وەزارەتی خوێندنی باڵا داوای حەوت ملیار دینار دەكات
” گەشبینین دەرماڵەی قوتابییانی زانكۆ و پەیمانگەكان خەرج بكرێت “
موڕشید برادۆستی – سۆران:
حكوومەتی هەرێمی كوردستان لە ماوەی رابردوودا، حەوت ملیار دیناری بۆ دەرماڵە و پێداویستی بەشە ناوخۆییەكانی قوتابییانی زانكۆ و پەیمانگەكان خەرج كرد، ئەمەش ئاسانكاری زۆری بۆ قوتابییان دروست كرد، بەڵام چەند مانگێكە دەرماڵەی قوتابییان راگیراوە و خەرج ناكرێت، زاری كرمانجی بە دوواداچوونی بۆ دەكات.
د. رزگار سەعید یاریدەری سەرۆكی زانكۆ بۆ كار وباری قوتابییان، بە زاری كرمانجی راگەیاند:” ئێمە وەكو زانكۆی سۆران هەمیشە لە خزمەت قوتابییان بووینە و ئاسانكاریمان بۆ كردووە، تاكە زانكۆش بووین كە هەموو دەرماڵەی قوتابییان لە ساڵی رابردوو ئەوەی هەبووە لە كاتی خۆی دابەشمان كردووە، لە كاتێكدا زانكۆ هەیە هێشتا ئەو دەرماڵەی بە قوتابییان نەداوە كە پێشتر بۆیان دابین كراوە .
یاریدەری سەرۆكی زانكۆ بۆ كار وباری قوتابییان، دەڵێت:” سەرۆكی حكوومەتی هەرێمی كوردستان لە رابردوو وەك هاندانێك بۆ قوتابییانی زانكۆ و پەیمانگەكان بڕەپارەیەكی بۆ چەند مانگێك خەرج كرد، بەڵام دەرماڵەی قوتابییان هێشتا بە یاسایی رێكنەخراوە و لە نێو بوددجەدا شوێنی بۆ نەكراوەتەوە، ئێمە بەردەوام لەگەڵ وەزارەتی خوێندنی باڵا لەسەر هێڵین و لە پەیوەندیداین بۆ ئەوەی هەوڵ بدرێت لە رێگەی وەزارەتی دارایی و ئەنجوومەنی وەزیران دەرماڵەی قوتابییان خەرج بكرێتەوە، هەروەها نوێنەرانی ئێمەش بەردەوام بە دوواداچوون بۆ ئەو پرسە دەكەن، چونكە زۆر گرنگە و قوتابییان پێویستییان بەو بڕە پارەیە هەیە و ئاسانكاری زۆریان بۆ دروست دەكات.
گووتیشی:” گەشبینم دەرماڵەی قوتابییانی زانكۆ و پەیمانگەكان دەستپێبكاتەوە، ئاگادارین لە ئەنجوومەنی وەزیران و خودی مەسرور بارزانی و لە هەوڵدایە دەرماڵەی قوتابییان خەرج بكرێتەوە، بەپێی زانیارییەكانمان وەزارەتی دارایی راسپێردراوە كە میكانزمێك بدۆزێتەوە كە ئەمساڵیش بوددجەیەك تەرخان بكرێت و وەكو هاندان لەشێوەوی دەرماڵە بدرێتە قوتابییانی زانكۆ و پەیمانگەكان .
لای خۆیەوە، د . زێدان برادۆستی ئەندامی لیژنەی پەروەردە و خوێندنی باڵا لە پەرلەمانی كوردستان، بە زاری كرمانجی راگەیاند:” سەبارەت بە دەرماڵەی قوتابیانی زانكۆ و پەیمانگەكانی كوردستان، لە ماوەی رابردوو وەزارەتی خوێندنی باڵا بە شێوەی فەرمی نوسراوێكی كردووە و داوای دابین كردنی پارەی دەرماڵەی قوتابیانی كردووە بە هەمان میكانزمی ساڵی رابردوو .
د . زێدان برادۆستی، ئاشكراشی كرد:” مەسرور بارزانی سەرۆكی حكوومەتی هەرێمی كوردستان، ساڵی رابردوو بڕە پارەیەكی لەسەر بوددجەی ئەنجوومەنی وەزیران تەرخان كرد كە پێكهاتبوو لە 7 ملیار دیناری بۆ دەرماڵەی قوتابیان و پێداویستی بەشە ناوخۆییەكان، بۆخەرج كردنی ئەو بودجەیە بۆ ئەمساڵی خوێندنیش، ئەنجوومەنی وەزیران نوسراوی بۆ وەزارەتی دارایی رەوانەی كردووە، لە رۆژانی داهاتوو بڕیاری لێ دەدرێت و لە داهاتووەكی نزیك ئەگەری دابین كردن و خەرج كردنی دەرماڵەی قوتابیانی زانكۆ و پەیمانگەكان هەیە”.
گووتیشی:” داوایی یاسایەكی تایبەت لە وەزارەتی خوێندنی باڵا كراوە تا دەرماڵەی قوتابیان ساڵانە بە بێ گرفت خەرج بكرێت، بەڵام هێشتا هیچ پڕۆژە یاسایەك نەهاتۆتە پەرلەمانی كوردستان و یاسایی لەو بابەتەش دەرنەچووە”.
