی بە قۆناخی یەكەمی خولی یانە نایابەكان هێنا.
دوێنێ هەینی، لە گەڕی پازدەی خولی یانە نایابەكان، سۆران لەسەر یاریگەی خۆی پێشوازی لەیانەی دهۆك كرد و 3-1 یارییەكەی پێدۆڕاند.
سۆران، لە قۆناخی یەكەم 14 یاریی ئەنجامدا توانی 5 یاریی بباتەوە، 4 بردنەوە لەسەر یاریگەی خۆی و بردنەوەیەك لەدەرەوە.
كوڕانی پایتەختی شەهیدان، دوو یەكسانبوون و 6 شكستیان هەبوو، توانیان 15 جار تۆڕی ركابەرانیان بهەژێنن و 23 جاریش تۆڕەكەیان هەژێندرا، بەمەش سۆران، خاوەنی خراپترین هێڵی بەرگری بوو بەراورد بەسەرجەم یانە بەشداربووەكان.
لەقۆناخی یەكەم سۆران، توانی پێگەی دەیەمی ریزبەند دەستەبەربكات، و لەقۆناخی دووەم 14 یاریی دیكە چاوەڕێی یانەكەی پایتەختی شەهیدان دەكات، بۆ ئەوەی ئەنجامی شایستەتر دەستەبەر بكەن.
