سەردار قازی ـ زاری كرمانجی:
لە هەرێمی كوردستان شێرپەنجەی مەمك و سییەكان و سەر و مل و پرۆستات و كێشەی ئافرەتان بەربڵاوترین جۆرەكانی شێرپەنجەن، سەدان هاووڵاتی بەدەست ئەو نەخۆشیانەوە دەناڵێنن. بەگوێرەی دواین ئاماری فەرمانگەی میدیا و زانیاری، رێژەی تووشبوانی شێرپەنجە لە هەرێمی كوردستان بەراورد بە هەڵكشانی ژمارەی دانیشتوان زیاد نەبووە.
بە پشت بەستن بە ئامارەكانی فەرمانگەی میدیا و زانیاریی حكومەتی هەرێمی كوردستان، رێژەی شێرپەنجە لە هەرێمی كوردستان لە چاو رێژەی دانیشتواندا زیادی نەكردووە، و شێوازی دیاریكردنی نەخۆشییەكەش بە بەراورد لەگەڵ ساڵانی پێشتر زیاتر لە %400 گۆڕانكاری بەسەردا هاتووە.
بەپێی زانیارییەكانی ئەو فەرمانگەیە لە ساڵی 2015 تەنها لەپارێزگای هەولێر 1300 تووشبوو بەنەخۆشی شێرپەنجە دیاریكراوە. بەڵام ساڵی رابردوو 2800 نەخۆشی شێرپەنجە لە هەولێر تۆمار كراون.
بە شێوەیەكی گشتیی لەماوەی 12 ساڵدا 23 هەزار كەس وەك نەخۆشی شێرپەنجە لەسنووری پارێزگای هەولێر تۆمار كراون.
