هەرێمی كوردستان لە قۆناغی هاوردەكارییەوە بەرەو قۆناغی هەناردەكاری هەنگاو دەنێت، بۆ ئەو مەبەستەش كەڵك لە پێوەندییە دیپلۆماسییەكان وەردەگیرێن. لە ئێستەدا هەناردەكردنی هەنار بۆ وڵاتانی كەنداو بەردەوامە و كردنەوەی ڕێڕەوی هەناردەكردنی بەرهەمەكانی كوردستانیش بۆ بازاڕەكانی دەرەوە، لە پاڵپشتیكردنی بەرهەمی خۆماڵیدا هەنگاوێكی گرنگە.
جەلیل ساڵحی، سەرپەرشتیاری پڕۆژەی هەناردەكردنی هەنار لە نووسینگەی سەرۆك وەزیرانی هەرێمی كوردستان، بە پێگەی فەرمیی حكوومەتی هەرێمی كوردستانی ڕاگەیاند، هەناردەكردنی هەنار بە دەستپێشخەری سەرۆكی ئەنجوومەنی وەزیران بووە و تیمی سەرۆكی حكوومەت، بە كارەكە هەستاون، لە ئێستەدا كەرتی دووەمی كارەكەمان تەواوكردووە، لە كەرتی سێیەم و كۆتایین، كە كۆتا قۆناغە لە هەناردەكردنی هەنار و توانیومانە بچینە نێو بازاڕەكانی ئیمارات و لە هایپەرماركێتەكانی ئەو وڵاتە هەناری كوردستان دەست دەكەوێت. هەروەها لە وڵاتانی بەحرێن و سعوودیەش هەیە، لە كۆتا قۆناغدا پێشبینی دەكەین بچینە وڵاتی قەتەریشەوە. لە ئێستەدا بە سەدان تۆن هەنار هەناردە كراوە، ئەوەی گرنگە كردنەوەی ڕێڕەوی هەناردەكەیە كە وایكردووە چەندین جووتیار پەیوەندی بە ئێمەوە بكەن و هەندێكیشیان خۆیان سەردانی ئیماراتیان كردووە بەو نیازەی بەروبوومی خۆیان ببەنە وڵاتانی كەنداو.
جەلیل ساڵحی، ئاماژەی بۆ ئەوەش كرد، ئەو پێوەندییە دیپلۆماسییەی لە نێوان كوردستان و ئیمارات هەبووە، بووەتە بنەمایەك بۆ پێوەندیی ئابووری و هەناردەكردن، ئەمەش ئاسانكارییەكی زۆری كردووە.
سەرپەرشتیاری پڕۆژەی هەناردەكردنی هەنار دووپاتی كردەوە كە نووسینگەی سەرۆك وەزیران و حكوومەتی هەرێمی كوردستان هاوكاریی هەر كەسێك دەكات كە نیازی هەناردەكردنی بەرووبوومی كشتوكاڵی بۆ وڵاتانی كەنداو هەیە.
هەروەها لەبارەی بەشی دووەمی پڕۆژەكەشەوە جەلیل ساڵحی گوتی، بەشی دووەمی كارەكانمان كە ستراتیژی حكوومەتی هەرێمی كوردستان دەبێت، بریتییە لە دامەزراندنی دامەزراوەیەك بۆ بەبازاڕكردنی بەرهەمی كشتوكاڵی كە لە داهاتوویەكی نزیكدا ئەم دامەزراوە دادەمەزرێت و لە ماوەی ساڵێك بۆ دووساڵ ئامادە دەكرێت، تا بەدەر لە هەناردەكردنی هەنار، بتوانین بەروبوومی كشتوكاڵی تری كوردستان بۆ وڵاتانی كەنداو هەناردە بكەین، بەهەمان شێوە بەهۆی ئەو پێوەندییە بەهێزانەی سەرۆك وەزیران بناغەیەكی بەهێزی بۆ درووستكردووە، دەتوانین كاری تەكنیكی و هەناردەكردن لەگەڵ وڵاتی بەریتانیا دەستپێبكەین، بۆ ئەوەی بەدەر لە وڵاتانی كەنداو، هەناردە بۆ وڵاتانی یەكێتیی ئەوروپا و بەریتانیاش بكەین.
جگە لە هەنار، حكوومەتی هەرێمی كوردستان ئامادەكاری دەكات بۆ هەناردەكردنی بەرهەمەكانی سێو، ترێ و هەنگوین. هەروەها پلانی پاڵپشتیكردنی جووتیاران و زەمینە خۆشكردن بۆ هەناردەكردنی بەرهەمەكانیان بۆ بازاڕەكانی دەرەوە فراوانتر دەكرێت. لە قۆناغی داهاتووشدا جگە لە بازاڕەكانی ئیمارات، هەناری كوردستان بۆ بازاڕەكانی سعوودیە و بەحرێن و وڵاتانی ئەوروپا و بەریتانیا هەناردە دەكرێن.
