گەنجانی خەلیفان بەهۆی نەبوونی كتێبخانە و سەنتەر، ناچارن روو لە كافتریا و چایخانەكان بكەن

سۆران سرێشمەیی- خەلیفان:
بەشی زۆری گەنجانی خەلیفان بەهۆی نەبوونی شوێنی گونجاو وەك سەنتەری گەنجان و كتێبخانەیەك كە شیاو بێت بۆ خوێندنەوە و نەبوونی هۆڵێك بۆ ئەنجامدانی چالاكی رۆشنبیری و وەرزشی، ناچارن پەنا بۆ كافتریا و چایخانەكان ببەن.
گەنجانی خەلیفان، بۆ زاری كرمانجی، سەرەڕای باسكردنیان لە چۆنیەتی بەسەربردنی ژیانی رۆژانەی خۆیان، لەهەمان كات داواكارن هەلی كاری زیاتریان بۆ بڕەخسێندرێت و هەر یەك لە ناوەندی رۆشنبیری چالاك بكرێتەوە و هۆڵی ناوەندی وەرزشی لاوانیش تەواو بكرێت و بخرێتە خزمەتی گەنجان و پاڵپشتی زیاتری لاوان و گەنجانی بكرێت لە ناوچەكەدا .
فواد فەرهاد، قوتابی زانكۆ، پێی وایە گەنج گەلێك لە شارەكەی هەن، كە توانای زۆر شتیان هەیە بیكەن، بەڵام وەك پێویست دەرفەتیان بۆ نەرەخسێندراوە، ئەو بەم شێوەیە بۆ زاری كرمانجی قسە دەكات و دەڵێ‌ :”لە شارەدێی خەلیفان ژمارەیەكی زۆر گەنجی بەهرەمەند و خاوەن توانای جۆراوجۆر هەن، بەڵام بەداخەوە بەهۆی ئەوەی كە شوێنكی گونجاو لەو شارە نییە و هیچ كەس و لایەنێك نییە پاڵپشتیان بكات و دەستیان بگرێت، ناچار بەبێ ئومێدیەكی زۆرەوە بۆ بەسەربردنی كاتەكانی رۆژ، روو لە كافتریاو چایخانەكان بكەن، جاری وایە شەو تا بەیان بەدەم نێرگەلەو چا خواردنەوە خەریكی یاری كۆنكان و دۆمینە دەبن، ئەگەر پاركێك، كتێبخانەیەك، هۆڵێكی وەرزشی، یان هەر شوێنكی تری گونجاو كە شیاو بێت گەنجان ڕووی تێبكەن، ئیتر گەنج ئامادە نییە لە كافتریا شەو بە رۆژ بسپێرێت و پارەیەكی زۆریش خەرج بكات، بەبێ ئەوەی دارێك لەسەر بەردێك دابنێ و وەك مشەخۆر لەسەر گیرفانی باوك و خێزانی بژێت و ببێتە بار بەسەر كۆمەڵگەو خێزانەوە”.
فواد لە كۆتایی قسەكانیدا داواكارم لایەنی پەیوەندار دەرفەتی كار بۆ گەنجانی خەلیفان بڕەخسێنێت و دەستی ئەو كەسانەش بگرێت كە بەهرەی جیاوازیان هەیە.
فەرهەنگ نەبی، بەڕێوەبەری یەكێك لە قوتابخانەكانی ئامادەییە لە نێو سەنتەری ناحیەی خەلیفان، ئاماژەی بەوە دەكات:”بەشی زۆری گەنجانی ئەم شارۆچكەیە خولیای وەرزش و بەتایبەتیش تۆپی پێ و تۆپی باڵەن، بۆیە بە گرنگی دەزانم ئاوڕێكی جددی لە بواری وەرزشی لە خەلیفان بدرێتەوە و گەر هیچ نەبێَ گۆڕەپان و یاریگایەكی پێشكەوتوو لەو شارە بۆ گەنجان و حەزلێكەرانی وەرزش دروست بكرێت”.
ئەو مامۆستایە گوتیشی:” لە بۆشایی نەبوونی هۆڵێكی وەرزشی و ناوەندێكی گورج و گۆڵی رۆشنبیری و شوێنێكی گونجاو بۆ ئەنجامدانی چالاكی جۆراوجۆر، ئیتر وەك بڵێی گەنجانی ناچار كردووە كافتریاو چایخانەو شوێنی تری ناپەسەند، وەك جێگرەوە ببین و بزانن، چونكە لە راستیدا گەنجانی خەلیفان زۆریش بێنازن و هەروەها بەشی زۆریشیان بێكارن، ئەمەش هۆكاری سەرەكی بووە كە لە ماوەی رابردوو ژمارەیەكی زۆری گەنج لەو شارە بەرەو تاراوگە سەریان هەڵگرت و بە ناچاری زێدو نیشتمانی خۆیان بەرەو قەدەرێكی نادیار جێهێشت، لە ئەگەری زیاتری پێشتگوێخستنیان رەنگە شەپۆڵێكی تری كۆچكردن لەو شارە دووبارەو چەند بارە ببێتەوە، بۆیە داواكارم حكوومەت و لایەنی پەیوەندار ئاوڕێك لە گەنجانی هەموو شارو شارۆچكەكانی كورستان بەگشتی و گەنجانی خەلیفان بە تایبەت بدەنەوە، هەر هیچ نەبێت هۆڵی لاوان كە ساڵانێكە بە نیوە چلی كاركردن تێیدا وەستێنراوە، تەواو بكرێت و بخرێتە خزمەتی گەنجانی ئەم شارە.”
دڵخواز محەمەد، دەرچووی كۆلێژی یاسا و چالاكوانی بواری ئافرەتان، ئەویش بەو شێوەیە باس لە بێكاری و پەراوێزخستنی كچان و گەنجانی شارەكەی دەكات و دەڵێت:” كچان و گەنجانی خەلیفان بە گشتی بێكارن و بە ناچاری زۆربەی كاتەكانی خۆیان بە بەكارهێنانی تۆڕی كۆمەڵایەتی بە هەموو جۆرە ئاپە جیاوازەكانەوە بەسەر دەبن و خەریكە لە نا ئومێدیدا تووشی گرفتی دەروونی دەبن، ئەگینا كچ و ئافرەت و گەنجی دەست رەنگینی وا لە خەلیفان هەن، دەتوانم بڵێم لە شوێنەكانی تر بەرچاو ناكەون، هەروەها رێژەیەكی زۆری گەنج بە هەردوو رەگەزی نێرو مێ خوێندیان تەواو كردووە، كەچی هیچ دەرفەتێكی كارو دامەزراندن لەو شارە نەڕەخسێنراوە، جگە لەمە بەربەستی كۆمەڵایەتی و رێگری خێزانی لەبەردەم كچانی خەلیفان زۆرە و ناتوانن بەهرەكانیان و توانا شاراوەكانیان پێش چاو بخەن، بۆیە داوا دەكەم حكوومەت و لایەنی پەیوەندار هاوتەریب لەگەڵ رێكخراوەكانی كۆمەڵگەی مەدەنی لاوان و ئافرەتان و قوتابییان لە رێگەی چالاكی جودا، كار لەسەر پێشخستنی بزاڤی رۆشنبیری لەو ناوچەیە بكەن و دەلیڤەی كارو دامەزراندن بۆ گەنجان بڕەخسێنن. چونكە حەزێكی زۆر بۆ كردنەوەی خول و ئەنجامدانی چالاكی هونەری، رۆشنبیری وەرزشی و كاركردن لای گەنجی خەلیفان بەرجەستەیە”.