حکوومەتی فیدراڵی عێراق بەڵێن دەدات لە پرۆژەیاسای بودجەی گشتیی ساڵی 2027دا، سەرجەم فەرمانبەران و مامۆستایانی گرێبەست لە عێراق و هەرێمی کوردستان ببنە هەمیشەیی؛ هاوکات بڕیاری گرنگی دەستپێکردنەوەی پلەبەرزکردنەوەی فەرمانبەرانی هەرێمی کوردستانیش لەناو هەمان پرۆژەیاسادا بە فەرمی جێگیر دەکرێت.
ئەم هەنگاوە دوای کۆبوونەوەیەکی هاوبەشی سێ کاتژمێریی نێوان شاندەکانی دارایی هەولێر و بەغدا هات بە سەرپەرشتیی وەزیری دارایی عێراق؛ تێیدا گفتوگۆیەکی ئەرێنی لەبارەی پشکی هەرێمی کوردستان کرا و جەخت لەسەر زامنکردنی تەواوی مافە داراییەکان و چارەسەری کێشەکان بەفەرمی کرایەوە.
بەپێی زانیارییەکان، هەفتەی داهاتوو دەست بە داڕشتنی ڕەشنووسی بودجەی 2027 دەکرێت تاوەکو لە 15ـی ئەم مانگەدا ڕەوانەی ئەنجوومەنی وەزیران بکرێت؛ پاش پەسەندکردنیشی لە ماوەی یەک مانگدا، لە مانگی 10ـی ئەمساڵدا بە فەرمی دەخرێتە بەردەم خولی پەرلەمانی عێراقەوە.