لەبارەی كرانەوەی دەرگای بازاڕی وڵاتان بەڕووی بەرهەمەكانی كوردستان و نیاز و پلانی حكوومەت و چۆنیەتیی فراوانكردنی ئەو بازاڕە لە وڵاتاندا، جەلیل ساڵحی، ئاماژەی بەوەكرد، ئێستە توێژینەوە بۆ ئەوە دەكەین كە لەمساڵدا بەدەر لەهەنار، سێ بەرهەمی تر لە داهاتوویەكی نزیكدا، كە وەرز و كاتی لێكردنەوەی بەروبوومەكانیان دێت هەناردە بكەین. لەگەڵ ئەوەی توێژینەوەكان لە ئێستەدا توێژینەوەی سەرەتایین و كۆتا ئەنجام نین، بەڵام ترێ، هەنگوین و سێو بەگشتی خواستیان لەسەرە، بە تایبەتی سێوی ناوچەی بەروار. بەڵام وەك باسمانكرد ئەمە سەرەتاییە و تا دەستپێكی چنینەوەی بەروبوومی كشتوكاڵی لە كوردستان و پێش دەستپێكردنی وەرزەكەی، دیاریدەكەین كە چۆن كڕیار و خواستمان بۆی دۆزیوەتەوە، چ لە وڵاتانی كەنداو یان وڵاتانی یەكێتیی ئەوروپا بێت، كە ئێمە ئێستە كاری لەسەر دەكەین.
لەبارەی چۆنیەتیی پێشوازیكردن و بوونی خواست لەسەر هەنار لەدەرەوەی كوردستان، سەرپەرشتیاری پڕۆژەی هەناردەكردنی هەنار لە نووسینگەی سەرۆكوەزیرانی هەرێمی كوردستان گوتی، بەر لە هەناردە كردنی هەناری كوردستان بۆ وڵاتی ئیمارات و وڵاتانی كەنداو، توێژینەوەمان كرد، تا بزانین ئەو هەنارەی ئێمە هەمانە بەپێی ئەو خەسڵەتانەی كە هەیەتی، كە لە وڵاتێك بۆ وڵاتێكی تر یان كیشوەرێك بۆ كیشوەرێكی تر جیاوازە و تایبەتمەندی و خەسڵەتی خۆی هەیە، لە ئەنجامدا ئەو توێژینەوەیەی كردمان و بە پێی دانیشتووانی وڵاتانی كەنداو، كە تاچەند خواستیان لەسەر هەناری كوردستان هەبێت، بۆمان دەركەوت كە هەناری ئێمە كێبڕكێی هەناری وڵاتانی یەكێتیی ئەوروپا دەكات و خەسڵەتەكانی نزیكن لە هی ئەوانەوە، هەروەك هەناری ئیسپانی كە لە وڵاتانی كەنداو خواستی لەسەرە، بەو پێیە بۆمان ڕوونبووەوە كە خواستێكی بۆ درووست دەبێت و خۆشبەختانە ئەو توێژینەوەی كردمان دەرئەنجامەكەی بەرجەستە بوو.
لەبارەی مەبەستی حكوومەتی هەرێمی كوردستان بۆ هاندانی جووتیاران و پەرەپێدان و فراوانكردنی كارەكانیان، سەرپەرشتیاری پڕۆژەی هەناردەكردنی هەنار لە نووسینگەی سەرۆك وەزیرانی هەرێمی كوردستان ئاماژەی بەوەدا، بەشێكی گرنگی ئەجێندای كابینەی نۆی حكوومەتی هەرێمی كوردستان، بەهەمەچەشنكردنی داهاتی هەرێمەكەیە و جەنابی سەرۆك وەزیران و تیمەكەی لە نووسینگەی سەرۆك وەزیران، زۆر بە گڕوتینەوە خەمخۆری جووتیارانی خۆمانە، و ئەم هەوڵەی ئێستە داومانە گەواهیدەری ئەوەیە كە یارمەتیدەری جوتیارانی هەرێمی كوردستان دەبین و بەبەردەوام هەوڵدەدەین بۆ بە بازاڕكردنی ئەو بەروبوومانەی هەیانە و ئەو ئەزموونە نەخوازراوانەی پێشتر هەیانبووە، دووبارە نەبێتەوە و ئەزموونێكی زۆر باشتریان بۆ درووست بكەین لە داهاتوودا. و دەرگای هەناردەكردنی بەروبوومەكانیان بەرەو وڵاتانی دەرەوە و بەتایبەت وڵاتانی كەنداو و یەكێتیی ئەوروپا بە ڕوویاندا بكەینەوە.
كابینەی نۆی حكوومەتی هەرێمی كوردستان لە چوارچێوەی هەمەچەشنكردنی سەرچاوەكانی داهات و گرنگیدان بە سێكتەری كشتوكاڵی، كار بۆ دۆزینەوەی بازاڕی جیاواز بۆ بەرهەمە كشتوكاڵییەكان دەكات و لە پاڵپشتیكردنی جووتیارانیش بەردەوام دەبێت.
