ن/ ئیسماعیل ئیبراهیم
ئەمڕۆ 31ی ئابە، ئەو رۆژەیە كە بەهۆی ناكۆكی ناتەندروستی لایەنە سیاسییە سەرەكییەكانی كوردستان دەرهاوێشتەیەكی زۆر خراپی لێكەوتەوە، هاوشێوەی 16ی ئۆكتۆبەر، ساڵی 1983ی رێككەوتنی یەكێتی كە دەبابەی بەعسی هێنایە نێو شەقامەكانی شاری سلێمانی و بە زەنجیرەوە بەسەر لاشەی هاووڵاتییان كەوت، هاوشێوەی ساڵی 1966 كە بناغەی جاشایەتی لێ دانرا، زۆر رووداوی دیكە كە دەشێ تۆمار نەكرابن، یا رووداوی مەترسیداری دیكە كە بە زیانی نەتەوەی كورد شكاوەتەوە.
رۆژی 31ی ئابی 1996، هەر لە خۆڕاو بێ پاشخان نەهاتە كایەوە، گۆڕانی شاری هەڵمەت و قوربانی (سلێمانی) بە سەربازگەیەكی گەورەی سوپای پاسداران، بۆ بەدی هێنانی پیلانێكی مەترسیدار نێودەوڵەتی بۆ تەواو كردنی هیلالی شیعە و زاڵ بوونی بەسەر هەموو هەرێمی كوردستان، درووست كردنی گرووپ و چەكداری سەربە قەرارگای رەمەزان و گواستنەوەی ئەو واقیعەی شاری سلێمانی بۆ هەولێرو دواتریش بۆ دهۆك، ئەویش پاش نەمانی پارتی یا ئاوت پێكردنی پارتی لە كایەی سیاسی، یەكێك لە هۆكارەكانی بوو.
دۆخی ئەوسای شاری هەولێر و ئێستا ئەنجامێكمان دەداتە دەست كە وێڕای بوونی تێبینیمان لەسەر هەندێك بابەت، بەڵام هەولێری پێش 31ی ئاب كاوڵگەیەك بوو، پاش 31ی ئاب بووە پایتەختێك كە دەیان كونسوڵگەری و نوێنەرایەتی وڵاتانی لێكراوەتەوە ، بۆتە شوێنی یەكێك لە خۆشترین و سەرنج راكێشترین شارەكانی عێراق و وڵاتانی دیكەی ناوچەكەش. ئەنجامی 31ی ئاب ئاوەدانی و گەشەی سیاسی و ئابوورییە، هیچ هێزێكی عێراقی بوونی نییە و كەسیش لەسەر كوردبوونی بە جامانەی ملیەوە لەسەر زەوی و زاری خۆی دەرنەكراوە.
لە كاتێكدا شەڕی راگەیاندنی نێوان پارتی و یەكێتی راگیراوە و دانوستان لە نێوان هەر دوولا هەیە، مەكتەبی سیاسی یەكێتی نەدەبوایە ئەم جۆرە بەیاننامەیە دەربكات، چونكە وەك مازیكەری كوون لەكەشكۆڵ بەدەستی بەتاڵ لێ دێتەدەر، لەبەر ئەوەی پەرژینی یەكێتی هێندە لەسەر خاك فرۆشی و خیانەت پاك نییە تا پارتی بەم بابەتانەوە تۆمەتبار بكات، نموونەی زۆر سادەمان خیانەتی راستەقینەی 16ی ئۆكتۆبەرە، كە تا ئێستا نەتەوەی كورد و توركمانیش بەهۆیەوە دەچەوسێندرێنەوە و رۆژ لەدوای رۆژی بە بیانووی جیاجیا و لە سایەی ئەو خیانەتەوە فەرمانی دەستگیر كردن بۆ هاووڵاتییان كورد دەردەچێت و بە پیلان لە خوێندن بە زمانی دایك بێ بەش دەكرێن و وردە وردە پۆستەكان لە كورد دەسەندرێتەوە.
نووسەرەكەی بەیاننامەی مەكتەبی سیاسی لە كاتی دارشتنی بەیاننامەكە دەبوایە دۆخی هاووڵاتییانی گوندی پەلكانەی هاتبایە پێش چاو، و بەراوردی خیانەتی 16ی ئۆكتۆبەر و رۆژی 31ی ئابی بكردبایە، دەبوایە سەرۆكی یەكێتی نیشتمانی كوردستان رێزدار بافل تاڵەبانی ریگری لەم بەیاننامەیە بكردبایە، هیچ نەبێ لەبەر ئەو دۆخە هەستیارەی ئێستا هەرێمی كوردستان پێداگوزەر دەكات، ئێمە دۆخی باشوور، رۆژئاوا و رۆژهەڵاتی كوردستان دەبینین، دەشزانین پیلانی مەترسیدار بۆ باشووریش دانراوە، ئەم بەیاننامەیە لەكام پیلان رزگارمان دەكات؟
خۆزێ كاك بافل پرسیاری لە نووسەری ئەم بەیاننامەیە بكردبایە كە ئاخۆ سوودی ئەم چەند رستانە چییە؟ دەتەوێت چۆن خزمەتی نەتەوەی كوردی پێ بكەی؟
ئاخر بۆ هەر تۆمەتبار كردنێكی پارتی دەیان رووداوی خیانەتی یەكێتی هەن، كە دەشێ بەهۆی ئەم بەیاننامەیە و وەك بەرچاو روونییەك وەڵامیان بدرێتەوە.
یەكێتی رەحمی بە لاهووری شێخ جەنگی نەكرد لە پێناو دەستەڵات، یەكێتی رحمی بە شاسوار نەكرد و بە زەبری زیندان رێككەوتنی پێ واژوو كرد، یەكێتی شاند بە دوای شاند دەناردە بەغدا بۆ برینی بەشە بوددجە و مووچە تەنها لە پێناو لاواز كردنی پارتی و هاندانی شەقام لە دژی.
ئێستاش تەواوی لایەنە شیعە و سوونەكانی دژە كورد لە بەغدا باسی رێككەوتنی یەكێتی دەكەن لەگەڵ هێزەكانی حشدی شەعبی بۆ داگیر كردنی كەركووك و باقی ناوچەكانی دیكە.
بەڵام سەركردەكانی یەكێتی باسی رۆژانی پاش 31ی ئاب دەكەن كە چۆن پارتی توانی هەولێر رزگار بكات و بیكاتە پایتەختی كوردستان و شوێنی ئومێدی 70 ملیۆن كورد.
بۆیە پێموایە پارتی و یەكێتی هەر دووكیان لە زۆر قۆناغی جیاجیا ماڵیان لە شووشە دایە، باشتر وایە دامەزراوەكانیان هان بدەن بۆ هێنانە دی ئاشتەواوی كۆمەڵایەتی و سیاسی، نەك خوێ بە برینی نەتەوەیەك دابكەن.
هیوادارم پارتی دیموكراتی كوردستان، وەڵامی ئەو بەیاننامەیە نەداتەوە و بیر لە ئەركە قورس و ستراتیژییەكەی بكاتەوە.
پارتی لەو دەرچووە بەم كزە بایانە لە جوولە بكەوێت، لەبەر ئەوەی دار بەڕووە، ئەم دار بەڕووە بش سووتێندرێت دەرمارەكانی ئەوەندە رووچوونەتە قوڵایی زەوی كوردستان كە سەر لە نوێ بە هەناسە و دونیا بینی نوێ دەژێتەوە .
